Read Yucateco Números 15 Bible Online

Números 15 - Yucateco bible

Números 15

¹Yuumtzile' tu t'anaj Moisese' ca tu ya'alaj ti':

²A'al ti' le israelitaob beya': Le quéen ocoque'ex te j lu'um bíin in dzáa te'ex u ti'al a cajtale'exo',

³le quéen a kube'ex teen jun túul wacax wa jun túul j taman u ti'al tóocbil tin nojbe'enil bey quíimsbil ba'alche' wa láaj tóocbil utz qui'iboquil u ti'al a dzo'ocbesique'ex jun p'éel séeb chi', wa quex u ti'al kiinbesaje',

⁴le máax kubic le ti'ibil óolalo' unaj yaan u tip'ic ca'a p'éel kilos sacan xa'akbesa'an yéetel jun litro aceite.

⁵Yéetel nupe'ex xan ti' le quíimsbil ba'alche'ob a'ala'ano' jun litro u kaab uva ti' jujun túul j taman.

⁶Wa jun túul j taman cun bin j quíimsbile' yaan u nu'upul can p'éel kilos sacan xa'akbesa'an yéetel jun p'íit máanja'anil jun litro aceite,

⁷yéetel u máanja'anil jun litro u kaab uva, bey ti'ibil óolal qui'iboc in ti'ale'.

⁸Wa jun túul chan wacax cu quíimsa'al, u ti'al ku'ubul láaj tóocbil wa quíimsbil u ti'al ca'a bisajbáe', wa u ti'al u dzo'ocbesa'al jun p'éel séeb chi'e',

⁹yaan u nu'upul seis kilos sacan xa'akbesa'an yéetel ca p'éel litros aceite,

¹⁰bey xan ca p'éel litros u kaab uva, bey tóocbil ti'ibil óolal utz qui'iboquil in ti'ale'.

¹¹Lela' unaj u beeta'al yéetel jujun túul wacax jujun túul j taman, chan j taman, wa jujun túul j yuuc cu ku'ubul.

¹²Tu yo'olal jujun túul ba'alche' bíin ku'ubuque', yaan u ku'ubul u ti'ibil óolalil u ti'al je'el jay túul ba'alche'obe'.

¹³Tuláacal le israelitaobo' unaj u dzo'ocbesico'ob le ba'alo'oba', le quéen u beeto'ob jun p'éel tóocbil ti'ibil óolal utz qui'iboquil.

¹⁴Wa jun túul j táanxel lu'umil caja'an ichile'ex, wa quex chéen cu káatal, u káat u táanbes jun p'éel tóocbil ti'ibil óolal utz qui'iboque', unaj u dzo'ocbesic je'el bix a beetique'ex tuláacale'exo'.

¹⁵Le tzolbe'en t'aano'ob a ti'ale'ex yéetel xan le táanxel lu'umilo'obo', jun p'éel a'almaj t'aan mina'an xu'ulul ti' ca máanac ti' taata'o' tac ti' u paalal.

¹⁶Jun p'éelili' a'almaj t'aan, jun p'éelili' xan bix u najmal u beeta'al, a ti'ale'ex yéetel u ti'al j táanxel lu'umilo'ob.

¹⁷Yuumtzile' tu t'anaj Moisés ca tu ya'alaj ti':

¹⁸A'al ti' le israelitaob beya': Le quéen ocoque'ex te j lu'um tu'ux bíin in bise'exo',

¹⁹le quéen cáajac a jaantique'ex le jejeláas janalbe'en neeko'ob cu dzáic le lu'um te'elo', unaj a jun páaycunsique'ex dze'edzec u ti'al a kube'ex ti' teen.

²⁰Je'el bix le ca kubique'ex teen u yáax jaatzil le janalbe'en neeko'ob ca jochique'exo, bey xan yéetel le yáax sacano' ca pakachtique'ex jun p'éel u ti'ibil óolalil waaj.

²¹Le ti'ibil óolalo' yaan a beetique'ex sáamal.

