Read Yucateco Amós 4 Bible Online

Amós 4 - Yucateco bible

Amós 4

¹U'uye'ex lela' u xunáan co'olelile'ex Samaria, máaxe'ex ca yedzique'exo'ob le óotzilo'obo', yéetel ca loobiltique'exo'ob le máaxo'ob yaj yanilo'obo', ca wa'alique'ex ti' a wíichame'exo'obe' ca u taaso'ob vino' u ti'al a wuke'ex.

²Ku Yuumtzil tu yo'olal u quili'ichile' tu jalach t'aantaj: Táan u taal kiino'ob bíin jíilta'aque'ex yéetel jookob u ti'al a bisa'ale'ex, a paalale'exe' bíin jokobta'aco'ob yéetel x lu'utzubo'ob.

³Bíin tzola'an jóokoco'ob ti' nu'ut' joolo'ob, u ti'al a wáalcabansa'ale'ex tu káaxilo'ob Ermón. Yuumtzil a'alic.

⁴Xeene'ex Betel, xeene'ex xan Gilgal: ¡kebancuntaba'exi', ya'abcunte'ex a j ma' u'uyaj t'aanile'ex! Bise'ex a quíimsbil ba'alche'ob tu ja'atzcabil bise'ex xan a diezmo'ex amal óox p'éel kiin.

⁵Tóoque'ex waajo'ob ma' paji' bey u ti'ibil óolalil a nib óolale'ex, ka'ayte'ex tuláacal tu'ux u junal óolalil ti'ibil óolal, bey tumen leti' utz ta t'aane'exo'. Yuumtzil a'alic.

⁶Tene' tin beetaj a mukyajtique'ex wi'ij ti' tuláacal a noj caajile'ex; tene' tin beetaj u mina'antal janal ti' tuláacal a cajtalile'ex, ¡ba'ale' te'exe ma' ta caxtene'exi'! Yuumtzil a'alic.

⁷Bey xan tin beetaj u jáawal u káaxal cháac óox p'éel winalo'ob u bin u yiijtal u nalil le coolo'obo'. Ti' jun p'éel caaje' tin beetaj u káaxal cháac, ti' u láake' ma'; ti' jun p'éel coole' j káax cha'aqui', tu láak coole' tiji' tumen mina'anchaj ja'i';

⁸ti' cajal caaj cu bin ca'ach le máaco'ob u caxanto'ob ja'o', ba'ale' le dze'edzec tu caxtajo'obo' ma' tu máansaj u yukajilo'obi', ¡ba'ale' te'exe' ma' ta caxtene'exi'! Yuumtzil a'alic.

⁹Tin jadzaje'ex Yéetel choco' iiko'ob bey xan yéetel báan quíimil, tin beetaj u chuchultal a pakale'ex bey xan u pakal uvaex, le sáako'obo' tu jaantajo'ob le x ko'ocho' yéetel le olivo'obo', ¡ba'ale' te'exe' ma' ta caxantene'exi'! Yuumtzil a'alic.

¹⁰Tin túuxtaj ta wóokole'ex jun p'éel báan quíimil je'el bix le tin túuxtaj tu yóokol Egiptoe'; tin beetaj u quíimilo'ob u j táanquelem paalalo'ob tu'ux cu yúuchul ba'atel, tin cha'aj xan ca cha'abac u tzíimino'ob tumen u aj p'eeco'ob; tin beetaj a wu'uyique'ex u booc le quimeno'ob te tu cúuchil tu'ux je'ele'exe', ¡ba'ale' te'exe' ma' ta caxantene'exi'! Yuumtzil a'alic.

¹¹Tin xu'ulsaje'ex yéetel jun p'éel báan quíimil je'el bix le tin túuxtaj tu yóokol Sodoma yéetel gomorrae'; p'áato'ob beyo'ob jun p'éel chúuc jóokesa'an ichil káake', ¡ba'ale' te'exe' ma' ta caxantene'exi'! Yuumtzil a'alic.

¹²Le t o'olale' Israel, bin in ca'aj in beet bey xan ta wéetelo'; tu yo'olal yaan in beetique', ¡nu'ucbesabáa u ti'al a nactáanticabáa yéetel a Ku!

¹³Yuumtzil, máax cu beetic nucuch pu'uco'ob, beetic xan le iiko', máax cu dzáic kaj óoltbil tumen wíinic le ba'ax yaan tu tuuculo', máax cu sutic éekjoch'e'enil le sáasilo', máax cu xíimbaltic u asab ca'anlil le lu'umo', Yahveh u Kuil tuláacal páajtalil, leti' u kaaba'o'.