Read Yucateco Números 17 Bible Online

Números 17 - Yucateco bible

Números 17

¹Yuumtzile' tu t'anaj Moisese' ca tu ya'alaj ti':

²Túuchi'it t'aan ti' le j israelitaobo' ca taasa'ac tumen jujun túul u nuuquilo'ob u ch'i'ibalo'obe' jun p'éel xóolte', tu pa'ate'ile' doce xóolte'ob. Teche' yaan a dzíibtic u kaaba' ti' jujun p'éel xóolte'.

³Ti' u xóolte' u múuch' cajtalil yotochnáalo'ob levie' ca dzáic u kaaba' Aarón, tumen kaabéet u yantal jun p'éel xóolte' ti' u nojchilil jujun p'éelil ch'i'ibalo'ob.

⁴Ca tzolic tu noj Paselil Much'tal tu táan u ba'asche'il nup t'aan, le tu'ux quin nuptáantiquinbáa ta wéetele'exo'.

⁵Bin in ca'aj in beet u jóokol u ku'uk u xóolte' le máax in yéeymaje', beyo' le j israelitaobo' je'el u jáawal u kaakas t'aano'ob ta wo'olale'ex tin táane'.

⁶Moisese' tu ya'alaj beyo' ti' le israelitaobo', ca j dzaab tumen jujun túul u nuuquilo'ob u ch'i'ibalo'obe' jun p'éel xóolte' ca tu chucaj doce xóolte'ob. Ichilo'obe' ti' yaan ca'ach u xóolte' Aaroni'.

⁷Moisese' tu tzolaj le xóolte'ob tu táan Yuumtzil tu noj Paselil le Much'talo',

⁸tu láak kiin, ca j bin te j paselo', tu yilaj u xóolte' Aarón, ti' u ch'i'ibalo'ob levie' dzo'oc u jóokol u ku'uk: yaan u ku'uk, yaan u lool, dzo'oc xan u kantal u yich.

⁹Moisés túune' tu lukesaj tu táan Yuumtzil tuláacal le xóolte'obo' ca tu ye'esaj ti' le j israelitaobo'. Cu dzo'ocol u yilico'ob, tu jujun túulile' tu ch'a'aj u xóolte'.

¹⁰Yuumtzil túune' tu ya'alaj ti' Moisés: Dzáa tu ca'a téen u xóolte' Aarón tu táan u ba'asche'il le nup t'aano', ca líikes te'elo' bey a'almaj xiquin ti' le j ma' u'uyaj t'aan caajo'. Beyo' ma' tu quíimilo'ob tumen ca beetic u jáawal u kaakas t'aano'ob tin wo'olal.

¹¹Moisese' tu beetaj tuláacal je'el bix u tzolbe'en t'aan Yuumtzilo',

¹²ba'ale' le j israelitaobo' tu ya'alajo'ob ti' Moisés: ¡Dzoca'an to'on beyo'! ¡Tuláacal yaan u quíimil!

¹³Tumen tuláacal le cu náadzal tu quili'ich naj Yuumtzile' cu quíimil. ¿Yaan wa c láaj quíimil túun?