Read Yucateco Amós 9 Bible Online

Amós 9 - Yucateco bible

Amós 9

¹Tin wilaj Yuumtzil tu tzéel le u multuunil kultaj táan ca'ach u ya'alic ti' teen: Kol u jo'ol yocmalo'ob le kulnajo' tac quéen péecnac u yocmal u jool najilo'ob; ca' lúubuc u xéexet'alo'ob tu yóokol le máaco'obo'. Le máaxo'ob ma' bíin quíimico'obe' bíin in quíimsico'ob yéetel u yej máascab: quex ca u yóolto'ob j púudzule', mix jun túul bíin u jechi';

²quex ca u ta'acbesuba'ob tu taamilo'ob le lu'umo', ti' bíin in jóokeso'obi'; quex ca na'acaco'ob tu ca'analil le ca'ano'obo', ti' bíin in wéenso'obi'.

³Wa cu ta'acbescuba'ob tu ca'analil u pu'uquil Carmeloe', tac xan te'elo', ti' bíin xi'iquen in caxanto'obi'; wa cu ta'acbescuba'ob ti' teen tu taamil le ka'anabo', ti' bíin in túuxt u sajbe'en ba'alche'ilo'ob le ka'anabo', u ti'al ca xi'ico'ob u ti'al j xe'exe'et'bilo'ob tumeno'ob.

⁴Wa ca chu'ucuco'ob j bisbilo'ob táanxel lu'umil tumen u aj p'eeco'obe', bíin in túuxt in x táadz máascab u ti'al ca xi'ic u quíimso'ob. ¡Bíin in ch'ic in paacat tu yóokolo'ob mantadz u ti'al kaas, ma' u ti'al utzi'!

⁵Yuumtzil Ku, u yuumil tuláacal páajtalile', cu péedzkabtic le lu'umo', le lu'umo' cu yíibil, cu yokolo'ob tuláacal u cajnáalilo'ob. Le lu'umo' cu na'acal yéetel cu yéemel, je'el bix u na'acalo'ob yéetel u yéemelo'ob u ja'ilo'ob Niloe'.

⁶Yuumtzile' tu dzaj u cajtalil te j ca'ano', tu dzaj xan u nak ca'an tu yóokol le lu'umo'; leti'e' cu t'anic u ja'ilo'ob le ka'anabo' cu dzo'ocole' cu wequic tu yóokol le lu'uma'. Yahveh, lela' leti' u kaaba'.

⁷Je'el ba'ax cu jach a'alic Yuumtzila': Israelitaex, in ti'al tene' mina'an u jela'anil ichile'ex yéetel le j etiopeobo'. Je'el bix tin taasilaque'ex tu caajil Egiptoe', bey xan tin taasilaco'ob tac Creta le j filisteobo' likbal tu lu'umil Kire' tin taasaj le j Arameobo'.

⁸Yuumtzile' cu pactic le j keban ajawila', cu ya'alic: Bíin in ca'aj in lukes ti' le lu'uma', ba'ale' ma' bíin in láaj xu'uls u yotochnáalo'ob Jacobi'. Teen Yuumtzil, Teen a'alic.

⁹Bíin in ca'aj in wa'al ca líila'ac u yotochnáalo'ob Israel, je'el bix u péecsa'al trigo ti' jun p'éel cháachabe', ma' tu lúubul mix jun p'éel neek te j lu'umo'.

¹⁰Tuláacal u aj kebanilo'ob in caajale' bíin quíimco'ob yéetel u yej máascab; tuláacal le máaxo'ob cu ya'alico'ob: Mix ba'al ti' lelo' bíin úuchuc ti' to'on; le kaaso' ma' bíin u chuco'oni'.

¹¹Táan u taal u kiinil quéen in ca'a líikes u jeenel pasel David. Bíin in mac u joolo'ob, bíin in líikes u x lab pakilo'ob, bíin xan in wutzquiint je'el bix yanil ca'ach ti' le kiino'ob j máanja'ano'obo',

¹²u ti'al beyo' le cu p'áatal ti' Edom yéetel tuláacal le lu'um in ti'al ca'acho', ca'a suunac ti' Israel. Yuumtzile' tu dzaj u t'aanil, bíin u dzo'ocbese.

¹³Cu taal u kiino'ob ma'ili' dzo'ococ u jo'ochol trigoe', u kiinil u t'o'ol bukla'al le lu'umo', ma'ili' dzo'ococ u ye'edzel le uvao', ta'itac u kuchul u kiinil u pa'akal le trigoo. Ti' pu'uco'ob yéetel ti' jo'ol lu'umo'ob bíin áalcabnac le vinoo bey yáalcab ja'e'.

¹⁴Bíin in taas túun in caajal Israel likbal te j lu'umo'ob tu'ux bisa'abo'obo'. Bíin u ca'a líikeso'ob le noj caajo'ob jeeneltaco'obo', u ti'al ca cajlaco'obi'; bíin u pako'ob uva, bíin u yuko'ob vino'; bíin u pako'ob jana'albe'en che'ob u ti'al u jaantico'ob u yich.

¹⁵Tumen bíin in cajcunto'ob láili' tu lu'umo'obe', mix bikin xan bíin suunac lukesbilo'ob ti' u le lu'um tin dzaj ti'obo'. Ku Yuumtzil a'alic.