Read Yucateco Amós 7 Bible Online

Amós 7 - Yucateco bible

Amós 7

¹Je'el le ba'ax tu ye'esaj teen Yuumtzila': Chéen p'el dzo'oquic u chúunic u jóokol le pachal pakalo', le cu beeta'al cu dzo'ocol u joochil u cool ajaw, tin wilaj Yuumtzil táan u beetic u tóop'ol j sáako'ob.

²Le ca tin wilaj táan u xu'usa'al le xíiw tumen le j sáako'obo', tin wa'alaj: ¡Yuumtzil, sa'ates c si'ipili'! ¿Bix bíin u mukyajt a caajal Jacob, wa jach chichan?

³Yuumtzil túune' tu tucultaj ma' u najmal u beetic beyo' ca tu ya'alaj: ¡Lelo' ma' tu bin j úuchul!

⁴Je'el ba'ax tu ye'esaj ti' teen Yuumtzila': Tin wilaj u túuxtic jun p'éel nojoch káak bey jaadze', tu láaj sap'aj le nojoch taamtam ka'anabo', le káako' táan ca'ach xan u tóoquic le káaxo'obo'.

⁵Tene' tin wa'alaj: ¡Yuumtzil beet utz a jáawsic! ¿Bix cu bin u mukyajt a caajal Jacob wa jach chichan?

⁶Yuumtzil túune' tu tucultaj ma' u najmal u beetic beyo': ¡Mix le bíin úuchuco'!

⁷Yuumtzile' tu ye'esaj ti' teen xan lela': Leti'e' ti' yaan ca'ach tu yicnal jun p'éel tuulume', u machmaj ca'ach jun p'éel u p'iis pakbal.

⁸Ca tu káat chi'itaj ti' teen: ¿Ba'ax ca wilic Amós? Ca tin núucaj jun p'éel u p'iis j pakbal. Ca túun tu ya'alaj ti' teen: Yéetel le u p'iis j pakbale' bin in ca'aj in wil bix yanil u tojil u cuxtal in caajal Israel. Ma' bíin in sa'ats tu ca'a teni'.

⁹U quili'ich najo'ob Isaaque' bíin u ju'utuco'ob, u kulnajo'ob Israele' bíin p'áataco'ob chéen jeenel pako'ob. ¡Bíin in líikes in máascab tu yóokol u yotochnáalo'ob Jeroboam!

¹⁰Amasías, u aj kiin Betele' tu túuxtaj a'albil ti' Jeroboam, u ajawil Israel: Amose' táan u máan ichil u cajnáalilo'ob Israel, u ti'al u j mucul t'aan tu yo'olal a Tzicbe'enil. Le múuch' caajo'oba' dzo'oc u náacal u yóolo'ob u yu'ubico'ob le ba'ax cu ya'alico'.

¹¹Tumen táan u máan u ya'ale': Jeroboame' bíin quíimsa'ac yéetel u yej máascab, tuláacal bin u cajnáalilo'ob Israele' bíin bisa'aco'ob táanxel lu'umil.

¹²Dzo'ocole', Amasíase' tu ya'alaj ti' Amós: ¡Aj bóobat tzelabáa waye'! Wa a káat a náajalt a cuxtal yéetel a tze'eque' xeen Judá;

¹³ba'ale' ma' a suut j tze'ec Betel, tumen u quili'ich najil ajaw yéetel u noj kulnaj ajawil.

¹⁴Ba'ale' Amose' tu núucaj ti': Tene' ma' aj bóobateni' mix in tucultmaj in beetiqui'. Tene' quin náajaltic in cuxtal ti' in canantic j tamano'ob yéetel in molic u káaxil higos,

¹⁵ba'ale' Yuumtzile' tu lukesajen ti' in canan j taman, ca tu ya'alaj ti' teen: Xeen ti' in caajal Israel ca t'aanaquech tin kaaba'.

¹⁶Le t o'olale', u'uy u t'aan Yuumtzil. Je'el ba'ax ca wa'alica': Ma' a wa'alic mix ba'al tu kaaba' Ku ca u beet kaas ti' Israel, mix a wa'alic mix ba'al ca u beet kaas ti' u ch'i'ibalo'ob Isaac.

¹⁷Ba'ale' je'el ba'ax cu ya'alic Yuumtzila': A watane' bíin kaschajac chúumuc caaj, a j xibil paalal yéetel a x ch'upul paalale' bíin quíimico'ob tu yej máascab; a lu'umo'obe' bíin t'o'oxoc ich buul; bey xan teech bíin quíimiquech tu lu'umil ma' j ocsaj óolo'ob, le j israelitaobo' bíin bisa'aco'ob kala'ano'ob náach ti' u lu'umo'ob.