Read Yucateco Números 18 Bible Online

Números 18 - Yucateco bible

Números 18

¹Yuumtzile' tu ya'alaj ti' Aarón: Teech yéetel a paalal, pa'ate' yéetel u ch'i'ibalo'ob Levie', tu'ux xan a taale', te'ex u najmal a cuchique'ex u si'ipil le ba'axo'ob kaastac bíin beeta'ac ti' le quili'ich najo'; chéen teech yéetel a paalal bíin a cuche'ex u si'ipilil ba'ax ma' tu beel bíin a beete'ex ti' u meeyjul aj kiinil.

²Ba'ale' le a láaktzilo'ob u ch'i'ibalo'ob Leví, a wéet ki'ikelo'ob xane', u najmal a bisico'ob u yáantecho'ob ti' le meeyjul tu táan u paselil nup t'aan teech bey xan a paalal.

³Leti'obe' bíin u meyajtecho'ob bey xan u beeto'ob u meeyjul le najo', ma' u najmal u náadzalo'ob ti' u nu'uculo'ob le quili'ich najo' mix ti' u multuunil kultaj, tumen cu quíimilo'ob bey xan te'ex.

⁴Ta wéetel bíin u beeto'ob u meeyjul u noj Paselil Much'tal, ti' tuláacal u kultajilo'ob. Ba'ale' mix jun túul u láak máac u najmal u náadzal te'ex;

⁵te'ex bíin a wile'ex u beeta'al u meeyjul quili'ich naj bey xan ti' u multuunil kultaj. Beyo' ma' bíin kuuxchajquen yéetel le j israelitaobo'

⁶Tene' tin jun páaycuntaj a láaktzilo'ob le j levitaob ti' ichil le j israelitaobo' u ti'al in dzáico'ob te'ex, u ti'al u meeyjul u noj Paselil Much'tal;

⁷ba'ale' chéen teech yéetel a paalal je'el u páajtal a beetique'ex u meeyjul aj kiinil tu multuunil kultaj bey xan ichil le sen quili'ich cúuchilo'. Le meyaja' chéen te'ex unaj a beetique'ex, tumen teen tin dzaj u páajtalil te'ex u ti'al u meeyjul aj kiin. Wa máax cu beetic kultaj bey aj kiin, ma' aj kiine' yaan u xotkinta'al quíimil.

⁸Yuumtzile' tu ya'alaj ti' Aarón: Tene' dzo'oc in dzáic ta kab le ti'ibil óolalo'ob cu dza'abal teno'. Tuláacal le quili'ich ti'ibil óolalo'ob cu dza'abal tumen le j israelitaobo', quin dzáic teech yéetel ti' a paalal tumen le unaj a ti'altique'ex; lela' jun p'éel tzol t'aan u ti'al ja'abo'ob mina'an u xuul.

⁹Ti' le quíimsbil ba'alche' cu tóoca'alo', ca ti'alintic tuláacal u ti'ibil óolalil jejeláas janalbe'en neeko'ob je'el bix le quíimsbil ba'alche' tu yo'olal keban wa tu yo'olal si'ipil cu ku'ubul tumen le j israelitaobo'; tuláacal le quili'ich ti'ibil óolalo' a ti'al yéetel u ti'al a paalal.

¹⁰Tuláacal j xiib ichile'exe' cu páajtal u jaantic le ti'ibil óolalo', ba'ale' unaj u jaantic ti' le cúuchil jun páaycunta'an u ti'alo', tumen quili'icho'ob.

¹¹Bey xan quin dzáic ti' teech ti' a j xibil paalal yéetel ti' a x ch'upul paalal caja'ano'ob ta wicnale', le ti'ibil óolalo'ob chéen in ti'al cu táanbesco'ob le israelitaobo'. Lela' jun p'éel a'almaj t'aan ma' tu kexpajal. Je'el máax ti' a wotoch utz yanile', cu páajtal u jaantic.

¹²Quin dzáic teech le yáax ich cu taasico'ob le j israelitaob jujun ja'abe'; u jach ma'alobil aceite, u ma'alobil kaab uva yéetel janalbe'en neeko'ob.

¹³Bey xan u yáax ich u joocho'ob cu kubico'ob tene', a ti'al. je'el máax ti' a wotochnáal utz yanile' je'el u páajtal u jaantique'.

¹⁴Tuláacal ti'ibil óolal cu jun páaycuntic le israelitaobo', a ti'al teech.

¹⁵Tuláacal u yáax paal le j israelitaob wa u yáax ba'alche'ob, cu ku'ubul tene', a ti'al. Ba'ale' u yáax paal le máaco'obo' yéetel le yáax ba'alche'ob ma' janalbe'eno'obo', yaan a káatic u keexil.

