Read Yucateco Números 11 Bible Online

Números 11 - Yucateco bible

Números 11

¹Jun p'éel kiine' le j israelitaobo' jo'op' u ya'alico'ob ba'al ti' Yuumtzil, tu yo'olal le talam kiino'ob táan u máano'obo'. Le ca j u'uya'abo'obe', Yuumtzile' sen kuuxilnaji let o'olale' tu pulaj káak ca tu t'abaj u bakpach le x péet caajo'.

²Le caaj túuno' awatnaji, táan u káatico'ob áantaj ti' Moisés, Moisese' payalchi'inaj tu yo'olalo'ob ti' Yuumtzil. Le káak túuno' j tu'upi.

³Le t o'olale' le cúuchilo' tu kaaba'intaj Tabera, tumen te'elo' u káak Yuumtzil jóopnaj tu yo'olalo'ob.

⁴Ichil le j israelitaobo' u xa'akbesmajuba'ob jejeláas máaco'ob chéen janal cu tucultico'ob. Le j israelitaobo' tu cha'ajo'ob u jíilta'alo'ob tumeno'ob ca j jo'op' u yokolo'ob táan u ya'alico'ob: ¡Quexi' wa yaan bak u ti'al c jaante'!

⁵¡Cu ka'ajal to'on le cay cu sibil u ti'al c jaant, ti'ano'on ca'ach Egiptoe'! bey xan c jaantic pepino'ob, melono'ob, puerro'ob, cebollaob yéetel ajos.

⁶Ba'ale' bejela'e' táan c quíimil yéetel wi'ij, mix u láak ba'al c ilic chéen maná.

⁷(Le maná ca'acho' bey u neek cilantroe' kankane', bey yiitz wa ba'axe',

⁸u qui'ile' bey piimpiim waaj xa'akbesa'an yéetel aceitee'. Le cajnáalo'obo' cu jóokol ca'ach u molo'ob, cu dzo'ocole' cu juch'ico'ob wa cu mamaxtuuntico'ob, cu kéelico'ob wa cu máakantico'ob bey waaje'.

⁹Yéetel áakab le quéen káaxac p'uulja' tu yóokol le péet caajo', cu káaxal xan le manáo'.)

¹⁰Moisese' tu yu'ubaj u yokol le israelitaob yéetel u láaktzilo'obo' tu jool u paselo'ob. Yuumtzile' jach kuuxilnaj yéetelo'ob. Moisese' kuuxilnaj xan,

¹¹ca tu ya'alaj ti' Yuumtzil: ¿Wa a palitzilene' ba'axten ca beetic teen beyo'? ¿ba'ax quin beetic teech iquil ta dzajilac in cuch le caaja'?

¹²¿Teen wa u taataob wa u maamaob u ti'al ca a wa'al ti' teen ca in biso'ob méekbil, bey mejen paalal táan u chu'ucho'ob, ti' le lu'um ta séeb chi'itaj ti' u taataobe'?

¹³¿Tu'ux bíin in ch'a'a bak u ti'al in dzáic u jaant tuláacal le máaco'obo'? okolnac u taalo'ob u ya'alo'ob teen: Dza'ob ti' to'on bak u ti'al c jaante.

¹⁴Tene' ma' tu páajtal in bisic le caaj tin juunalo'; jun p'éel cuuch seten aal in ti'al.

¹⁵Wa bey a beetic tin wéetelo', quin káatic teech ca lukes in cuxtal, wa tu jaajil a yaabiltmen; beyo' ma' tin wilquinbáa ichil talam ba'alo'ob.

¹⁶Yuumtzile' tu núucaj ti': Much'quint teen setenta u nuuquilo'ob le israelitaobo', le máaxo'ob a wojel yaan páajtalil ti'ob tu yóokol le caajo', taaso'ob tu noj Paselil Much'tal ca u pa'ateno'ob ta wéetel te'elo'.

¹⁷Tene' yaan in wéemel u ti'al in t'aan ta wéetel te'elo', yaan in cha'ic jun jaatz le pixan yaan ti' techo', u ti'al in dzáic ti' leti'ob u ti'al ca u yáantecho'ob a bis u cuuch le caaja'. Beyo' ma' bíin p'ataquech ta juuni'.

¹⁸Cu dzo'ocole' túuchi'it le caaj ca u beeto'ob u p'áatalo'ob utz u ti'al sáamal, bíin u jaanto'ob bak. Dzo'oc in wu'uyic u yokolo'ob táan u ya'alico'ob: ¡Quexi' wa yaan bak u ti'al c jaante! ¡ma'alob ca'ach yanilo'on Egipto! Ma'alob túun bíin in ca'aj in dzáa bak u jaanto'ob,

¹⁹ma' chéen jun p'éel kiini', mix ca'a p'éel, mix cinco, mix diezi', mix veintei'. Ma'.

