Read Yucateco Amós 5 Bible Online

Amós 5 - Yucateco bible

Amós 5

¹Israelita'ex u'uye'ex in t'aano'ob; táan óolte'ex le áacam okol quin kayic iquil in taquic a poole'ex:

²Le x qui'ichpam yéetel x ma' si'ipil Israele' dzo'oc u lúubul; j lúub u ti'al ma' u ca'a líikil. J p'áat tudztal tu yóokol u lu'umil, mina'an mix máac u ti'al líiksic.

³Bey u ya'alic Ku Yuumtzil ti' le j israelitaobo': Wa jun p'éel noj caaj cu túuxtic mil wíinico'ob j ba'atele', chéen cien bíin suunaco'ob cuxa'ano'obi'; wa jun p'éel noj caaj cu túuxtic ciene', chéen diez bíin suunaco'obi'.

⁴Bey cu ya'alic Yuumtzil ti' le j israelitaobo': Caxtene'ex u ti'al ca cuxlaque'ex.

⁵Ma' a bine'ex Betel, ma' a bine'ex Gilgal mix a máane'ex Beerseba, tumen Gilgale' ma' bíin jech u bisa'al táanxel lu'umil, yéetel Betele' x lab caaj bíin p'áatac.

⁶Náadzene'ex ti' Yuumtzil, beyo' bíin cuxlaque'ex; wa ma' beyo' leti'e' bíin u túuxt káak tu yóokol u ajawil Israel, ma' bíin yanac túun tu caajil Betel máax tupiqui'.

⁷¡Yaj a wanile'ex, tumen ca sutkesique'ex yaj óolalil le ti'ibil bejil, ca láalique'ex j lu'um le ba'ax no'oja'ano'!

⁸Yuumtzil, máax beet le j tzáab bey xan le noj eeko', le máax xan sutic kiinil le áakabo', cux le kiino' máax beetic u suut jun p'éel éekjo'och'e'en áakab; máax t'anic u ja'il ka'anab u ti'al u wec tu yóokol lu'um; máax beetic u taal ch'éejsajil tu yóokol le tuulumo', dzo'ocole' cu beetic u kuchul tac yóokol le mu'uka'an najo'. Yahveh leti' u kaaba'.

¹⁰¡Yaj a wanile'ex, tumen ca cha'a p'ectique'ex le máax cu t'aan utz tu yo'olal ba'ax no'oja'an, ca p'ectique'ex xan le máax cu jajcuntic ba'ax tu beel!

¹¹Tu yo'olal ca xanabcha'atique'ex le óotzilo' bey xan ca káatique'ex u patanil trigo ti'e', ma' bíin cajlaque'ex ti' le pakilnajo'ob dzo'oc a beetique'exo', mix bíin a wuke'ex u kaab le uva dzo'oc a pakique'exo'.

¹²In kaj óoltmaj a ya'abcach meyaj loobe'ex bey xan a kebane'ex mina'an u xuul: ca yedzique'ex le aj ti'ibil bejo', ca kamique'ex u bo'olal tuus, tu múuch'ul aj p'is óolo'obe' ca beetique'ex u bin kaasil ti' le óotzilo'.

¹³Le t o'olalo', aj ojéelaje' cu maquic u chi', tumen kiino'obo' kaastac.

¹⁴Caxante'ex le utzo', ma' le kaaso', beyo' bíin cuxlaque'ex; bey bíin jaajac le ba'ax ca wa'alique'exo': Yuumtzil, Ku u yuumil tuláacal páajtal ti'e', ti' yaan ta wéetele'exe'.

¹⁵¡P'ecte'ex le kaaso'! ¡yaabilte'ex le utzo'! Jach ma'alob ile'ex ca beeta'ac jach ba'ax tu beel tu múuch'ul p'is óol; beyo' Yuumtzil, Ku u yuumil tuláacal páajtalil ma' xan ca u ch'a'a óotzilil ti' le máaxo'ob j p'áato'ob cuxa'ano'ob tu caajil Israel.

¹⁶Bey u ya'alic Yuumtzil, Ku u yuumil tuláacal páajtalila': Ti' tuláacal kíiwico'obe' bíin u'uya'ac okoli', ti' tuláacal bejo'obe' bíin anac u yawatilo'ob ki'inamil. Le j colnáalo'obo' bíin t'a'anco'ob u ti'al okom óolal, bey le cu meyajo'ob ti' kay quimeno' kaaynaco'ob.

¹⁷Le quéen talaquen in jadzo'obe' ti' tuláacal u cúuchilo'ob paakal uvae' bíin úuchuc okoli'. Yuumtzil a'alic.

¹⁸¡Yaj yanilo'ob le máaxo'ob cu yaayantico'ob ca kuchuc u kiinil Yuumtzil! ¿A wojele'ex bix bíin úuchuc ti' te'ex le kiino'? Bíin béeyac u kiinil éekjoche'enil, ma' u kiinil sáasili'.

¹⁹Bey je'el bix le máax táan u yáalcabansa'al tumen jun túul león ca nactáanta'ac tumen jun túul osoe', wa je'el bix le máax cu yocol tu yotoch ca naclac ti' u pakil cu chi'ibil tumen jun túul caane'.

²⁰Bey, u kiinil Yuumtzile', u kiinil éekjoche'enil, ma' u kiinil sáasili'; u kiinil táaj éekjoche'enil, x ma' sáasilil.

²¹Quin p'ectic yéetel quin kex óoltic le kinbesajo'ob ca beetique'exo'; cu chi'ichnaccuntiquen le qui' óotzil much'tal ca beetique'exo'.

²²Ma' in káat le tóocbil ba'alche' ca kubique'ex ti' in tzicbe'enilo', mix le u ti'ibil óolalil jana'albe'en neeko'obo'; ma' bíin in kam le mejen poloc wacaxo'ob ca kubique'ex quíimsbil u ti'al ca'a bisajbáilo'.

²³¡Náachcunte'ex ti' teen le u juum a kaaye'exo'! ¡Ma' in káat in wu'uy u paax le arpaobo'!

²⁴Ba'ale' ca yáalac le ti'ibil cuxtal bey u yáalal ja'e', bey xan le u beeta'al ba'ax tu beelo' ca béeyac jun p'éel sayab mina'an xu'upul ti'e'.

²⁵Israelitaex, ¿ti' le cuarenta ja'abo'ob ta máansaje'ex te x tocoy lu'umo' ta kubaje'ex wa ti' teen quíimsbil ba'alche'ob wa ti'ibil óolalo'ob?

²⁶Bejela'a' túune', bíin a cuche'ex a ajaw Sicut[1] yéetel u eek Quiyún, u yoochel kuob te'ex beete'.

²⁷Yaan in pulique'ex táanxel lu'umil, náach ti' Damasco. Cu ya'alic Yuumtzil, le Ku yaan tuláacal páajtalil ti'o'. Bey u kaaba'o'.