¹⁶Le keexo' unaj u bo'ota'al dzo'oc u máan jun winal síijic, u bo'olile' cinco sac taakin je'el bix u jalach taakinil le quili'ich najo', yaan once gramos ti'.

¹⁷Ba'ale' ma' bíin a cha'a u ke'exeli' u yáax a'al wacaxo'obi', j taman, wa j yuuc. Lelo'obo' jun páaycuna'an in ti'al, yaan a quíimsico'ob; u ki'ikele' bíin we'equec tu yóokol u multuunil kultaj, u tzaatzele' ca tóoquic bey ti'ibil óolal utz qui'iboquil in ti'al.

¹⁸Teche' ca p'áatal yéetel u bakel, u tzeem le ba'alche'o', u no'oj muuk ooc, tumen ti'ibil óolal chéen in ti'al.

¹⁹Tuláacal le bo'olalo'ob cu jun páaycuntico'ob le israelitaob in ti'alo' quin dzáic teech, ti' a j xibil paalal bey xan ti' a x ch'upul paalal le caja'ano'ob ta wicnalo'. Lela' jun p'éel a'almaj t'aan mina'an kexpajal ti'. Jun p'éel nup t'aan mina'an jelpajal ti', quin beetic ta wéetel yéetel a ch'i'ibalo'ob.

²⁰Yuumtzile' tu ya'alaj ti' Aarón: Ma' u najmal u yantal teech lu'umi' mix ba'al a ti'alt je'el bix le j israelitaobo'. Tene' a ti'alen yéetel a kamba'albailen israel.

²¹Ti' le j levitaobo' quin dzáic le cu jun páaycuntic le israelitaob teno' bey bo'olil le cu kamico'ob ti' u joocho'obo', lela' a bo'ole'ex tu yo'olal le meeyjul ca beetique'ex tu noj Paselil Much'talo'.

²²Le u láak israelitaobo' ma' unaj u náadzalo'ob tu noj Paselil Much'tala', tumen cu cuchico'ob u nojchil kebanil quíimil.

²³Le j levitaob chéen leti'ob bíin u beeto'ob u meeyjul le u noj Paselil Much'talo', leti'ob bíin cuchic u kóoch si'ipilil ba'ax bíin beeta'aqui'. Lela' jun p'éel a'almaj t'aan mina'an kexpajal ti', u ti'al le taataob, tac ti' u paalal. Le j levitaobo' ma' bíin yanac u lu'umo'ob israeli'.

²⁴Ti' leti'obe' dzo'oc in dzáic le unaj u kubic teen le israelitaobo' leti' u náajalo'ob. Le t o'olale' dzo'oc in wa'alic ma' bíin yanac u lu'umo'ob Israel.

²⁵Yuumtzile' tu t'anaj Moisés ca tu ya'alaj ti':

²⁶a'al ti' le levitaob le quéen u kamo'ob u diezmo le j israelitaob ti' le cu jochico'ob in dzaamaj u ti'alo'obo', unaj u jatzico'ob u diezmoil u ti'al u ku'ubul teen.

²⁷Lelo' u bo'olil bíin u dza'ob je'el bix le bo'olal cu dzáic le israelitaob le quéen u taaso'ob jun jaatz janalbe'en neeko'ob wa u kaab uva.

²⁸Ti' le diezmo cu dzáic le israelitaobo', le j levitaob yaan u jun páaycunsico'ob u bo'olalo'ob ti' Yuumtzilo', bíin u dza'ob ti' Aarón.

²⁹Ti' tuláacal le cu dza'abal ti'obe' yaan u jun páaycuntico'ob jun jaatz u ti'al u dza'ob ti' teen le bíin u jun páaycunto'ob teno' unaj u jach ma'alobil.

³⁰A'al ti'ob xan: le quéen dzo'ococ u jun páaycuntico'ob u jach ma'alobil in ti'alo', u yalab le janalbe'en neeko'ob wa le vino' cu p'áatalo' cu páajtal u ya'alico'ob ba'al u ti'alo'ob,

³¹je'el u páajtal a jaantique'ex yéetel a wotochnáalo'ob je'el tu'uxaque'. Leti' u bo'olil iquil a meyaje'ex tu noj Paselil Much'tal.

³²Le quéen dzo'ococ a jóokesique'ex u ma'alobil in ti'alo', cu páajtal a jaantique'ex u yalab ma' ta cuchique'ex si'ipil; beyo' ma' ta mixba'alcuntique'ex le u quili'ich ti'ibil óolalo'ob le j israelitaobo', yéetel ma' ta xot kinta'ale'ex j quíimil.