Read Yucateco Amós 3 Bible Online

Amós 3 - Yucateco bible

Amós 3

¹Israelitaex, u'uye'ex ba'ax cu ya'alic Yuumtzil ti' le caaj tu jóokesaj tu lu'umil Egipto:

²Chéen te'ex tin yéeyaje'ex ichil tuláacal u caajilo'ob lu'um. Le t o'olal bíin in káat ti' te'ex ca cáante'ex ti' teen tuláacal le loobo'ob dzo'oc a beetique'exo'.

³Wa ca'a túul cu nupicuba'ob j xíimbale', lelo', tumen dzo'oc u tucultico'ob bey cu bino'ob j xíimbalo';

⁴wa león cu yáacam te j káaxo', tumen dzo'oc u dzoon; wa u chichnil cu looc u caal ichil le áactuno', lelo' tumen dzo'oc u chuquic wa ba'ax;

⁵wa jun túul ch'íich' cu lúubul j lu'ume', lelo' tumen yaan ca'ach jun p'éel léech; wa jun p'éel léech cu síit' j lu'ume', lelo', tumen yaan ba'ax tu léechtaj;

⁶wa cu juum u jóopsbil paaxil ba'atele' cu ja'akal u yóol caaj, wa ba'ax yaan kaas cu yúuchul ich caaje', lelo', tumen Yuumtzil tu ya'alaj ca úuchuc.

⁷Mix jun téen cu beetic wa ba'ax Yuumtzil wa ma' tu dzáic ojéeltbil tumen u palitzilo'ob le aj bóobato'obo'.

⁸¿Máax ma' tu quiquilaanquil tu yo'olal sajaquil, wa cu yáacam le leóno'? ¿Máax ma' tu t'aan tu kaaba' Yuumtzil, wa leti' a'alic ca t'aanac?

⁹Ka'ayte'ex tu jalach najilo'ob Asdod bey xan tu jalach najilo'ob Egipto: Co'otene'ex tu pu'uquilo'ob Samaria; ile'ex le x wo'oquin yaan tu yóokolo' ile'ex xan le meyaj loobo'ob cu mukyajta'al te'elo'.

¹⁰Yuumtzile' cu ya'alic: Leti'obe' ma' u yojelo'ob u beeto'ob ba'ax tu beeli'; u ta'acbesmajo'ob tu jalach najo'ob le ba'ax tu yocoltajo'ob yéetel meyaj loobo'.

¹¹Bey túuno', Ku Yuumtzile' cu ya'alic: Jun túul aj p'eeque' bíin u súut pacht le caajo'oba', bíin u jen a tuulumil, bíin xan oocolnac ta jalach najilo'ob.

¹²Bey u ya'alic Yuumtzila': Je'el bix jun túul aj canan cu toquic tu chi' león ca'a dzíit ooco'ob wa jun chan xéet' u xiquin j tamane', bey bíin úuchuc ti' le israelitaob caja'ano'ob Samaria, le quéen púudzuco'obo' le máaxo'ob cu chitalo'ob ti' u co'ocoj káanche'ilo'ob Damasco.

¹³Yuumtzil, Ku yaan tuláacal páajtalil ti'e' cu ya'alic: Te'exe' u'uye'ex, taque'ex u pool u caajil Jacob.

¹⁴Tumen le kiin quéen in wa'al ti' Israel ca u cáant u kebano'obe', bíin in xiixcunt u multuunilo'ob kultaj tu caajil Betel; u baaco'ob le u multuunil kultajo' bíin ch'a'acaco'ob, bíin lúubuco'ob j lu'um.

¹⁵Bíin in jen u najilo'ob u kiinilo'ob que'el, bey xan u najilo'ob yáax kiin, bíin in ch'éejs le najilo'ob marfil u ca'ajo'obo' bíin in p'at x caajil le nucuch jalach najo'obo'. Yuumtzil a'alic.