Read Yucateco Abdías 1 Bible Online

Abdías 1 - Yucateco bible

Abdías 1

¹Bóobatil tu kamaj Abdías ti' Yuumtzil ich náayil. Dzo'oc c u'uyic jun p'éel u péectzil Yuumtzil; jun túul aj bisaj t'aane' dzo'oc u bin te j múuch' caajo'ob u ti'al u ya'alic ti'ob: ¡Xíimbalnene'ex! ¡cone'ex j ba'atelte'ex Edom! Ku Yuumtzile' cu ya'alic ti' Edom:

²Bin in ca'aj in p'eexcuntech ichil le múuch' caajo'obo' yéetel xan in noj pajic a subtal.

³A j ca'anal ichile' tu tusajech. Caja'anech tu cáap le chaway túuno'ob, ca'anal tu'ux caja'anech, le t o'olale' ca tucultique' mix máac cu páajtal u léench'intiquech.

⁴Ba'ale' quex ca xiknalnaquech ca'anal bey jun túul j cóote' yéetel ca a beet a ku' te j eeko'obo', tac ti' bíin in beet ca lúubquecho'. Yuumtzile' cu ya'alic:

⁵Wa ca talaco'ob le j oocolo'ob u yocoltecho'ob yéetel áakabe', ma' bíin u biso'ob tuláacali'; wa ca talaco'ob le j mol uvaobo' bíin u p'ato'ob dze'edzequi'. Ba'ale' a aj p'eeco'obe', mix u meendzulil bíin u p'ato'ob.

⁶¡Esaú, dzo'oc a seen ocolta'al! ¡Dzo'oc u yocolta'al tac u yalab a taakin!

⁷Tuláacal a wéet t'aano'obe' tu tusajecho'ob, ca tu tojolch'itajecho'ob ta lu'um. Tac a wéet bisajba'ob cu beetico'ob ti' teech kaas, a wéet t'aano'ob xane' tu t'inajo'ob léech ta beel. ¡Edome' mina'an u na'at!

⁸Yuumtzile' cu ya'alic: Le quéen in jadz Edome', bíin in xu'uls tuláacal u aj ojéelajo'ob yéetel bíin in lukes le na'ato' ti' máaxo'ob caja'ano'ob te tu ca'anal lu'umilo'ob Esauo'.

⁹U aj ba'atelo'ob Temane' bíin quiquilnaco'ob yéetel saajquil, ti' u ca'anal lu'umil Esaú xane' mix máac bíin p'áatac cuxa'ani'.

¹⁰Bíin pa'ajac a subtal, bíin xu'ulsa'aquech jun puli', tu yo'olal ta loobiltaj yéetel ta quiimsaj a wíidzin Jacob.

¹¹Le ca j taal le aj p'eeco'ob u jáanpayto'ob u ayikalil le caajo', le ca j taal le j táanxel lu'umilo'ob aj ba'atelo'ob u pa'ob u jool najilo'ob Jerusalene', ¡teche' ta dzajabáa jun tzéel! Le ca tu bulo'ob u nu'uculilo'ob u yoocolo'ob yéetel ca tu bisajo'ob u ayikalilo'obe', ¡teche' ta beetaj ba'ax tu beetajo'ob!

¹²Ma' u najmal u qui'imactal a wóol le ca ta wilaj a wíidzin tu kiinil táan u bin kaasil ti'i', mix u najmal u qui'imactal a wóol le ca ta wilaj Judá tu kiinil u yóotzilali', mix u najmal ca'ach che'ejtic u kiinil u yaj óolali'.

¹³Ma' u najmal a wocol ca'ach tin caajal tu kiinil u yaj óolali', mix u najmal ca'ach a che'ejtic tu kiinil u yóotzilili' mix tu kiinil binic kaas ti'i', mix u najmal a wocoltic ca'ach u ayikalil tu kiinil u noj yajili'.

¹⁴Ma' u najmal a wa'atal ca'ach tu xa'ay u bejilo'ob u ti'al a quiims le máaxo'ob cu púudzulo'obo', mix u najmal a kubic ca'ach le j púudzo'ob tu kiinil le yaj óolal.

¹⁵Le ba'ax ta beetaj ti' u láako'obe', bey xan bíin beeta'ac ta wéetelo': ¡bíin a kam ba'ax ca najmatic! Dzo'oc u náadzal u kiinil Yuumtzil u ti'al tuláacal le múuch' caajo'obo'.

¹⁶Je'el bix káajil le ukul ta wukaje'ex tin quili'ich jo'ol lu'umo', bey káajil xan le ukul cu bin j ukbil tumen le u láak múuch' caajo'obo'; bey bíin u yuko'ob jujun xúuchil.

¹⁷Ba'ale' u witzil Sione' bíin béeyac jun p'éel quili'ich cúuchil tu'ux bíin páatac u ta'acbesicuba'ob dze'edzequi'. U ch'i'ibal Jacobe' bíin u ti'alinto'ob u lu'umo'ob tu ca'a téen;

¹⁸u ch'i'ibalo'ob Jacob yéetel u ch'i'ibalo'ob Josee' bíin suunaco'ob káakil, bíin suunaco'ob xan tóoch'bal káakil, u ch'i'ibalo'ob Esaue' bíin suunaco'ob kuuchil kuuch cu bin láaj tóocbil tumen le káako'. ¡Mix jun túul ti' u ch'i'ibal Esaú cu bin u tocubáa! Téen Yuumtzil, teen j a'ale.

¹⁹U israelitailo'ob Négueve' bíin cajlaco'ob tu pu'uquilo'ob Esaú, le j p'aatalo'ob te j táax lu'umo' bíin u ch'a'ob u lu'umilo'ob le j filisteobo'. Bey xan bíin u ch'a'ob u lu'umilo'ob Efraín yéetel u lu'umilo'ob Samaria, le j Benjaminilo'obo' bíin u ch'a'ob xan u lu'umilo'ob Galaad. U nojoch múuch'ul le j israelitaob j bisa'abo'ob táanxel lu'umilo' bíin u ch'a'ob u lu'umilo'ob le j cananeob tac Sarepta, yéetel le Jerusalenilo'ob j palitzilta'ano'ob Sefarado' bíin u ch'a'ob u noj caajilo'ob Néguev.

²¹Bíin na'acaco'ob qui'imac u yóolo'ob tu witzil Sión u ti'al u xot kinto'ob le máaxo'ob caja'ano'ob te tu ca'anal lu'umilo'ob Esaú, Yuumtzil túune' leti' bíin ajawnac.