Read Yucateco Oseas 4 Bible Online

Oseas 4 - Yucateco bible

Oseas 4

¹Israelitaex, u'uye'ex ba'ax cu ya'alic Yuumtzil. Leti'e' dzo'oc u cáajsic jun p'éel ba'atel t'aan yéetel u cajnáalilo'ob le múuch' caajo'oba', tumen waye' bejela'e' mina'an jaaj óolal ichil máaco'oba', mix chuca'an óolal mix u kaj óolal ti' Kui'.

²Bejela'e' jela'an, máan tip'a'an cu yúuchul tuus ich jalach t'aan yéetel u ya'ala'al ba'al ma' jaaji', u quiimsa'al wíinic yéetel u yúuchul oocol, pak kebano' yéetel meyaj loob, cu yúuchul quíimsaj wíinic mina'an u xooquil.

³Le t o'olale' le múuch' caajo'oba' okom u yóolo'ob tu yo'olal quíimil; luba'an u muuko'ob máaxo'ob caja'ano'obi'; u ba'alche'ilo'ob káax yéetel le ch'íich'o'obo' cu quíimilo'ob, bey xan u cayilo'ob le ka'anabo'.

⁴Yuumtzile' cu ya'alic: ¡Mix máac u najmal u tac poltic mix u keyic u láak! In ba'atele' chéen ta wéetel, aj kiin.

⁵Teche' bíin lúubuquech chúumuc kiin, yéetel áakabe' bíin lúubuquech xan bíin lúubuc ta wéetele' le aj bóobato', teche' bíin in xu'ulsech.

⁶In caajale' mina'an u kaj óolal, le t óolal dzo'oc u ch'éejsa'al. Ti' teech aj kiin, ma' ta wóoltaj le kaj óolalo', le t o'olale' quin tzeliquech ti' in aj kiinil. Bey tumen ta tu'ubsaj u ca'anbesajo'ob a Kue', tene' bíin in tu'ubs a ch'i'ibalo'ob.

⁷Je'el bix u bin u ya'abtal ca'ach le aj kiino'obo', bey ca'ach u bin u ya'abtal u kebano'ob tin táan; le t o'olale' u tziiquile' bíin in kex yéetel subtzilil.

⁸Cu tzéenticuba'ob yéetel u keban in caajal; le t o'olale' cu yaayantico'ob ca kebanchajac in caajal.

⁹Je'el bix in caajale' bey aj kiino'ob, bíin in jadzo'ob tu yo'olal u kaakas cuxtalo'ob.

¹⁰tu yo'olal dzo'oc u p'atico'ob u meyajtico'ob Yuumtzile', bíin janaco'ob ba'ale' ma' bíin na'ajchajaco'obi'; bíin weeyannaco'ob, ba'ale' ma' bíin yanac u paalalo'obi'.

¹¹Cáacbachil yéetel u yu'ukul vinoe' cu beetic u sa'atal u yóol wíinic.

¹²In caajale' cu káat chi' ti' kuob beeta'ano'ob yéetel che'; jun cáach che'e' cu meyaj ti'ob u ti'al u na'ato'ob. In caajale' pa'an u muuk tumen le weeyanquilo' in caajale' cu xíimbal ti' keechel bejo'ob; cu kebanchajal iquil u xúump'attic u Ku.

¹³Ti' ca'anal pu'uco'ob yéetel tu yóokol jo'ol lu'umo'obe' cu tóoquico'ob poom yéetel cu kubico'ob quíimsbil ba'alche'ob, bey xan tu ma'alob bo'oy béec, tu bo'oy cóopo', tu bo'oy laurel. Le t o'olal dzo'oc u kastalo'ob a x ch'upul paale'ex, bey xan a wilibo'obe' cu pak kebano'ob.

¹⁴Ba'ale' tene' ma' bíin in jadz a x ch'upul paalale'ex tu yo'olal u weeyanquilo'obi' mix a wilibe'ex tu yo'olal u pak kebano'ob, tumen te'exe' láili' ca bine'ex yéetel le x cáacbacho'obo'; ca nupicaba'ex u ti'al a kubique'ex quiimsbil ba'alche'obe', ca nupicaba'ex yéetel co'olelo'ob cu cáacbachilo'ob bey jun p'éel kultajile'. ¡Bey u lúubul jun p'éel caaj mina'an u na'ato'!

¹⁵Wa teech Israel ca kastale', quexi' Judae' ma' u kebanchajal. ¡Ma' a bine'ex Gilgal mix a na'acale'ex Bet-avén, mix a jalach t'aane'ex tu yo'olal u cuxtal Yuumtzil!

¹⁶Israele' j ma' tzict'aan bey jun túul ko'ox x ja'aben wacaxe'; quex beyo', ¿bíin u canant Yuumtzil ichil qui'ichquelem su'uco'obo', óoli' bey u cananta'al mejen j tamano'obe'?

¹⁷Efraine' dzo'oc u kubicubáa u kult beetbil kuob. ¡Tuláacalo'ob j lúubo'ob beyo'ob u múuch'ul cala'ano'obe'! Bin u bin u kastalo'ob, u yóoltico'ob sublaquil, ti' tziiquil.

¹⁹¡Jun p'éel u pictaj iik bíin nup'ic u xiiko'ob, bíin xan u ch'a'ob subtal tu yo'olal u kultajo'ob!