Read Yucateco Números 16 Bible Online

Números 16 - Yucateco bible

Números 16

¹Jun túul j levie' ti' u ch'i'ibal Coate', cu kaaba'intic Coré u paal Ishar, yéetel u láak óox túul máaco'ob ti' u ch'i'ibalo'ob Rubene', cu kaaba'intico'ob Datán yéetel Abiram, u paalo'ob Eliab, yéetel On u paal Pelet,

²lik óolnajo'ob tu táan Moisés. Yéetelo'obe' tu nupajuba'ob u láak doscientos cincuenta israelitaob, máaco'ob yaan páajtalil ti'ob te ichil le caajo', le yano'ob ca'ach ichil le tzol xiquino'obo' tzica'ano'ob tumen le caajo'.

³Tuláacalo'obe' tu much'ajuba'obe' ca tu nactáantajo'ob Moisés yéetel Aarón, ca tu ya'alajo'ob ti'ob: ¡Waye' mix máaque'ex! tuláacal le caajo' dzo'oc u jun páaycunta'al tumen Ku, Yuumtzile' ti' yaan t éetele' ¿Ba'axten ca líikile'ex yéetel nojoch páajtalil tu yóokol u caajal Yuumtzil?.

⁴Ca tu yu'ubaj, Moisese' chinlaj tac u cóojol u táan óolal j lu'um,

⁵ca tu ya'alaj ti' Coré yéetel le máaxo'ob tzay pachto'obo'; piknal sáamale' Yuumtzile' bíin u ye'es máax u ti'al, yéetel máax jun páaycunsa'an yaan u páajtalil u ti'al u kubic le ti'ibil óolalo'. Chéen le máax bíin u yéeye' cu páajtal u kubic le ti'ibil óolalo'.

⁶Beete'ex lela': taase'ex u x p'uuluto'ob Coré yéetel le máaxo'ob yaan yéetelo',

⁷dza'ex chúuqui', láale'ex poomi', sáamale' tzole'exo'ob tu táan Yuumtzil, le máac bíin u yéey Yuumtzile', leti' jun páaycuna'an. ¡J levitaex tac way cu xu'ulule'!

⁸Cu dzo'ocole' Moisese' tu ya'alaj ti' Coré: j Leviex u'uyene'exi':

⁹¿Ca tucultique'ex wa jun p'íit ba'ax tu beetaj u Kuil Israel úuchic u yéeyique'ex ichil u caajil Israel, ca yanaque'ex naadz ti' leti' u ti'al a beete'ex u meeyjul u quili'ich naj Yuumtzil yéetel beyo' ca meyajtique'ex xan le caajo'?

¹⁰Yuumtzile' tu yóoltaj ca yanaquech naadz ti' yéetel tuláacal ch'i'ibalo'ob, le j levitaobo' ¿bejela'e' ca yaayamtique'ex xan a beeticaba'ex le aj kiinil?

¹¹Tu jaajile' Aarone' mix máac u ti'al ca t'aanaque'ex kaas tu yo'olal; teech yéetel le u láak máaco'obo' ta beetaje'ex u p'u'ujul Yuumtzil.

¹²Cu dzo'ocole' Moisese' tu túuchi'itaj t'antbil Datán yéetel Abirán, u paal Eliab, leti'obe' tu núucajo'ob: ma' c káat j bini'.

¹³¿Ca tuclic jun p'íit ba'al ta beetaj úuchic a jóokesico'on ti' jun p'éel caaj tu'ux u kaab iim yéetel caab cu yáalcab bey ja'e', u ti'al ca a taaso'on j quíimil te x tocoy lu'uma', cu dzo'ocole' a káat a beetabáa nojochil t óokole'?

¹⁴Teche' ti' mix jun p'éel caaj a biso'on tu'ux u kaab iim yéetel caab cu yáalcab bey ja'e' mix a dzáato'on lu'umi' mix u pakalilo'ob uva. ¿A káat ca p'áatac tuláacale' ca bisa'aco'ob beyo'ob ch'óope'? Ma', ma' t bin c ilech.

¹⁵Moisés túune' sen kuuxchaje' ca tu ya'alaj ti' Yuumtzil: ¡Ma' a kamic u ti'ibil óolalo'ob! Tene' ma' in lukes ti'ob mix jun túul burro, mix in beet kaas ti' mix jun túul ti'obi'.

