Read Yucateco Oseas 12 Bible Online

Oseas 12 - Yucateco bible

Oseas 12

¹Efraine' cu tzéenticubáa yéetel iik: bul kiin u bin tu tojil u yiikal j lakin. Cu ya'abcuntic u tuuso'ob yéetel u meyaj loobo'ob, cu beetic nup t'aano'ob yéetel Asiria cu túuxtic u siibalilo'ob aceite ti' Egipto.

²Yuumtzile' dzo'oc u dzáic ba'atel ti' Israel. Bin u ca'aj u jadz u caajil Jacob tu yo'olal bix u cuxtal; yaan u bo'otic je'el bix cu najmatic le ba'ax cu beetico'.

³Ma'ili' síijique', Jacobe' tu jeelintaj u sucu'un, le ca'aj nojoch wíinicchaje' j ba'atelnaj yéetel Ku.

⁴J ba'atelnaj yéetel jun túul ángel, tu t'ooquintaj xan, j okolnaji' ca tu káat óoltaj ca ch'a'abac óotzilil ti'. Kue' tu nactáantaj Betel ca j t'aanaj yéetel te'elo'.

⁵Yuumtzil, le Ku yaan tuláacal páajtalil ti'e': ¡Yuumtzil, leti' u kaaba'!

⁶Bey túuno', Israel suunen ti' a Ku; cuxlen yéetel jaajil óolal bey xan yéetel tojil, oques xan a wóol mantadz ti' Ku.

⁷Yuumtzile' cu ya'alic: Canane' yaan tu kab le tuutus p'iso'obo', tumen utz tu t'aan u yoocol yéetel u tuus.

⁸Efraine' cu ya'alic: ¡Bey, dzo'oc in ayikaltal, tin caxantaj jun p'éel nojoch ayikalil; ba'ale' mix máac bíin páatac u taquic in pool tu yo'olal tin náajaltaj in ayikalil ma' yéetel oocolil!

⁹Teen Yuumtzil, teen a Ku likbal cajliquech ca'ach Egipto, bíin in ca'a beet ca cajlaquech ti' chuybil najo'ob, je'el bix le kiinilo'ob ca tin nactáantajech te x tocoy lu'umo'.

¹⁰Tene' tin t'anaj le aj bóobato'obo' ca tin ya'abcuntaj u xooquil u náayo'ob, tu chi'obe' tin wa'alaj quet t'aano'ob.

¹¹Galaade' yaan cunel kuob, ba'ale' chéen tuutus kuob. Gilgale' cu ku'ubul quiimsbil xibil wacaxo'obi'; u multuunilo'ob u kultajo'obe' beyo'ob múuch' tuunicho'ob ichil u t'o'ol pakalilo'ob coole'.

¹²Jacobe' tu ch'a'aj u tojil u cool Aram, te'elo', u ti'al u caxantic u yatane' yanchaj u meyaj ti' canan j tamano'ob.

¹³Tu yéetel jun túul aj bóobate' Yuumtzile' tu jóokesaj u caajil Israel; tu lu'umil Egipto; ¡tu yo'olal jun túul aj bóobate', tu canantaj!

¹⁴U cajnáalilo'ob u lu'umil Efraine' tu beetajo'ob u p'u'ujul Yuumtzil, dzo'oc u jach chi'ichnaccunsic. Le t o'olale' Yuumtzile' bíin u beet u bo'otico'ob le quiimsaj tu beetajo'obo', bíin u beet u cuchico'ob u si'ipil u kasa'anilo'ob.