Read Yucateco Joel 2 Bible Online

Joel 2 - Yucateco bible

Joel 2

¹Tu witzil Sione' Paxe'ex le jóopsbil paaxo'; jóopse'ex u paaxil jak óolal tu quili'ich witzil Yuumtzil. Quiquilnaque'ex tuláacal le caja'ano'ob Judao', tumen naadz yanil u kiinil Yuumtzil:

²u kiinil éekjoch'e'enil yéetel éekpike'enil, u kiinil múuyalo'ob yéetel bo'oyilo'ob. Jun p'éel táaj nojoch u múuch'ul j sáako'ob dzo'oc u jáayal tu yóokol le pu'uco'obo' beyo'ob u sáasjome'enil u taal u sáastale'. Mix jun teen ila'ac, mix bikin bíin ca'a ila'ac ba'al beyo'.

³Beyo'ob káak cu xu'ulsic tuláacal ba'ale'; cu tóoc ma'ili' máanaque', bey xan cu dzo'ocol u máane'. Le lu'ume', bey ca'ach jun p'éel Eden ma'ili' talaco'obe', le quéen xi'ico'obe' cu p'áatal bey jun p'éel x tocoy lu'ume'. ¡Mix ba'al cu p'áatal tu beelo'ob!

⁴Chica'ano'ob ti' tzíimino'ob cu yáalcabo'ob nat'a'ano'ob

⁵u juumbal xan le quéen síit'naco'ob tu yóokol le pu'uco'obo', beyo'ob u juumo'ob u bolanilo'ob ba'atele', bey u juum u yelel tiquin le'ob cu tóoca'alo'ob tumen káake'. Beyo'ob jun múuch' aj ba'atelo'ob yaan u páajtal cu tzolicubáa u ti'al j ba'atele'.

⁶Le máaco'obo' le quéen u yilo'obe' cu quiquilanquilo'ob, tuláacal u táan yicho'obe' cu sacpile'entalo'ob.

⁷Cu yáalcabo'ob beyo'ob u jach xiixib máaquilo'ob ba'atele', cu na'acalo'ob tu yóokol le tuulumo'obo', tu jujun túulilo'ob cu bino'ob tu beelo'ob, mix jun túul cu kechic u bejili'.

⁸Ma' tu paclan jéentanticuba'ob, tu jujun túulil cu bin tu beel, cu jupicuba'ob ichil julubo'obo', mix bey cu ki'itpajalo'obo'.

⁹Cu téec ch'a'ico'ob le caajo', cu yáalcabo'ob tu yóokol le tuulumo', cu na'acalo'ob tu yóokol le najo'ob beyo'ob j oocolo'ob cu yooclo'ob ti' calom kiine'.

¹⁰Tu táano'obe' le lu'uma' cu quiquilaanquil, le ca'ano' cu péec u yóol, le kiin yéetel le ujo' cu yéekjoch'e'entalo'ob, le eeko'obo' cu p'áatalo'ob x ma' léembalil.

¹¹Yuumtzile' tu táan u aj ba'atelo'obe', cu beetic u yu'uba'al u t'aan bey u juum u quíilbal cháaque'. Sen ya'abo'ob u aj ba'atelo'ob; seten ya'ab le máaxo'ob beetic ba'ax cu ya'alico'. ¡Buca'aj nojochil yéetel sajbe'entzil u kiinil Yuumtzil! Mina'an mix máac je'el u páajtal u wa'atal tu táan.

¹²Ba'ale' bejela'e' Yuumtzile' cu ya'alic: ¡Suunaque'ex ti' teen yéetel tuláacal a pucsi'ikale'ex. Suukinene'ex, awatnene'ex yéetel okolnene'ex!

¹³¡Suunene'ex ti' Yuumtzil a Kuex, jat a pucsi'ikale'ex, ma' a jatique'ex a nooke'ex! Tumen Yuumtzile' utz yéetel cu ch'a'ic óotzilil, chuca'an u yóol, láaj yaacunaj, mantadz u dzaama u yóol u lukesic le jaadzo'.

¹⁴Ma' xan ca in tucult ma' in jadzique'exi', ca in túuxt ti' te'ex qui'iqui' t'aano'obi': janalbe'en neeko'ob yéetel vino u ti'al u ti'ibil óolal Yuumtzil a Kuexi'.

¹⁵¡Paxe'ex le jóopsbil paax tu witzil Siono'! T'ane'ex le caajo' a'ale'ex ti'ob ca úuchuc su'ukin;

¹⁶much'quinte'ex u caajal Ku, utzquinte'ex u yanilo'ob; much'quinte'ex le nuxibo'obo', mejen paalalo', tac le chan palo'ob cu chu'ucho'obo'. ¡Tac xan le máaxo'ob táantic u dzo'ocol u beelo'obo' jóokoco'ob te tu káasabil dzoca'an beel!

