Read Yucateco Amós 1 Bible Online

Amós 1 - Yucateco bible

Amós 1

¹Lela' leti' le péectzil j dzaab ti' Amós, jun túul aj canan j taman tu chan caajil Tecoa, tu kamaj ti' Ku tu yo'olal Israel, ca'a p'éel ja'ab ma'ili' quíilbanac le lu'umo', tu kiinilo'ob Uzías, u ajawil Judá, yéetel tu kiinilo'ob Jeroboam u paal Joás, u ajawil Israel.

²Le quéen u beet Yuumtzil u yu'uba'al u t'aan bey u juum u quíilbal cháaque' likbal tu pu'uquil Sión, tu caajil Jerusalén, u lu'umilo'ob le ya'ax su'uco' cu tijilo'ob cu chuchultal xan tu ca'anal jo'ol lu'umil Carmelo'.

³Bey u ya'alic Yuumtzila': Le j Damascoilo'obo' dzo'oc u beetico'ob ya'abcach loob ma' bíin p'áatac x ma' jaadzilo'obi'; tumen tu p'u'up'u'cha'ajo'ob le j Galaadilo'obo' bey u p'u'uchul nal ti' ca'anche'e' u ti'al oxo'ontbile'.

⁴Le t o'olale' bíin in tóoc u jalach naj Hasael, le káak bíin tóoquic u jalach najilo'ob Ben-hadad.

⁵Bíin in je'ekabt yéetel muuk u jool najilo'ob Damasco; bíin in xu'uls le máax cu ajawil Bicat-avén bey xan le máax cu méektáan tu caajil Bet-edeno', le j siriobo' bíin bisa'aco'ob kala'ano'ob tac Kir. Yuumtzil a'alic.

⁶Bey u ya'alic Yuumtzila': Le j Gazaobo' dzo'oc u seten beetico'ob ya'abcach loobo'ob le t o'olalo' ma' bíin in p'áato'ob x ma' jaadzi'; tumen tu bisajo'ob palitzilil tuláacal jun p'éel caaj ca tu conajo'ob ti' Edom bey u co'onol palitzile'.

⁷Le t o'olale' bíin in tóoc u tuulumilo'ob Gaza, le káako' bíin u ch'éejs u jalach najilo'ob.

⁸Bíin in xu'uls le máax cu ajawiltic Asdod bey xan le máax cu méektáan tu caajilo'ob Ascalono'. ¡Yéetel tuláacal in páajtalile' bíin in pulinbáa tu yóokol Ecrón, tac u dzooc j filisteo bíin quíimic! Yuumtzil a'alic.

⁹Bey u ya'alic Yuumtzila': Le j Tiroilo'obo' dzo'oc u beetico'ob ya'abcach loob le t o'olale' ma' bíin in p'ato'ob x ma' jaadzili' tumen tu kubajo'ob tu kab Edom u ti'al palitzilil, ti' tuláacal jun p'éel caaj yéetel máaxo'ob u beetmajo'ob jun p'éel u nup t'aanil sucu'untzil.

¹⁰Le t o'olale' bíin in tóoc u tuulumilo'ob Tiro, le káako' bíin u nac káakt u jalach najilo'ob.

¹¹Bey u ya'alic Yuumtzila': Le j Edomilo'obo' dzo'oc u beetico'ob ya'abcach loobo'ob ma' bíin in p'ato'ob x ma' jaadzili'; tumen u machmajo'ob u táadz máascabo'ob x ma' ch'a'a óotzilil, tu ch'a'apachtajo'ob le j israelitaob u láaktzilo'ob. Ma' j cóomchaj u yóolo'ob u kuuxilo'ob yéetel u ch'a'ap'ectico'obi'.

¹²Le t o'olale' bíin in tóoc Temán, u káakile' bíin u nac káakt u jalach najilo'ob Bosra.

¹³Bey u ya'alic Yuumtzila': Le Amonilo'obo' dzo'oc u beetico'ob ya'abcach loob ma' bíin in p'ato'ob x ma' jaadzili'; tumen tu yo'olal u nojochquintico'ob u lu'umo'obe', tu je'ajo'ob u jobnel le co'olelo'ob yo'omchaja'ano'ob cajnáalo'ob tu caajilo'ob Galaado'.

¹⁴Le t o'olalo' bíin in tóoc u tuulumilo'ob Rabá, le káako' bíin u nac káakt u jalach najilo'ob ichil u yawatilo'ob ba'atel yéetel u quíilbal u cháaquil chac ikal.

¹⁵U ajawe' bíin xi'ic cajtal táanxel x tocoy lu'um, pa'ate' yéetel tuláacal le máaco'ob jach kabéeto'obo'. Yuumtzil a'alic.