Read Yucateco Joel 3 Bible Online

Joel 3 - Yucateco bible

Joel 3

¹Le quéen kuchuc u súutuquile' cu ya'alic Yuumtzil, bíin in beet u kexpajal ba'ax cu taal u kiinil ti' Judá yéetel ti' Jerusalén.

²Bíin in much'quint tuláacal le múuch' caajo'obo', u ti'al in bisico'ob tu táax kóom lu'umil Josafat te'elo' ti' bíin in p'is óolto'ob tu yo'olal ba'ax tu beetajo'ob ti' in caajal Israel. Tumen tu ki'itbesajo'ob le j israelitaob ti' tuláacal yóokolcaab, ca tu t'oxajo'ob in lu'umil tu baatzilo'ob.

³Bulbil tu t'oxláantajo'ob in caajal, tu conajo'ob mejen j xibil paalal yéetel mejen x ch'úupalo'ob, cu dzo'ocole' tu xupajo'ob u taakinil ti' vino yéetel ti' x cáacbachilo'ob.

⁴¿Ba'ax a káate'ex ti' teen Tiro, Sidón yéetel Filistea? ¿A káate'ex a sute'ex kaas ti' teen? ¿A káate'ex ca bo'ota'ac ti' te'ex wa ba'ax? ¡Séeba'an túun bíin in dzáa le ba'ax ca najmaltique'exo'!

⁵Te'exe' ta wocoltaje'ex in plata yéetel in oro, ca ta bisaje'ex in ayikalil ta kulnaje'exo'ob.

⁶Ta bisaje'ex náachil u cajnáalilo'ob Judá, u cajnáalilo'ob Jerusalén, ca ta conaje'exo'ob bey palitzilo'ob ti' le j griego'obo'.

⁷Ba'ale' tene' bin in ca'aj in jóokeso'ob tu cúuchil tu'ux ta conaje'exo'ob, bin in ca'aj xan in beet ca a mukyajte'ex láili' le ba'ax tu mukyajtajo'obo'.

⁸Bíin in con a j xibil paalale'ex yéetel a x ch'upul paalale'ex ti' le judióbo' u ti'al xan ca u cono'ob ti' le j sabeob, u cajnáalilo'ob náach lu'um. Teen Yuumtzil, tin wa'alaj.

⁹Ka'ayte'ex ti' le múuch' caajo'obo': ¡Nu'ucbese'ex le quili'ich ba'atelo'! ¡T'ane'ex le xiixib máaco'obo'! ¡Talaco'ob ca xíimbalnaco'ob le aj ba'atelo'obo'!

¹⁰Ca u beeto'ob tadz máascab yéetel u x páanab lu'umo'ob, bey xan u julte'ob yéetel u lóobche'ob, le máax luba'an u muuke' ca u ya'ale': ¡Tene' jach yaan in muuk'!

¹¹Tuláacale'ex u cajnáalile'ex le caajo'ob naadzo'obo', tu séeblaquil, ¡co'ote'enex a much'aba'ex! ¡Tac le máax ma'atech u ba'atele' bíin suunac aj ba'atel!

¹²U nu'ucbesuba'ob le caajo'obo' ca talaco'ob tu táax kóom lu'umil Josafat, tumen ti' cu bin u p'is óolt Yuumtzil tuláacal le caajo'ob naadzo'obo'.

¹³Tumen tuláacalo'obe' loolob máaco'ob, xote'exo'ob bey trigo dzo'oc u yiijtale', tumen u kiinil jooch; puch'e'exo'ob bey uvae', tumen dzo'oc u p'iistal u ti'al u beeta'al le vinoo'.

¹⁴Yaan nucuch múuch'ulo'ob tu táax kóom lu'umil Éejemcunaj, tumen dzo'oc u náadzal u kiinil Yuumtzil.

¹⁵Kiin yéetel uje' cu yéekjoch'e'entalo'ob, le eeko'ob xano' cu p'áatal ma' tu léembalo'ob.

¹⁶Yuumtzile' le quéen u beet u yu'uba'al u t'aan bey u léembal cháac líikbal tu witzil Sión, yéetel Jerusalene', ca'an yéetel lu'ume' cu quiquilanquilo'ob. Ba'ale' Yuumtzile' jun p'éel ma'alob ta'acbesaj u ti'al le j israelitaobo', máaxo'ob u caajal.

¹⁷Te'exe' bíin a kaj óolte'ex, teen Yuumtzil, a Kuex, caja'anen Sión, in quili'ich witzil. Jerusalene' bíin suunac jun p'éel quili'ich caaj: mix bikin bíin suunac ch'a'abil tumen táanxel caajilo'ob.

¹⁸Ti' le kiino', vino yéetel leche bíin áalcabnaco'ob beyo'ob ja' tu yóokol witzilo'ob yéetel tu yóokol múulo'ob, u t'o'ol ja'ilo'ob Judae' bíin u biso'ob ya'ab ja'. Tin kulnaje' bíin tuulnac jun p'éel sayab ja'i' bíin jóoyabt u táax kóom lu'umil Sitim.

¹⁹Egiptoe' bíin p'áatac x lab caajil, Edome' bíin suunac x tocoy lu'umil, tumen líiko'ob ti' u cajnáalilo'ob Judá yéetel tu lu'umile' we'ec u ki'ikel j ma' si'ipilo'ob.

²⁰Teen bíin in sut le quíimil ti'ob; ma' bíin in sa'ats le máax si'ipo'. Ba'ale' Judá yéetel Jerusalén mantadz cu bin yantal u cajnáalilo'ob, teen Yuumtzile', bíin cajlaquen tu witzil Sión.