¹⁶Cu dzo'ocole' Moisese' tu ya'alaj ti' Coré: Ca'a taalaquech sáamal teech yéetel u láak máaco'ob tu táan Yuumtzil. Ti' bíin yanac xan Aaroni'.

¹⁷Jujun túulil u bis u x p'uulut ca u dzáa poomi'. Teech yéetel Aarone' yaan xan a bisique'ex a x p'uulute'ex u ti'al a dza'ex, tu tzéel u láak doscientos yéetel cincuenta x p'uuluto'ob, tu táan Yuumtzil.

¹⁸Jujun túul túune' tu ch'aj u x p'uulut, ca tu dzáa chúuc yéetel poomi' ca tu nadzajuba'ob tu tzéel Moisés yéetel Aarón tu táan u noj Paselil Much'tal.

¹⁹Coree' dzo'oc ca'ach u much'quintic le caajo' u ti'al ca yanaco'ob yéetele' actáan ti' u noj Paselil Much'tal. U nojbe'enil Yuumtzil chíicpaj túun tu táan tuláacal le caajo'.

²⁰Yuumtzile' tu ya'alaj ti' Moisés yéetel ti' Aarón:

²¹¡Tzelaba'ex ti' le caajo', tumen bin in ca'aj in xu'uls jun súutuc!

²²Ba'ale' leti'obe' chinlajo'ob, u táan poolo'ob t'áal tac lu'um, ca tu ya'alajo'ob: In Ku teech máax dzáic cuxtal ti' tuláacal máac. ¿Tu yo'olal u keban chéen jun túul máaque', ca p'u'ujul yéetel tuláacal le caaja'?

²³Yuumtzile' tu núucaj ti' Moisés:

²⁴A'al ti' tuláacal le j israelitaobo' ca u tzeluba'ob tu pasel Datán yéetel Abiramo'.

²⁵Moisese' j líik yéetel u nuuquilo'ob Israel ca j bíin tu'ux yaan Datán yéetel Abiram.

²⁶Ca tu ya'alaj ti' le caajo': Tzelaba'ex tu paselo'ob le kaakas máaco'obo', yéetel ma' a machique'ex mix ba'al u ti'alo'ob, ma' xan ca quíimique'ex tu yo'olal u kebano'obi'.

²⁷Le caajo' tu tzelajuba'ob tu'ux yaan Coree', Datán yéetel Abiram. Datán yéetel Abirame' ti' yano'ob ca'ach tu jool u paselo'ob pa'ate' yéetel u yatano'ob yéetel u paalalo'obe'.

²⁸Moisese' tu ca'a a'alaj: yéetel lela' quin we'esic u chíiculal u túuxtmailen Yuumtzil u ti'al in beet le ba'alo'oba', u ti'al ca a wile'ex ma' chéen tu juunal in wóol quin beetiqui'.

²⁹Wa le máaco'ob cu quíimilo'ob chéen je'el bix u quíimil je'el máax u láak máaquilo'obe', bíin chíicpajac ma' u túuchi'itmen Yuumtzili':

³⁰Ba'ale' wa Yuumtzil cu beetic jun p'éel jak óol chíiculal, yéetel cu je'ic u chi' le lu'umo' u ti'al u lu'ukulo'ob yéetel tuláacal ba'ax yaan ti'ob yéetel cu lúubulo'ob cuxa'ano'ob tu taamil le lu'umo', beyo' bíin a wojéelte'ex leti' le máaco'oba' tu tzelajo'ob Yuumtzil.

³¹Ca'aj dzo'oc u t'aan Moisese', je'epaj le lu'um tu yáanalo'obo'

³²ca tu lukaj tuláacal le máaco'ob tu nupajuba'ob ti' Coré, pa'ate' yéetel u yotochnáalo'ob yéetel tuláacal ba'ax yaan ti'ob.

³³J lúubo'ob cuxa'ano'ob tu taamil le lu'umo' pa'ate' yéetel tuláacal ba'ax yaan ti'ob ca'achi, ca j núup' le lu'um tu ca'a téeno'. Bey tzelico'obo' ichil le j israelitaobo'.

³⁴Le ca'a u'uya'ab táan u yawato'obe', tuláacal le j israelitaob yano'ob tu bakpacho'obo' jóoko'ob áalcabil táan u ya'alico'ob: ¡bíin u luuko'on xan le lu'umo'!

