Read Yucateco Oseas 7 Bible Online

Oseas 7 - Yucateco bible

Oseas 7

¹le quéen in wóolt in dzac in caajale', Efraín yéetel samariae', cu chíicpajal u keban yéetel u loobil. Tumen tuláacalo'ob ma' tu tzelico'ob tu chi'ob le tuuso'; beyo'ob oocolo'obe', cu yoclo'ob ichil najo'ob cu toc ocoltico'ob xan le máaco'ob xíimbalo'ob te j bejo'obo'.

²Ma' tu máan tu tuuculo'ob, ti' tene' kaja'an tuláacal u loobilo'ob. Bejela'e' kala'ano'ob tumen u kasa'anil u cuxtalo'ob, amal yanil tu táan in wicho'ob.

³pa'ate' u loobil yéetel u tuuse' in caajale' cu qui'imacunsico'ob u yóol ajaw yéetel u nuuquilo'ob u j meyajo'ob.

⁴Tuláacalo'obe' j pak kebano'ob; beyo'ob chujcabe'; le quéen ma'alob t'a'aba'aque' cu jáawal u táacnáajche'eta'al ca'aliquil u pajtal u sacanil le waajo'.

⁵Ti' u kiinil dzaabic u p'óoquint le péet jo'ol ti' ajawe', le u nuuquilo'ob le j meyajo'obo' tu beetajo'ob u koja'anchajal yéetel u chocoil le vinoo', ¡Leti'e' tu tich'aj u kab tu tojil máaxo'ob che'ejtico'!

⁶U pucsi'ikalo'obe' chocochaja'ano'ob ti' x mucul men yaj, bey je'el bix u t'abico'ob jun p'éel chujcabe'; bul áakabe' cu wenel máax táanlic u káakil, ba'ale' le quéen sáaschajaque' láili' t'aba'ane'.

⁷Tu jaajile', tuláacalo'ob t'aba'an yanilo'ob beyo'ob chujcab tu léedz káaktaj u j méektáano'obe'. Tuláacal u ajawilo'obe' j lúubo'ob, mina'an mix jun túul cu payalchi'itiqueni'.

⁸Efraine' cu pa'ate'cunsicubáa yéetel u láak caajo'ob Efraine' bey jun p'éel sacpet waaj póoca'an chéen jun tzéele'.

⁹Pa'ab u muuk tumen jela'an wíinico'ob, leti'e' ma' tu yojéeltaji'. ¡Ma' tu yilaj wa dzo'oc u sactal u tzo'otzel u pooli'!

¹⁰U j ca'anal ichil Israele' leti' taquic pool. Mix beyo', ma' j suunajo'ob mix tu caxantajo'ob Yuumtzil u Kuobi'.

¹¹Efraine' bey jun túul sacpacal saatal u yóole': mina'an u na'at, cu káatic áantaj ti' Egipto, cu dzo'ocole' cu káatic áantaj ti' Asiria.

¹²Ba'ale' le quéen xi'ico'ob te'elo', bíin in pul in léech tu yóokolo'ob, bíin in beet u lúubulo'ob bey u ch'íich'il j ca'ane', bíin in lap'o'ob tu yo'olal u kasa'anilo'ob.

¹³¡Óotzilo'ob tu yo'olal tu tzelajuba'ob ti' teen! Le xu'ulsajilo' bíin talac tu yóokolo'ob tumen líiko'ob u beeto'ob kaas ti' teen. Tene' in káat in toco'ob, ba'ale' leti'obe' cu taquico'ob in pool yéetel tuuso'ob.

¹⁴Quex cu yawato'ob chilicbalo'ob tu kaano'ob, ma' tu payalchi'ob ti' teen yéetel u jaajil u yóolo'ob. U ti'al u káatico'ob trigo yéetel vinoe', cu kilicuba'ob, ¡ma' u káato'ob u yu'ubo'ob in t'aan!

¹⁵Tene' dzo'oc ca'ach in ca'anbesico'ob tin dzaj ca'ach muuk u kabo'ob, ba'ale' leti'obe' tu tucultajo'ob u beetico'ob loob ti' teen.

¹⁶Suunajo'ob u kulto'ob beetbil kuob; beyo'ob jun p'éel x p'úunche' lo'oloche', Tu yo'olal lelo' u julubile' ma' tu tza'ayal. Tu yo'olal cu t'aano'ob yéetel pooch'ilo'obe' bíin lúubuco'ob yéetel u yej máascab, bíin p'a'asta'aco'ob tu caajil Egipto.