Read Yucateco Oseas 14 Bible Online

Oseas 14 - Yucateco bible

Oseas 14

¹¡Israel, Suunen ti' Yuumtzil a Ku, teche' j lúubech tu yo'olal a keban!

²Suunene'ex ti' Yuumtzil, payalchi'inene'ex beya': Sa'ates tuláacal c kasa'anil kam yéetel utzil óolal le qui'iqui' t'aano'ob kubic ti' techa'.

³Asiriae' ma' tu páajtal u toquico'on, mix táan u páajtal c púudzul tu yóokol tzíimin. Bejela'e' ma' bíin c a'ale'ex: C Ku ti' mix ba'al c beetmaj, tumen chéen ti' teech Yuumtzil, le j ma' yuumo' cu kamic ch'a'a óotzilil.

⁴Yuumtzile' cu ya'alic: Bin in ca'aj in dzaco'ob ti' u j ma' u'uyaj t'aanilo'obo'; bin in ca'aj in yaabilto'ob quex ma' tu najmaltico'ob, tumen dzo'oc u tzelicubáa ti' in p'uja'anil.

⁵Bin in ca'aj béeytal ti' Israel je'el bix le p'uulja'o, bíin loolnac je'el bix le dzula'obo'. U mootzo'obe' bíin ma'alob táabaco'ob je'el bix u witzil Libanoe';

⁶u kabo'obe' bíin jadzutz jáayaco'ob je'el bix u kabo'ob olivoe', u qui'iboquile' bey u qui'iboquil u kuulche'il libanoe'.

⁷Israele' bíin cajlac tu ca'a téen tu yáanal in canan; bey túuno' bíin ch'íijic je'el bix trigoe', bíin loolnac xan je'el bix u lool uvae' yéetel bíin kaj óolta'ac je'el bix u vinoil libanoe'.

⁸Efraine' bíin u ya'ale': ¿mix ba'al yaan in wil tu yéetel le beetbil kuobo'? ¡Teen máax áantic yéetel máax canantic in caajal! Tene' beyen jun cúul pinoe' mantadz ya'axe', ti' teen bíin u caxant in caajal u yich.

⁹Le aj ojéelajo'ob yéetel le ma'alob u tuuculo'obo' u ch'a'a nu'ucto'ob le péectzila': U bejilo'ob Yuumtzile' tojtaco'ob, le aj ti'ibil bejo'obo' cu bino'ob tu paach; ba'ale' le j loolob máaco'obo' ti' cu t'óochpajalo'obi'.