³⁵Cu dzo'ocol xane' Yuumtzile' tu túuchi'itaj jun p'éel káak ca tu quíimsaj le doscientos cincuenta Máaco'ob tu kubajo'ob ca'ach le poomo'.

³⁶Yuumtzile' tu t'anaj Moisés ca tu ya'alaj ti':

³⁷A'al ti' Eleazar, u paal Aarone' ca u jóokes le x p'uuluto'ob ichil le ba'axo'ob j p'at ti' le tóoco', ca u pul náach le t'aba'an chuc p'áatalo'.

³⁸U x p'uuluto'ob le máaco'ob dzo'oc u quíimilo'ob tu yo'olal u kebano'obo', dzo'oc u p'áatalo'ob jun páaycunta'ano'ob iquil úuchic u kubico'ob poom tin táan. Jaycunta'aco'ob u jaajay laminailo'ob u ti'al u ba'alal u multuunil kultaj, u ti'al ca ila'ac bey jun p'éel ka'ajsaj iik tumen tuláacal le j israelitaobo'.

³⁹Eleazar le aj kiino' tu molaj le x p'uuluto'ob bronce u ca'ajo', tu'ux ca'ach tu kubajo'ob le poom le máaco'ob j quíimo'ob ti' le tóoco' ca tu ya'alaj ca jaycunta'aco'ob u ti'al u ba'alal u multuunil kultaj.

⁴⁰Lela' u ti'al ka'ajsaj iik ti' le j israelitaobo' u ti'al ma' u náadzal mix máac u kub poom tu multuunil kultaj ti' Yuumtzil wa ma' sijnal ti' u ch'i'ibal Aarón, wa u láak cu beetique' bíin úuchuc ti' le ba'ax úuch ti' Coree' yéetel u láako'obo'. Tuláacal beeta'ab jach je'el bix u ya'almajil Yuumtzil ti' Eleazar tu chi' Moisese'.

⁴¹Tu láak kiine', tuláacal u caajil Israele' jo'op' ya'alico'ob ba'al ti' Moisés yéetel ti' Aarón. Cu ya'alico'ob beya': ¡Te'exe' táan a quíimsique'ex u caajal Yuumtzil!

⁴²Tuláacalo'ob tu bakpachto'ob Moisés yéetel Aarón; ba'ale' leti'obe' bino'ob tu noj Paselil Much'tal. Ti' le súutuco' chíicpaj u nojbe'enil Yuumtzil.

⁴³Moisés yéetel Aarón túune' j bino'ob actáan ti' u noj Paselil Much'tal,

⁴⁴Yuumtzile' tu ya'alaj ti' Moisés:

⁴⁵¡Tzelaba'ex ichil tuláacal le máaco'obo' tumen bin in ca'aj in xu'ulso'ob ti' le súutuca'! Moisés yéetel Aarone' chinlajo'ob tac u cóojol u táan poolo'ob j lu'um,

⁴⁶Moisese' tu ya'alaj ti' Aarón taas a x p'uulut, dzáe u chúuquil u multuunil kultaj ca a láal poomi'; ca séeb xi'iquech tu'ux yaan le caajo' ca a káat ti' Ku u sa'atsaj u si'ipilo'ob, tumen dzo'oc u sen p'u'ujul Yuumtzil táan u cáajal u báan quíimilo'ob.

⁴⁷Aarone' tu beetaj le ba'ax tu ya'alaj Moiseso' ca j bin áalcabil tu'ux much'ucbal le caajo'. Kue' dzo'oc u túuxtic le báan quíimil ichil le caajo'. Aarón túune' tu dzaj poomi' ca tu káataj ti' Ku u sa'atsaj si'ipil le caajo'.

⁴⁸Cu dzo'ocole' tu dzajubáa' chúumuc ti' le dzo'oc u quíimilo'ob yéetel le cuxa'ano'obo', le báan quíimilo' jáawi.

⁴⁹Ba'ale' dzo'oquili' u quíimil catorce mil yéetel setecientos máaco'ob, jun páay le yáax quíimo'ob tumen tu much'ajuba'ob le ca j líik Coree'.

⁵⁰Le ca'aj xu'ul le báan quíimilo' Aarone' suunaj tu jool u noj Paselil Much'tal u ti'al u much'tal yéetel Moisés.