Read Yucateco Amós 8 Bible Online

Amós 8 - Yucateco bible

Amós 8

¹Je'el ba'ax tu ye'esaj ti' teen Ku Yuumtzila': Yaan ca'ach jun p'éel u xaaquil takan u yich che',

²leti'e' tu káat chi'itaj ti' teen: ¿Ba'ax ca wilic, Amós? ca tin núucaj: jun p'éel xaac u takan yich che'. Ca tu ya'alaj ti' teen Yuumtzil: Israele' dzo'oc u takantal; ma' bíin in sa'ats tu ca'a téeni'.

³Ti' le kiino' u kaayilo'ob jalach naje' bíin suunaco'ob áacam okolo'ob. Ya'abcach máac bíin quíimic ichil ch'ench'enquil, bíin pu'ulco'ob táancab u quimen wíinclilo'ob. Yuumtzil a'alic.

⁴U'uye'ex lela', te'ex máaxe'ex ca yedzique'ex le j cabal óolo'obo' bey xan ca wóotzicuntique'ex u cajnáalilo'ob le lu'uma';

⁵te'ex máaxe'ex ca wa'alique'ex: ¿Ba'ax tiin quéen máanac u kiinbesajil túumben uj, u ti'al ca páatac c conic le trigoo? ¿Ba'ax kiin quéen máanac sábado u ti'al c conic neeko'ob co'ojo'ob, bey xan ma' c chucbesic u p'iisilo'obi'?

⁶¡Bíin c nakal óotzilcunt le óotzilo'obo' tac quéen u conuba'ob ti' to'on beyo'ob palitzilo'ob u ti'al ca u bo'oto'ob u paaxo'ob, quex chéen ca'a dza'an xanab u p'axmajo'ob! ¡Bíin c con tac u coobil le trigoo!

⁷Yuumtzile' tu jalach t'aantaj tu yo'olal u nojbe'enil Jacob: Mix bikin bíin in tu'ubs le ba'ax ta beetaje'exo'.

⁸¿Ma' wa bíin quíilbalnac le lu'um tu yo'olal tuláacal lelo'? ¿Ma' wa bíin okolnaco'ob tuláacal u cajnáalilo'obi'? ¡Lu'ume' bíin na'acac yéetel bíin éemec, je'el bix u na'acal yéetel u yéemel u ja'ilo'ob le Niloo'!

⁹Yuumtzile' cu ya'alic: Ti'ili'e' kiino' bíin in beet u t'úubul chúumuc kiin, ca'anal yaan kiin quéen in beet u yéekjoche'ental yóokolcaab.

¹⁰Bíin in sut okolil a kinbesaje'ex ti' okol tu yo'olal le quimeno'obo', le kaayo'ob xano' bíin in sut u okom kaayilo'ob mucsaj; bíin in beet a búuquintique'ex u box nookil quíimil, ca kolistaba'ex xan tu yo'olal u chíiculal ki'inamil, Bíin okolnaque'ex je'el bix le máax dzo'oc u quíimil u jun túulili' paale', tuláacal bíin dzo'ococ ichil yaj óolal.

¹¹Yuumtzile' cu ya'alic: táan u taal kiino'ob in túuxtic wi'ij te j lu'umo'; ma' u wi'ijil waaji', mix u yukajil ja'i', ba'ale' u wi'ijil a wu'uyique'ex u t'aan Yuumtzil.

¹²Le máaco'obo' bíin máanaco'ob x ma' beelil, táan u máan u caxto'ob u t'aan Yuumtzil, bíin xi'ico'ob ti' jun p'éel ti' u láak ka'anab, likbal j xaman tac j lakin, ba'ale' ma' bíin u nuptáanto'obi'.

¹³X qui'ichpam ch'úupalalo'ob yéetel j xiixib táanquelemo'obo', ti' le kiino' Mix máac bíin jechic u p'is óolal Yuumtzil.

¹⁴Le máaxo'ob cu jalach t'aano'ob tu yo'olal u beetbil kuob Samariae'; le máaxo'ob cu ya'alico'ob: Pactic ku, óotzlech Dan. Pactic u kuilo'ob Beerseba, bíin lúubuco'ob u ti'al mix bikin u ca'a líikilo'ob.