Read Yucateco Amós 2 Bible Online

Amós 2 - Yucateco bible

Amós 2

¹Yuumtzile' cu ya'alic: Le j moabitaobo' dzo'oc beetico'ob ya'abcach loobo'ob le t o'olale' ma' bíin in p'ato'ob x ma' jaadzili'; tumen tu tóocajo'ob u baaquelo'ob u ajawil Edom p'is tu suuto'ob ta'anil káake'.

²Le t o'olale' bíin in tóoc u cajtalilo'ob u lu'umil Moab, le káako' bíin u nac káakt u jalach najilo'ob Queriot; ichil u yawatilo'ob ba'atel yéetel u juum jóopsaj paaxilo'obe', le j moabitaobo' bíin quíimico'ob.

³¡Bíin in lukes le ajaw ti' le caajo'; bíin in quíims, pa'ate' yéetel u nuuquilo'ob! Yuumtzil a'alic.

⁴Yuumtzile' bey u ya'alica': Judailo'obe' dzo'oc u beetico'ob yaabcach loobo'ob ma' bíin in p'ato'ob x ma' jaadzili'; tumen ma' tu éejemtajo'ob in ca'anbesajo'ob Yuumtzili' mix tu yu'ubajo'ob u a'almaj t'aano'obi', ba'ale' tu kultajo'ob láili' le beetbil kuob le kultajo'ob ca'ach u taataobo'.

⁵Le t o'olale' bíin in t'ab u caajil Judá, le káako' bíin u tóoc u jalach najilo'ob Jerusalén.

⁶Bey u ya'alic Yuumtzila': Le j israelitaobo' dzo'oc u beetico'ob ya'abcach loobo'ob, ma' bíin in p'ato'ob x ma' jaadzili'; tumen cu conico'ob tu yo'olal taakin le j ma' si'ipilo' le máax óotzilo' cu conico'ob tu yo'olal jun dzáam xanab.

⁷Cu yedzico'ob yéetel cu pajico'ob u subtal le óotzilo'obo', ma' tu yóoltico'ob u beeto'ob ba'ax no'oja'an tu yo'olal j caabal óolo'obo'. Taatatzil bey xan u paale' cu chitalo'ob yéetel jun túulil x co'olel, beyo' cu manba'alcuntico'ob in quili'ich kaaba'.

⁸Cu jaytalo'ob tu yóokol nooko'ob tu kamajo'ob tu yo'olal páayil, táan u jaantico'ob janalo'ob kuba'an ti' le beetbil kuob; cu manico'ob vino yéetel u taakinil u bo'olal si'ipil ti' j ma' si'ipil, u ti'al u yuko'ob tu kulnaj u ku.

⁹Ba'ale' tene' u ti'al in je'ic bej a ti'ale'exe' ca yanchaj in ch'éejsic le j amorreobo', tin ch'éejsajo'ob jun puli', quex tumen ca'analo'ob je'el bix kulche'ob yéetel mu'uka'ano'ob je'el bix le béeco'obo'.

¹⁰Ba'ale' te'exe' tin jóokesaje'ex tu lu'umil Egipto, ca tin nu'uctaj a beele'ex cuarenta ja'abo'ob te x tocoy lu'umo' u ti'al ca in dzáa ti' te'ex u lu'umo'ob.

¹¹Israelita'ex tu páajtal a ma' jajcuntique'ex, wa ma' tin líiksaj wa jay túul aj bóobato'ob u láak nazareob. Yuumtzil j a'ale.

¹²Ba'ale' te'exe' ta dzaje'ex vino u yuko'ob le j nazareobo', ta wet'aje'ex xan ti' le aj bóobato'ob u t'aanaco'ob tin kaaba'.

¹³Wa beyo', teen xane' bíin in beet u yéech'bal le lu'um tu yáanal a wooque'exo', je'el bix u yep'ech jun p'éel bolan chuup yéetel trigoe'.

¹⁴Quex buca'aj ca áalcanaco'obe' ma' bíin u jecho'obi'; le asab mu'uka'ano' bíin mina'anchajac u muuk, ma' bíin u tocubáa mix le jach j xiixib máaco'.

¹⁵Le aj p'úunche'o', ma' bíin u tocujubái' mix séeba'an u yáalcabo', mix le cu púudzul ti' tzíimino'.

¹⁶Ti' le kiino', tac le jach xiixib aj ba'atelo'ob bíin u p'at u nu'uculo'ob u ba'atel u ti'al ca páatac u púudzul. Yuumtzil a'alic.