Read Yucateco Números 14 Bible Online

Números 14 - Yucateco bible

Números 14

¹Le j israelitaob túuno' jo'op' u yawato'ob, buul áakab tu máansajo'ob táan u yokolo'ob.

²Tuláacalo'obe' jo'op' u ya'alico'ob ba'al kaas tu yo'olal Moisés yéetel tu yo'olal Aarón. Tu ya'alajo'ob beya': ¡quexi' ca quíimico'on ca'ach Egipto wa te x tocoy lu'uma'!

³¿Ba'ax u biilal tu taasilaco'on Yuumtzil te j lu'uma'? ¿U ti'al ca quíimico'on ti' le ba'atelo', yéetel u ti'al ca lúubuco'ob c atano'ob yéetel c paalal tu kab le c aj p'eeco'obo'? ¡asab utz ca suunaco'on Egipto!

⁴ca jo'op' u ya'alico'ob tu baatzilo'ob: ¡Co'one'ex dzáic jun túule' u beet u nojchil u ti'al ca suunaco'one'ex Egipto!

⁵Moisés yéetel Aarone' chinlajo'ob tac u cóojol u táan jo'olo'ob j lu'um tu táan tuláacal le caajo'.

⁶Josué yéetel Caleb, máaxo'ob j bino'ob ca'ach u xakalto'ob le lu'umo', tu ja'ajato'ob u nooko'ob u chíiculal yaj óolal,

⁷ca tu ya'alajo'ob ti' tuláacal le israelitaobo': ¡Le lu'um j bino'on c xakalto' sen ma'alob!

⁸Wa Yuumtzil cu beetic to'on utze', bíin u yáanto'on u ti'al ca oojco'oni' yéetel yaan u dzáic to'on le lu'umo'. Le lu'umo' jun p'éel cúuchil tu'ux cu yáalcab leche yéetel caab bey ja'e'.

⁹Ba'ale' ma' beetique'ex a j ma' u'uyaj t'aanilex ti' Yuumtzil, mix a ch'aique'ex sajaquil ti' u máaquilo'ob le lu'umo', tumen leti'obe' bíin béeyaco'ob jach'bil waaj c ti'al to'one'; leti'obe' mina'an máax áantico'ob, ba'ale' to'one', Yuumtzile' ti' yaan t éetele'. ¡Ma' a ch'a'ique'ex sajaquil!

¹⁰Quex tu ya'alajo'ob beyo', le caajo' u káat ca'ach u muluxtuuntajo'ob. Ca'a túun chíicpaj u nojbe'enil Yuumtzil tu noj Paselil Much'tal, tu táan yich tuláacal le j israelitaobo',

¹¹Yuumtzile' tu ya'alaj ti' Moisés: ¿Ba'ax kiin bíin jáawac u cúulpachcuntiquen le caaja'? ¿Tac ba'ax kiin bíin u ca'a yocsaj óolteno'ob, quex tumen dzo'oc in we'esic le máactzilo'ob ichilo'obo'?

¹²In ca'aj in túuxt jun p'éel báan quíimil u ti'al ma' u najmatico'ob le lu'umo'; ba'ale' ta wéetele' bíin in beet jun p'éel nojoch caaj, asab mu'uka'an caaj ti' leti'ob.

¹³Ba'ale' Moisese' tu núucaj ti' Yuumtzil: Teche' yéetel a páajtalil, ta jóokesaj le caaj tu lu'umil Egiptoo'. Le quéen u yojéelt le j egipciob le ba'ax bíin a beeto',

¹⁴yaan u tzicbaltico'ob ti' u cajnáalilo'ob u lu'umil Canaán. Leti'ob xane' u yu'ubmajo'ob u ya'alal teech bine' Yuumtzil, ti' yanech chúumuc ti' le caaja', ca cha'ic xan a wila'al paaclan ich, yéetel a múuyale' ti' yaan yóokolo'obe'; yéetel kiine' ca bin táanil ti'ob ichil jun p'éel t'o'ol múuyal, yéetel áakabe' ti' jun p'éel t'o'ol káak.

¹⁵Wa ca quíimsic le caaj jun páaquila'; le múuch' caajo'ob u yojelo'ob máaxeche', bíin u ya'alo'ob:

¹⁶Yuumtzile' ma' j páatji u yocsic le caaj te j lu'um je'el bix tu jalach t'antaj u dzáic ti'obo' le beetique' tu quíimsajo'ob te x tocoy lu'umo'.

¹⁷Le t o'olale', Yuumtzil, e'es bejela'e' a nojoch páajtalil je'el bix a séeb chi'itmaje'. Teech a wa'almaje'

¹⁸ma' ta séeb p'u'ujul, sen nojoch a yaacunaj, ca sa'atsic le kasa'anilo' bey xan le j ma' u'uyaj t'aanilo', quex ma' ta p'atic x ma' jaadzil le máax sipa'ano', ba'ale' tu yo'olal u kasa'anil le taataob ca jadzic u paalal, u ya'abilo'ob u x ca'a áabilo'ob yéetel u yóox áabilo'ob.

¹⁹Bey tumen a yaacunaj sen nojocho' sa'ats ti' le caaj u kasa'anilo', je'el bix nojochil u chuca'an a óolal yéetelo'obe' líikul Egipto tac waye'.

²⁰Yuumtzile' tu núucaj: Ma'alob, tene' quin sa'atsico'ob je'el bix ca káatic teno'.

