Read Yucateco Oseas 8 Bible Online

Oseas 8 - Yucateco bible

Oseas 8

¹Jóops le paaxo', je'el bix u beetic le u j canan caajal Yuumtzile'. Tumen ma' tu dzo'ocbesajo'ob in nup t'aan ma' xan tu tzicajo'ob in ca'anbesajo'obi'.

²Ba'ale' cu taalo'ob u yawat a'alo'ob: ¡Kamiquech bey u Kuil Israel!

³Ba'ale' Israele' tu cúulpachcuntaj ba'ax utz, le t o'olal bíin ch'a'apachta'ac tumen u aj p'eeco'ob.

⁴Leti'obe' tu dzajo'ob ajawo'ob, ba'ale' ma' teen j yéeyo'obi', tu ya'alajo'ob máaxo'ob u nuuquilo'ob, ba'ale' ma' tu dzajo'ob in wojéelti'. Tu ch'a'ajo'ob u plata yéetel u oro u ti'al u beetico'ob kuob, u ti'al u xu'ulsicuba'ob tu báilo'ob.

⁵¡Samaria, cu taaccuntic in xej le chan wacax ca kultico'! In p'u'uja'anile' cu léequel tu yo'olal. ¿Israelitaex, ba'ax kiin bíin utzac a wanile'ex?

⁶¡Le u chan wacax Samariao' ma' Kui'! U meyaj jun túul máac, j beeta'ab tumen jun túul aj meyaj, le kuobo' bíin xe'exet'a'aco'ob.

⁷Tumen leti'obe' tu pakajo'ob iiko'ob, bíin u jocho'ob chac ikalo'ob; ma' bíin yanac cool u jocho'obi', mix sacan u pakachto'obi', wa ca páatac u beetico'obe' táanxel j lu'umilo'ob bíin jaantic.

⁸¡Israele' dzo'oc u lu'ukul! Le u láak caajo'obo' cu yilico'ob bey mix ba'al u biilale',

⁹tu yo'olal j bin u áantaj ti' Asiria bey jun túul j káaxil tzíimine'. ¡Efraine' tu majan bo'otaj u weeyo'ob!

¹⁰Ba'ale' quex ca u kub siibalo'ob ti' múuch' caajo'obe', tene' bin in ca'aj in ki'itbese'ex, bíin máanac dze'edzec kiino'ob mina'an u ajawilo'ob mix u nuuquilo'ob.

¹¹Tumen Efraine' cu beetic ya'ab u multuunilo'ob kultaj, chéen u ti'al j kebanchajal u biilalo'ob.

¹²Quex tumen tin dzíibtaj ya'abcach ca'anbesajo'ob u ti'al leti'e', leti'e' tu yilaj bey mix ba'al u biilale'.

¹³Leti'obe' qui' tu chi'ob le quiimsbil ba'alche'obo', le t o'olal cu táanbesico'ob, cu jaantico'ob u bakel le quíimsbil ba'alche'ob; ba'ale', teen Yuumtzile' ma' qui'imac in wóol yéetelo'obi'; bíin in ka'ajes le loob tu beetajo'obo', bíin in jadzo'ob tu yo'olal u kebano'ob bíin in beet u suuto'ob Egipto.

¹⁴Israele' cu beetic jalach najo'ob, ba'ale' cu tu'ubsico'ob máax tu dzáa u cuxtal. Judae' cu líikesic ya'abcach caajo'ob tuulumta'ano'ob, ba'ale' tene' bíin in beet u jáabalo'ob ich káak le bíin xan in beet u jáabal u jalach najo'ob.