Read Yucateco Oseas 11 Bible Online

Oseas 11 - Yucateco bible

Oseas 11

¹Le ca'ach chan paal u caajil Israele', tene' in yaabiltmaj ca'achi; ti' leti', máax in paal ca'ache', tin t'aanaj tu lu'umil Egipto.

²Ba'ale' je'el bix u bin in t'anique', bey u bin náachtal ca'ach ti' teen. In caajale' cu kubic ca'ach quiimsbil ba'alche'ob ti' u ma' jaajil kuob yéetel cu tóoquic ca'ach poom ti' beetbil kuob.

³Quex beyo', tene' tin nu'uctaj u beel u caajil Efraín ca tin ca'anbesaj xíimbal. ba'ale' leti'obe' ma' tu táan óoltajo'ob wa téen canantico'obi'.

⁴Yéetel u kaaxilo'ob muumun óolal yéetel xan u suumilo'ob yaacunaj tin taasajo'ob ti' teen; tin takajo'ob tin p'u'uc óoli' bey je'el bix u na'adzal mejen paalal u ti'al j chu'uche'; j chinlajen ti'ob u ti'al in dzáic ba'al u jaanto'ob,

⁵ba'ale' leti'obe' ma' tu yóoltajo'ob suut tin wicnali'. Le t o'olalo' yaan u suuto'ob tu lu'umil Egipto, Asiria bíin ajawtico'ob.

⁶Le táadz máascab ca'a mat u yejo' bíin lúubuc tu yóokol u noj caajo'ob, bíin ch'éejsa'ac u tuulumilo'ob, yaan u xu'ulsa'alo'ob tu yo'olal le jok jo'olo'ob cu beetico'obo'.

⁷In caajale' cu ch'iquicubáa j antal náach ti' teen; cu ka'am awato'ob tu tojil ca'an, ba'ale' mix máac áantico'ob.

⁸¿Efraín bix je'el u páajtal in p'atiqueche'? ¿Bix je'el u páajtal in xúump'attiqueche', Israel? ¿Je'el wa u páajtal in ch'éejsiquech je'el bix tin ch'éejsilac u noj caajil Adma, wa bíin in beet ta wéetel je'el bix tin beetaj ti' Zeboime'? ¡In pucsi'ikale' péecnaja'an u yóol, chuup yéetel ch'a'a óotzilil ta wo'olal!

⁹Ma' bíin in jaadznaquen yéetel tuláacal in p'uja'anili': mix bíin suunaquen in ch'éejs Efraini', tumen tene' Junab Kuen, ma' wíiniqueni'. Teen le Quili'icho', teen le yanen ichile'exo', ma' taalaja'anen u ti'al in ch'éejse'exi.

¹⁰Bíin u tzaypachto'ob Yuumtzil, leti'e' bíin áacamnac bey jun túul leóne'. Le quéen áacamnaque' u caajale' bíin talaco'ob j chikin táan u quiquilanquilo'ob.

¹¹Beyo'ob ch'íich', bíin talaco'ob quiquilanquil Egipto; bíin talaco'ob tu lu'umil Asiria beyo'ob sacpacale'; bíin in ca'a beet ca cajlaco'ob tu yotocho'ob. Teen Yuumtzil, teen a'alic.

¹²Efraine' tu súutpachtajen yéetel tuuso'ob; tu súutpachtajen yéetel táabsajo'ob u caajil Israel. Judae' dzo'oc u náachtal ti' Ku, bejela'e' u kubmaj u yóol ti' le beetbil kuobo'.