Read Yucateco Números 10 Bible Online

Números 10 - Yucateco bible

Números 10

¹Yuumtzile' tu t'anaj Moisés ca tu ya'alaj ti':

²Beet ca'a p'éel jóopsaj paaxo'ob yéetel plata póola'an yéetel x bajab, u ti'al ca much'lac le máaco'obo' yéetel u ti'al a dzáic u chíiculal u xíimbalo'ob.

³Le quéen jóopsa'ac tu ca'a p'éelal le paaxo', tuláacal le caajo' unaj u much'tal ta wicnal, tu jool u noj Paselil Much'tal yéetel Ku.

⁴Ba'ale' le quéen jóopsa'ac chéen jun p'éel le jóopsaj paaxo', cu much'tal chéen u nuuquilo'ob u múuch' cajtalil le j otochnáalo'ob.

⁵Wa cu juum le jóopsaj paax yéetel ka'amkach awato'obe', yaan u xíimbalo'ob le j much'lajo'ob j lakino',

⁶le quéen juumnac tu ca'a téene' cu xíimbal le yano'ob j noojolo'. U juum jóopsaj paax pa'ate' yéetel awato'obe' u chíiculal u dzáicuba'ob j xíimbal.

⁷Chéen u juum jóopsaj paax u chíiculal u much'tal máaco'ob.

⁸Le aj kiino'ob u ch'i'ibalo'ob Aarone' leti'ob bíin u paaxo'ob le jóopsaj paaxo'. Lela' jun p'éel a'almaj t'aan u ti'al láaj kiin.

⁹Wa cu taal jun túul aj p'eec u ba'atelt a lu'umile'exe' wa te'ex unaj a bine'ex j ba'atele' jóopse'ex le paaxo' yéetel awatnaque'ex ka'am. Beyo' teen Yuumtzil a Junab Kuexe', ca ka'ajale'ex tene', quin tojque'ex ti' le aj p'eeco'obo'.

¹⁰Paxe'ex le jóopsaj paaxo' le kiin yaan qui'imac óolo', je'el bix le kiin yaan kiin kujil wa yaan túumben ujo', bey xan le quéen a kube'ex láaj tóocbil yéetel quíimsbil ba'alche' u ti'al ca'a bisajbáilo'. Beyo' ca ka'ajle'ex teen. Tene' Yuumtzilen a Junab Kuex.

¹¹U kiinil veinte ti' u ca'a winal ti' u ca'a ja'abe', j luk le múuyal yaan yóokol u quili'ich najil le nup t'aano'.

¹²Le j israelitaobo' jóoko'ob tu x tocoy lu'umil Sinaí ca xíimbalnajo'ob. Le múuyal túuno' je'el tu x tocoy lu'umil Parán.

¹³Je'el bix tu tzolbe'en t'antaj Yuumtzil ti' Moisese',

¹⁴yáax táanil cu jóokolo'ob le aj ba'atelo'ob cu xíimbalo'ob tu yáanal u lacam Judá, u aj nu'uctaj ba'atele' Naasón, u paal Aminadab.

¹⁵Natanael, u paal Zuar, dza'an ca'ach u méektáant u aj ba'atelo'ob u ch'i'ibalo'ob Isacar.

¹⁶Eliab, u paal Helón dza'an ca'ach u méektáant u aj ba'atel u ch'i'ibalo'ob Zabulón.

¹⁷Wa'ach' túun le quili'ich najo', u ch'i'ibal Gersón yéetel Merarie', jóokesa'ano'ob u ti'al bisic, ca tu cúuch queléembaltajo'ob ca jo'op u xíimbalo'ob.

¹⁸Tu paach leti'e' cu bin le aj ba'atelo'ob cu xíimbalo'ob tu yáanal u lacam Rubén, u aj nu'uc ba'atele' Elisur, u paal Sedeur.

¹⁹Selumiel u paal Zurisadai dza'an ca'ach u méektáant u aj ba'atelo'ob u múuch' cajtalil yotochnáalo'ob Simeón.

²⁰Eliasaf u paal Reuel, dza'an ca'ach u méektáant u aj ba'atelo'ob u ch'i'ibalo'ob Gad.

²¹Tu paacho'obe' cu bin ca'ach u ch'i'ibalo'ob Coat, máaxo'ob bisic le quili'ich nu'uculo'ob. Le quéen cóojoco'ob ca'ach le cu taalo'ob paachilo' leti'obe' dzo'oc u wa'acuntico'ob le quili'ich najo'.

²²Cu dzo'ocole' cu xíimbal le u aj ba'atelo'ob yano'ob tu yáanal u lacam Efraino', u nojchile' Elisama, u paal Amiud.

²³Gamaliel u paal Pedasure', dza'an ca'ach u méektáant u aj ba'atelo'ob u ch'i'ibalo'ob Manasés.

²⁴Abidán, u paal Gedeone' dza'an ca'ach u méektáant u aj ba'atelo'ob u ch'i'ibalo'ob Benjamín.

²⁵Tu dzooque', tu paach u láak aj ba'atelo'obe' cu xíimbalo'ob ca'ach tu yáanal u lacam Dan, dza'an ca'ach u méektáantico'obe' Ahieser, u paal Amisadai.

²⁶Pagiel, u paal Ocrán dza'an ca'ach u méektáant u aj ba'atelo'ob u ch'i'ibalo'ob Aser.

²⁷Ahira, u paal Enán dza'an ca'ach u méektáant u aj ba'atelo'ob u ch'i'ibalo'ob Neftalí.

²⁸Lela' leti' u tzoolol xíimbalnajico'ob u aj ba'atelo'ob Israel le kiin cu jóokol u binbalo'obo'.

²⁹Jun p'éel kiine' Moisese' tu ya'alaj ti' u baal Hobab, u paal Reuel j madianil: To'one' ti' c bin te j lu'um u séeb chi'itmaj Yuumtzil u dzáic to'ono'. Co'oten t éetel je'el c bisicbáa utz ta wéetele', tumen Yuumtzile' u séeb chi'itmaj u yaacuntic Israel.

³⁰Ba'ale' Hobabe' tu núucaj ti': ma', tene' in káat suut tin lu'um tu'ux yaan in láako'ob.

³¹Moisés tu sen a'alaj ti' ma' a bin. Teche' a kaj óol ma'alob le tu'ux cu páajtal u yúuchul je'elel te x tocoy lu'umo', yéetel cu páajtal a we'esic to'on tu'ux je'el u páajtal c bine'.

³²Wa ca taal t éetele' je'el c muulan ti'alintic ta wéetel tuláacal u ma'alobil le ba'ax bíin u dzáa to'on Yuumtzilo'.

³³Bey túuno', j bino'ob tu pu'uc Yuumtzil ca xíimbalnajo'ob óox p'éel kiin. Tu táan leti'obe' cu bin u ba'asche'il u Nup t'aan Yuumtzil, u ti'al u caxtic tu'ux u je'elelo'ob

³⁴yéetel kiine' chéen p'el u jo'op'ol u bino'obe', u múuyal Yuumtzile' ti' yaan tu yóokolo'obe'.

³⁵Chéen p'el u bin le ba'asche'o' Moisese' cu ya'alic: ¡Líiken Yuumtzil! ¡Ki'itpajac a aj p'eeco'ob! ¡Le quéen u yilecho'obe' púudzuco'ob le aj p'eeco'obo'!

³⁶Ba'ale' le quéen jáawac u bin le ba'asche'o', cu ya'alic Moisés: ¡Yuumtzil bejela'e' suunen, ti' u ya'abcach aj ba'atelo'ob Israel!