¹⁷okolnaco'ob le aj kiino'obo', u aj meeyjulo'ob Yuumtzil, ca u ya'alo'ob tu yáam u táancabil yéetel u multuunil kultaj: Yuumtzil, sa'ates u si'ipil a caajal; ma' a cha'ic ca p'a'asta'ac a caajal tumen mix máac; ma' a cha'ic u t'onquinta'alo'ob tumen le u láak caajo'ob mix ca a'ala'ac tumen le ma' ocsaj óolo'obo': ¿Tu'ux yaan u Ku?

¹⁸Yuumtzil túune' tu ye'esaj u yaacunaj tu yo'olal u caajal; yéetel u ch'a'a óotzilil ti' u caajale',

¹⁹tu ya'alaj: Bin in ca'aj in túuxt trigo, vino yéetel aceite, tac a qui' na'ajtale'ex, ma' bíin suunaquen in cha'a' a che'ejtale'ex tumen le j ma' ocsaj óolo'obo'.

²⁰Bíin in náachcunt ti' te'ex le j sáako'ob j xaman u taalo'obo', bíin in tojolch'into'ob, ca xi'ico'ob te x tocoy lu'umo'. U aj canano'ob cu bin táanilo' bíin in bulo'ob ichil quimen ka'anab; u aj canano'ob cu taalo'ob paachilo' bíin in bulo'ob ichil noj ka'anab, u wíinclilo'obe' bíin tu'uchajaco'ob yéetel bíin tu' boocchajaco'ob. ¡Bíin in beet nucuch ba'alo'ob!

²¹Lu'um, sen qui'imacchajac a wóol, ma' a ch'a'ic sajaquil, tumen Yuumtzile' bíin u beet nucuch ba'alo'ob.

²²U ba'alche'ile'ex káax ma' a ch'a'ique'ex sajaquil, tumen le su'uco'obo' bíin u ca'a ya'axaco'ob, le che'obo' bíin u dza'ob u yicho'ob, bey xan bíin yanac sen ya'ab higo yéetel uva.

²³¡Qui'imacchajac a wóole'ex, u cajnáalile'ex Sión, qui'imacchajac a wóole'ex ti' Yuumtzil a Kuex! Leti'e' tu dzaj ti' te'ex káaxalbil ja', tu súutuquil kabéetchajic, u káaxalbil u ja'ilo'ob ja'aja'al yéetel que'elil, lajquet je'el bix u beetic ca'ache'.

²⁴Bíin anac jun p'éel u ma'alob joochil trigo, sen ya'ab vino yéetel ya'ab aceite.

²⁵Teen bíin in sut ti' te'ex le ba'axo'ob ma' ta náajaltaje'exe' ti' le ja'abo' tu yo'olal le tu kascuntaj le j sáako'obo', le nojoch múuch'ul sáak tin túuxtaj ti' te'exo'.

²⁶Te'exe' bíin janaque'ex tac quéen na'ajchajque'ex, bíin xan a qui'iqui' t'ante'ex Yuumtzil a Kuex, tumen tin beetaj ta wo'olale'ex nucuch jak óol ba'alo'ob. Mix bikin bíin ca'a u pa'ajac u subtal in caajal,

²⁷te'exe', j israelitaex, bíin a kaj óolte'ex, teen Yuumtzil, ti' yanen ta wéetele'exe', teen a Junab Kuex, mina'an u láak a Kuex. ¡Mix bikin bíin suunac u ch'a'ob subtal in caajal!

²⁸Cu dzo'ocol le ba'alo'oba' bíin in wec in pixan tu yóokol tuláacal wíinico'ob: a j xibil paalale'ex yéetel a x ch'upul paalale'ex bíin bóobatnaco'ob tin wo'olal, le nuxibo'obo' bíin wayaknaco'ob, le j táanquelemo'obo' bíin náaynaco'ob.

²⁹Bey xan tu yóokol j palitzilo'ob yéetel x palitzilo'ob bíin in wec in pixan ti' le kiino'obo';

³⁰bíin in we'es tu nak ca'an nucuch jak óol ba'alo'ob, te j lu'umo' ki'ik, káak yéetel u múuyalilo'ob buudz.

³¹Le kiino' bíin éekjoch'e'enchajac, le ujo' bíin p'áatac bey ki'ike', ma'ili' kuchuc u kiinil Yuumtzile', lela' jun p'éel nojoch kiin yéetel sajbe'entzil.

³²Ba'ale' tuláacal le máaxo'ob bíin u payalchi'ito'ob u kaaba' Yuumtzile' bíin u tocuba'ob ti' quíimil, tumen tu pu'uquil Sión, ti' u caajil Jerusalén, ti' bíin ti'anac tocsajili', je'el bix tu séeb chi'itilac Yuumtzile'. Le máaxo'ob tu yéeyajo' bíin p'áataco'ob tu yéetel cuxtal.