²¹Ba'ale' jach tu jaajil, je'el bix xan teen cuxa'anen, yéetel je'el bix in nojbe'enil u chupmaj tuláacal le lu'uma',

²²mix jun túul le máaxo'ob tu yilajo'ob in nojbe'enil yéetel le máactzilo'ob tin beetaj Egipto bey xan te x tocoy lu'uma', tu túuntaj óoltajeno'ob xan ya'ab u téenel te x tocoy lu'uma', mix xan tu dzo'ocbesajo'ob in tzolbe'en t'aane',

²³ma' bíin u yilo'ob le lu'um tin séeb chi'itaj ti' u máanja'an ch'i'ibalo'obo'. Mix jun túul ti' le tu cúulpachcunteno'obo' bíin u yilej.

²⁴Chéen Caleb in palitzil yanchaj jun óolal jela'an ti'ob, tumen tu yu'ubaj in t'aan yéetel chuca'an óolal. Le t o'olale' yaan in cha'ic u yocol te j lu'um j bin u xakal ilo', u ch'i'ibalo'obe' yaan u cajtalo'ob te'elo'.

²⁵(Le j amalecitaob yéetel le j cananitaob caja'ano'ob te j táax lu'umo'.) Te'exe', sut a paache'ex sáamal xeene'ex te x tocoy lu'umo' tu tojil le chac ka'anabo'.

²⁶Yuumtzile' tu t'anaj Moisés ca tu ya'alaj ti':

²⁷¿Ti' ba'ax kiin bíin jáawac in wu'uyic u sacach t'aano'ob le j kaakas israelitaoba'? Dzo'oc in wu'uyic u kaakas t'aano'ob tin wo'olal.

²⁸Xeen a wa'al ti'ob, teen a'alic beya': Teen, Yuumtzil quin jalach t'antic tin kaaba', bíin in beet u yúuchul te'ex le ba'ax dzo'oc in wu'uyic ca wa'aliquexo'.

²⁹Tuláacal le yaan veinte u ja'abilo'ob le ca j beeta'ab le dzíib kaaba'obo', le máaxo'ob j t'aanajo'ob kaas tin wo'olalo', yaan u quíimilo'ob, u wíinclilo'obe' yaan u p'áatal jayacbal te x tocoy lu'uma'.

³⁰Mix jun túul ti' te'ex bíin ococ te j lu'um in séeb chi'itmaj yaan a cajtale'ex ca'acho', chéen Caleb yéetel Josué.

³¹Ba'ale' a paalalex ta wa'alaje'ex bíin lúubco'ob tu kab aj p'eeco'obe', bíin in biso'ob te j lu'um ta manba'alcunte'exo' u ti'al u jéedzel u cuxtalo'obi'.

³²A j quimen wíinclile'exe' bíin p'áatac jayacbal te x tocoy lu'uma',

³³tu'ux bíin cajlaco'ob a paale'ex bey j canan tamano'ob buul cuarenta ja'abo'ob. Beyo' leti'obe' bíin u bo'oto'ob a kex óolale'ex tac quéen láaj quíimique'ex te x tocoy lu'uma'.

³⁴te'exe' cuarenta kiino'ob tu bisaj a xakal ilique'ex le lu'umo'; bey túuno' yaan a bo'otique'ex a si'ipile'ex cuarenta ja'abo'ob: jun p'éel ja'ab tu yo'olal jun p'éel kiin. Beyo' bíin a wojéelte'ex ba'ax cu taasic a kex óolale'ex.

³⁵Teen Yuumtzil quin jajcuntic; bey bíin in beet yéetel le j ma' u'uyaj t'aano'obo' le ca'a tu much'ajuba'ob a'alaj ba'al tin wo'olale'. Te j x tocoy lu'um bíin xu'uluco'ob, bíin quíimico'ob.

³⁶ba'ale' Le máaco'ob túuchi'ita'abo'ob tumen Moisés u xakal ilo'ob le lu'umo', le ca j suunajo'obe' t'aanajo'ob kaas u ti'al u beetico'ob u babal t'aan le caajo', Yuumtzile' tu beetaj u quíimilo'ob jun súutuc.

³⁸Ichil tuláacalo'obe' chéen Josué yéetel Caleb ma' j quíimo'obi'.

³⁹Le ca tu tzicbaltaj Moisés ti' le j israelitaob ba'ax tu ya'alaj Yuumtzile', láaj yajchaj u yóolo'ob.

⁴⁰Ca j líiko'ob piknal u sáastal u láak kiine', ca j na'aco'ob tu ca'analil le pu'uco'obo' ca tu ya'alajo'ob: ¡Ti' yano'on te'ela'! Co'one'ex te j cúuchil tu séeb chi'itaj Yuumtzilo', tu jaajile' dzo'oc kebantale'ex.

⁴¹Ba'ale' Moisese' tu ya'alaj: ¿ba'axten ma' ta dzo'ocbesique'ex u t'aan Yuumtzil? ¡Le ba'ax a káat a beete'exo' bíin jóokoc kaasil!

⁴²Xúump'ate'ex, tumen Yuumtzile' ma' ta wéetele'ex yani', bíin pa'abac a muuke'ex tumen a aj p'eeque'ex.

⁴³Te táanilo', ti' ca pa'atale'ex tumen le j amalequitaobo' yéetel le j cananitaobo', u ti'al ba'atel ta wéetele'ex ca u quíimse'ex. Ba'ale' bey te'ex dzo'oc a xúump'ajtique'ex Yuumtzilo', leti'e' dzo'oc u tzelicubáa ti' te'ex.

⁴⁴leti'ob túune', tu pechuba'ob na'acal tu ca'analil le pu'uco'obo'; ba'ale' te j caajo' ma' j péecnaj u ba'as che'il u Nup t'aan Yuumtzil mix Moisesi'.

⁴⁵Jóok túun le j amalequitaob yéetel le j cananeob caja'ano'ob te'elo', ca j ch'apachta'ab le israelitaobo' tac Horma, ca j jach j pa'ab u muuko'ob.