Read Yucateco Oseas 9 Bible Online

Oseas 9 - Yucateco bible

Oseas 9

¹Israel, ma' u qui'imactal a wóol; ma' a síit' qui'imac a wóol je'el bix le u láak caajo'obo', kebanchajech úuchic a xúump'attic a Ku. Te tu t'o'ol lu'umil tu'ux cu p'u'uchul trigoo', utzchaj ta t'aan a kamic u bo'olal a weeyanquil.

²U caajil Israele' ma' bíin yanac trigo ti'i' mix vinoi; u túumben vinoe' ma' bíin chúucpajaqui'.

³Efraine' bíin suunac Egipto, tu lu'umil Asiriae' bíin jaanta'ac janal ma' utz yanili'. Ma' bíin cajlaco'ob tu múuch' caajalo'ob Yuumtzili':

⁴Ma' bíin u yuuco'ob vino ti' u tziiquil Yuumtzil, mix bíin u kubo'ob te j cúuchilo' u quiimsbil ba'alche'obi'. Waaj bíin u jaanto'obe' bey u waajil u yokom óolta'al quimene', máaxo'ob bíin jaantique' bíin páataco'ob ma' utz yanilo'obi'. Leti'ob bíin u jaanto'ob le waajo', ba'ale' ma' bíin páatac u bisico'ob tu kulnaj Yuumtzili'.

⁵¿Ba'ax bíin a beete'ex tu kiinil kiinbesaj, tu qui' óotzilil u kiinbesajil Yuumtzil?

⁶Leti'obe' dzo'oc púudzulo'ob ti' le xu'ulsajo'; Egipto bíin kamico'ob, tu lu'umil Menfise' bíin mu'ucuco'ob. U taakino'ob plata u ca'aje' bíin u chu'upuco'ob yéetel láal, tu chuybil najo'obe', ki'ixo'ob bíin ch'íijico'obi'.

⁷¡Dzo'oc u kuchul u kiinilo'ob le jaadzo'! ¡Dzo'oc u kuchul u kiinilo'ob u yúuchul bo'ol je'el bix u najmale'! ¡Israele' yaan u yojéeltic dzo'oc u kuchul le kiino'! Te'exe' ca wa'alique'ex: Aj bóobate' mix ba'al u yojel. Le máac yaan sáasil tuucul ti'e' ma' tu yóol yanili'. Ba'ale' cu ya'alico'ob tumen chuupo'ob yéetel loob tumen u p'eequile' jach nojoch.

⁸Kue' tu dzaj u aj bóobat u ti'al u canant u caajilo'ob Efraín, ba'ale' te'exe' ca dzáique'ex léecho'ob tu beel; ¡tac u ichil kulnaj Ku ca p'ectique'ex!

⁹Jach kaschaje'ex, je'el bix tu kiinilo'ob Gabae'. Ba'ale' Yuumtzile' ma' bíin tu'ubuc u kasa'anili' bíin u jadz tu yo'olal u kebano'ob.

¹⁰Yuumtzile' cu ya'alic: Le ca tin nuptáantaj Israele', qui'imacchaj in wóol je'el bix le máax cu nuptáantic uvaob x tocoy lu'ume'. A máanja'an ch'i'ibale'exe' tin wilajo'ob beyo'ob ca'ach u yáax ich higoe'. Ba'ale' le ca'aj j kucho'ob tu lu'umil Baal-peore' tu jun páaycuntajuba'ob ti' le ma' jaaj kuobo', ca tu beetajuba'ob jach p'ecbe'eno'ob je'el bix le beetbil kuob cu yaacuntico'ob ca'acho',

¹¹U nojochil Efraine' bíin xiknalnac bey jun túul ch'íiiche'. Ma' bíin síijic u láak paalali', ma' bíin yanac u láak co'olelo'ob x yo'omchaja'ano'obi'. ma' bíin yanac u láak u mejen paalalo'obi',

¹²Wa ca páatchajac u yantal u paalale', tene' bíin in toc ti'ob, ma' bíin p'at in mix jun túul ti'obi'. ¡Yaj yanilo'ob le máaco'ob le quéen in tzelimbáa ti'obe'!

¹³Quin wilic bix u t'anic Efraín u paalal bey wíinico'ob macha'ano'ob u ti'al j quiimsbilo'obe'; cu jóokesico'ob u ti'al u kubico'ob u ti'al j quiimsbilo'ob.

¹⁴¡Yuumtzil, dzáa ti'ob le ba'ax kabéet a dzáic ti'ob! ¡Ma' a cha'ic ca maamachajaco'ob, mix ca tzéemnaco'ob!

¹⁵Yuumtzile' cu ya'alic: Tu caajil Gilgale' tu beetajo'ob tuláacal ba'ax kaas, ti' tin chucbesaj in p'ectico'obi'. Tu yo'olal u kaakas cuxtalo'obe' bin in ca'aj in jóokeso'ob tin wotoch; ma' bíin in ca'a yaabilto'obi', tumen tuláacal u nuuquilo'obe' ma' tu yu'ubico'ob t'aan.

¹⁶Efraine' quimpaja'an, bey jun cúul che' tiquin u motze' tu p'ataj u dzáic u yich. Quex wa ca yanac u paalale', teen bíin in beet u quíimilo'ob.

¹⁷Le caaja' ma' u yóolt u ch'en xiquint in Ku; le t o'olale' in Kue' yaan u cúulpachcuntic, bíin xan u máanaco'ob saatalo'ob ichil u láak caajo'ob.