²⁰Bíin u jaanto'ob bak túulis jun winal, tac le quéen jóokoc tu ni'ob, ca taacchajac u xejo'ob, tumen dzo'oc u tzeliqueno'ob, teen Yuumtzilen le máax yaan chúumuc ti'obo', dzo'oc u yokolo'ob yéetel u ya'alico'ob tin táan: ¿Ba'ax o'olal jóoko'on Egipto'?

²¹Moisés túune' tu ya'alaj: Le caaj cu taal tin wéetelo' seiscientos mil j xiibo'ob cu xíimbalo'ob, ¿ca wa'alic bin in ca'aj in dzáa bak u jaanto'ob túulis jun winal?.

²²¿Tu'ux sen yaan j tamano'ob yéetel wacaxo'ob u ti'al quíimsbil u ti'al tuláacalo'ob?. Quex ca láaj dzáa ti'ob tuláacal u cayil le ka'anabo' ma' tu chúucpajal u ti'al tuláacalo'ob.

²³Ba'ale' Yuumtzile' tu núucaj ti': ¿Ca tucultic jach chichan in páajtalil? bejela'a' can a wil wa je'el u béeytal, wa ma' le ba'ax dzo'oc in wa'alico'.

²⁴Moisese' jóoke' ca tu tzicbaltaj ti' le caajo' le ba'ax dzo'oc u ya'alic Yuumtzil ti'o', tu much'quintaj setenta u nuuquilo'ob le j israelitaobo' ca tu dzajo'ob tu bakpach le Noj Paselo'.

²⁵Yuumtzil túune' j éem ti' le múuyalo' ca t'aanaj yéetel Moisés; cu dzo'ocole' ca tu ch'a'aj jun jaatz le pixan yaan ti' Moiseso' ca tu dzáa ti' le setenta u nuuquilo'obo'. Le ca'aj jéedz le pixan yóokolo'obe', jo'op' u t'aano'ob beyo'ob aj bóobato'obe'; ba'ale' lela' ma' suunaj úuchul tu ca'a te'eni'.

²⁶ca'a túul máaco'obe', jun túule' cu kaaba'intic Eldad le u láak jun túulo' Medad, yéeyabo'ob ca'ach ichil le setentao', leti'obe' ma' j bino'ob ti' le noj Paselo' tumen j p'ato'ob te j caajo'. Quex beyo' yanji' u páajtalil le pixan tu yóokolo'ob, ca jo'op' u t'aano'ob bey aj bóobato'ob tu cajtalilo'obo'.

²⁷Ca túun jóok jun túul xi'ipale' ca j bin u ya'al ti' Moisés; ¡Eldad yéetel Medade' táan u t'aano'ob beyo'ob aj bóobato'ob te j caajo'!

²⁸Josué u paal Nune', chu'unpaj tu táanquelmil u yáantic ca'ach Moisese', tu ya'alaj: ¡Moisés in yuum wet' ti'ob u beetico'ob!

²⁹Ba'ale' j núuca'ab ti' tumen Moisés: ¿Yaj a wóol tin wo'olal? ¡Quexi' wa Yuumtzil ca u dzáa u pixan ti' tuláacal le caaja' ca p'áatac aj bóobato'ob tuláacalo'ob!

³⁰Moisés túun yéetel u nuuquilo'ob Israele' suunajo'ob te j caajo'.

³¹Yuumtzile' tu beetaj u taal te j ka'anabo' jun p'éel iik ca tu taasaj u múuch'cabil beech'o'ob, lúublajo'ob te j caajo' yéetel tu bakpach, tu balaj jun p'éel kiinil xíimbal tu bakpach le caajo' bey jun metro u ca'analile'.

³²Tuláacal le kiin yéetel u áakabil bey xan u láak kiine', le máaco'obo' ma' jáaw u molico'ob le beech'o'obo'. Le máax ma' tu molaj ya'abe', tu molaj diez u múuch'ulo'ob beech'o'ob ca'a tu dzajo'ob tijil tu bakpach le caajo'.

³³Ba'ale' chéen táan u cáajbal u jach'ico'ob le israelitaob u bakel le beech'o'obo', ca j kuuxchaj Yuumtzil, ca tu jaadzo'ob, tu beetaj u quíimil ya'abcach máaco'ob.

³⁴Le beetic dza'ab u kaaba'int le cúuchilo' Kibrot-hataava, tumen ti' j mu'uc le máaco'ob chéen janal cu tucultico'obo'.

³⁵Luk le caaj Kibrot-hataava ca j bino'ob u xíimbalo'ob tac Hazerot, ca j p'ato'ob te'elo'.