²²Wa ma' taali' ti' te'ex a tu'ubsique'ex le ba'alo'ob in wa'almaj ti' Moiseso',

²³líikbal tu yáax kiin tac tu xuule' te'ex yéetel a paalale'exe' u najmal a dzo'ocbesique'ex le ba'alo'oba':

²⁴Wa le si'ipil ma' taali' ti' te'ex a beetique'exe', wa u si'ipil tuláacal le caajo', tuláacal le caajo' bíin u táanbes jun túul chan wacax bey qui'iboc láaj tóocbil ba'alche'e', pa'ate' yéetel u ti'ibil óolalil janalbe'en neeko'ob, yéetel u kaab uva, je'el bix u ya'almajil Kue'; yaan xan u táanbesic jun túul j yuuc u ti'al quíimsa'al tu yo'olal keban.

²⁵Cu dzo'ocole' le aj kiino' cu beetic u kultajil u ti'al u kamic sa'atsaj si'ipil tuláacal u caajil israel, beyo' tene' quin sa'atsic u si'ipililo'ob, tumen ma' j taali' ti'ob u kebanchajlo'obi' yéetele' tu táanbeso'ob u ti'ibil óolal quíimsbil ba'alche' tu yo'olal keban.

²⁶Tene' quin sa'atsic u si'ipil tuláacal u caajil Israel yéetel le j táanxel lu'umilo'ob caja'ano'ob ichile'exo', wa le si'ipil ma' taali' ti' le caaj u yúuchulo'.

²⁷Wa le j ma' óoltbil si'ipil beeta'ab chéen tumen jun túul máaque', le máac túuno' yaan u kubic teen jun túul chan j yuuc bey quíimsbil ba'alche' tu yo'olal kebane'.

²⁸Le aj kiino' cu beetic u meeyjul kultaj tin táan u ti'al u kamic u sa'atsaj si'ipil le x ma' óoltbil keban tu beetaj le máaco', tene' quin sa'atsic u si'ipil.

²⁹Le tzol t'aana' chéen jun p'éelili', u ti'al israelitaob bey xan u ti'al le j táanxel lu'umo'ob caja'ano'ob ichile'exo', lelo' wa le si'ipil j úuch ma' taali' ti' wa máaxo'.

³⁰Ba'ale' wa jun túul máac cu kebanchajal taali' ti'e', quex israelita wa j táanxel lu'umile', cu malba'alcuntic in kaaba'. Yaan u xotkinta'al ichil u caajal,

³¹tumen tu mix ba'alcuntaj in t'aan yéetel ma' tu dzo'ocbesaj in tzolbe'en t'aano'obi'; yaan u jach xotkinta'al yéetel bíin u cuch u kasa'anil.

³²Ca'aliquil ti' yano'ob ca'ach le israelitaob te x tocoy lu'umo', tu nactáanto'ob jun túul máac táan u molic si' sábado.

³³Le máaxo'ob nactáanto' tu bisajo'ob tu táan Moisés, tu táan Aarón yéetel tu táan tuláacal le caajo',

³⁴leti'obe' tu dzajo'ob máax u ti'al canantic, tumen ma' a'ala'ac ba'ax unaj u beeta'al yéeteli'.

³⁵Yuumtzil túune' tu ya'alaj ti' Moisés: Le máaco' unaj xotkinta'al quíimil. Tuláacal le israelitaobo' ca u muluxtuunichtajo'ob tu paach caaj.

³⁶Le j israelitaobo' tu jóokeso'ob tu paach caaj ca tu muluxtuuntajo'ob tac ca'a j quíimi', je'el bix tu tzol t'antaj Yuumtzil ti' Moisese'.

³⁷Yuumtzile' tu t'anaj Moisés ca tu ya'alaj ti':

³⁸A'al ti' le israelitaob beya': te'ex yéetel a ch'i'ibale'exe' unaj a bisique'ex tot po'ot tu jáal u chi' a nooke'ex. Le tot po'ot unaj u beeta'al yéetel jilbil chacpuke'en.

³⁹Beyo' le quéen a wile'ex le tot po'ot bíin ka'ajac te'ex tuláacal le nu'ucbe'en t'aano'ob tin dzaj a dzo'ocbese'ex, u ti'al ma' jíilta'ale'ex tumen a tuucule'ex yéetel a dzíibolale'ex, ba'ax j beet a cúulpachcuntiquene'ex.

⁴⁰Beyo' bíin ka'ajac tuláacal le nu'ucbe'en t'aan ca a dzo'ocbese'ex, yéetel ca jun páaycunta'abe'ex in ti'alinte'ex tumen teen a Kuex

⁴¹Teen Yuumtzil a Ku le máax jóokese'ex Egipto u ti'al a Kuiltiquene'ex. Teen Yuumtzil a Junab Kuex.