Read Yucateco Oseas 5 Bible Online

Oseas 5 - Yucateco bible

Oseas 5

¹Aj kiine'ex u'uye'ex lela'; u caajil Israel dzáa óolte'ex xan; u cajnáale'ex jalach naj ch'en xiquinte'ex: Ta wóokole'ex bíin talac le p'is óolo', tumen te'exe' jun p'éele'ex léech dza'an tu lu'umil mizpa, jun p'éele'ex u káanil léech dza'an yóokol u witzil tabor,

²jun p'éele'ex u taamil ch'e'en tu táax u lu'umil Sitim. Le t o'olal bin in ca'aj in jadze'ex.

³Tene' in kaj óoltmaj Efraín; in kaj óoltmaj xan Israel. Efraine' dzo'oc u kascunticubáa; israele' dzo'oc u bóonol.

⁴Le ba'alo'ob kaastac cu beetic le caajo' ma' tu ch'a'ic u suut ti' u Ku. T'onquina'an tumen le weeyanquil, ma' tu kaj óoltic Yuumtzil.

⁵U j ca'anal ichil Israele' cu ka'am tac pool tu yo'olal; Efraine' cu t'óochpajal ti' u kasa'anil, ¡pa'ate' yéetelo'obe', Judae' bíin t'óochpajac!

⁶Yéetel u j tamano'ob bey xan yéetel u wacaxo'ob bíin xi'ico'ob u caxanto'ob Yuumtzil, ba'ale' ma' bíin u nuptáanto'obi' tumen tu tzelajubáa ti'ob.

⁷Tu kexajo'ob u Yuumtzil, tumen yanchaj u paalal yéetel u yaanal taata, tu yo'olal u kex óolal, chéen ti' jun winale' u lu'umilo'obe' bíin xu'ulsa'ac.

⁸¡Uste'ex le u baaquil ba'atelil tu lu'umil Gabaa yéetel le jóopsaj paaxo' tu lu'umil Ramá! ¡Dza'ex u péectzlil sajaquil Bet-avén! ¡Pake'ex péec óolal tu lu'umil Benjamín!

⁹Teen ka'aytic ichil u ch'i'ibalo'ob Israel ba'ax bíin úuchuc jach tu jaajil: Efraine' bíin u ch'éejsa'ac tu kiinil le jaadzo'.

¹⁰Yuumtzile' cu ya'alic: U nuuquilo'ob Judae' beyo'ob le máaco'ob cu kexico'ob u xu'uk le coolo'obo'. ¡Ba'ale' bin in ca'aj in bulo'ob yéetel in p'uja'anil!

¹¹Efraine' táan u ye'edzel, ma' utz tu yóol u pepe'echa'ata'al ba'ax cu najmata'al, tumen tu pechubáa j bin tu paach beetbil kuob.

¹²Teen túune' bíin béeychajaquen j kamas u ti'al Efraín, beyen j sib u ti'al u caajil Judá.

¹³Le quéen u yil Efraín u yajil u koja'anil, le quéen u yila'a' xan yajilo'obe', Efraine' bin xi'ic Asiria u ti'al u káatic áantaj ti' noj ajaw, ba'ale' leti'e' ma' bíin páatac u dzaquic u yajili'.

¹⁴Bey jun túul león cu pulcubáe' tu yóokol u dzoone', bey bíin in pulinbáa tu yóokol Efraín yéetel tu yóokol Judá; teen bíin in xe'exet'o'ob cu dzo'ocole' quin bin; bíin in jáanpayto'ob, mix máac cu bin páajtal u toquico'ob.

¹⁵Cu dzo'ocole' quin suut tin cúuchil, tac quéen u kaj óolto'ob u kebano'ob, ca talaco'ob u caxanteno'ob. ¡Ichil u mukyajo'ob cu bin u caxanteno'ob!