Read Yucateco Números 19 Bible Online

Números 19 - Yucateco bible

Números 19

¹Yuumtzile' tu t'anaj Moisés yéetel Aarón, ca tu ya'alaj ti'ob:

²Teen Yuumtzil, quin dzáic le tzolbe'en t'aana': A'al ti' le israelitaobo' ca u taaso'ob teech jun túul wacax yaan u tzo'otzel óoli' chac, láaj utz u wíinclil mix jun téen dza'abac u ti'al meyaj.

³Te'exe' ca kubique'ex ti' aj kiin Eleazar, le ti'e' cu jóokesic tu paach caaj cu ya'alic ca quíimsa'ac tu táan.

⁴Le aj kiin Eleazaro' bíin u ch'a'a' yéetel u yaal u kab jun p'íit u ki'ikele', cu widzic siete u téenel tu tojil u noj Paselil Much'tal.

⁵Cu dzo'ocole' cu tóoca'al le x wacax tu táano', yaan xan u tóoca'al u kéewlel, u bakel, u ki'ikel yéetel le ba'ax yaan ichil u jobnel.

⁶Le aj kiino' cu ch'a'ic u che'il cedro, jun xéet' u kab hisopo yéetel chac nooke', cu pulic tuláacal ichil le káak tu'ux cu tóoca'al le x wacaxo';

⁷cu dzo'ocole' cu p'o'ic u nooke' u najmal xan u p'o'icubáa yéetel ja', beyo' cu páajtal u yocol te j caajo', quex cu p'áatal ma' utz yanil u ti'al quili'ich meyaj tac ocnaj kiin.

⁸Le máac tu tóocaj le x wacaxo', yaan u p'o'ic u nook, u najmal u p'o'icubáa yéetel ma'alob ja', cu p'áatal ma' utz yanil u ti'al quili'ich meyaj tac ocnaj kiin.

⁹U láak máac utz yanile', cu molic u ta'anil le x wacaxo', cu bisic ti' jun p'éel cúuchil míista'an yaan tu paach caaj, le ta'ano' bíin kabéetchajac ti' u caajil israel u ti'al u máakantic u ja'il utzquinajil. Tuláacal lela' jun p'éel quíimsbil ba'alche' tu yo'olal keban.

¹⁰Le máax j mol le ta'ano', yaan u p'o'ic u nook, u ti'al quili'ich meyaje' cu p'áatal ma' utz yanil tac ocnaj kiin. Lela' jun p'éel a'almaj t'aan mina'an kexpajal ti', a ti'ale'ex j israelitaex je'el bix xan u ti'alo'ob le táanxel lu'umilo'ob cajacbalo'ob ichile'exo'.

¹¹Wa máax machic jun túul je'el máaxac quimene' cu p'áatal ma' utz yanil siete kiino'ob.

¹²Tu yóox p'éel kiin yéetel tu siete kiine' unaj u yichquil yéetel u ja'il utzquinajil, beyo' cu p'áatal utz yanil. Wa ma' tu p'o'icubáa tu óox p'éel kiin, mix tu siete kiine' cu p'áatal ma' utz yanili'.

¹³Wa máax cu machic jun túul máac quimen, ma' tu p'o'icubáe' cu kascuntic u quili'ich naj Yuumtzil, le t o'olale' unaj u xotkinta'al tu caajil israel. Tumen ma' j widza'ab yéetel u ja'il utzquinajili', le t o'olal cu p'áatal ma' utz yanili'.

¹⁴U tzol t'aanilo'ob u ti'al wa cu quíimil wa máax tu yotoch, leti' le je'elo'oba': Tuláacal le yano'ob ichil le najo' yéetel le bíin oojco'obe', cu p'áatalo'ob ma' utz yanilo'ob siete kiino'ob.

¹⁵Tuláacal le nu'uculo'ob jéechcabo'ob yéetel le ma' ma'alob maca'anile' cu p'áatalo'ob ma' utz yanilo'obi'.

¹⁶Ti' tu'ux jáanpikéen, tuláacal máax machic jun túul máax quíimsa'an wa quimen chéen ti' quíimile', wa cu machic baaquel máac, wa jun p'éel mucnale' cu p'áatal ma' utz yanil siete kiino'obi'.

¹⁷Le máax ma' utzil yantalil beyo', yaan u ch'a'abal jun p'íit u ta'anil le x wacax quíimsa'ab tu yo'olal kebano', cu dza'abal ti' jun p'éel káat u ti'al u láala'al u ja'il sayabi'.

¹⁸Cu dzo'ocole' jun túul máac utz yanile' cu ch'a'ic jun p'éel u chan kab hisopoe', cu ch'ulic yéetel le ja'o' cu widzic le najo', le nu'uculo'obo', bey xan le máaco'ob yaan ca'ach ichilo', bey xan le máax tu machaj le baaco'obo' wa le quimen máac quíimsa'ano' wa le máax chéen quíimo', wa le mucnalo'.

¹⁹Le máac utz yanil u ti'al quili'ich meyaje' unaj u widzibja'atic le máax kaas yanil tu yóox p'éel kiino' yéetel tu siete kiino', tu siete kiine' dzo'oc u p'atic utz yanil. Le máax túun kaas yanile' cu p'o'ic u nook, cu p'o'icubáa xan yéetel utzil ja', cu p'áatal ma' utz yanil tac ocnaj kiin.

²⁰Wa jun túul máac ma' utz yanil, ma' tu p'o'icubáe', unaj u xotkinta'al ichil u caajal, tumen cu kascuntic u quili'ich naj Yuumtzil, tumen ma' j wi'idz yéetel u ja'il utzquinaj, le beetic ma' utz yanili'.

²¹Lela' jun p'éel a'almaj t'aan mina'an kexpajal ti'. Le máax cu widzic u láak yéetel u ja'il utzquinajil unaj u p'o'ic u nook. Le máax machic u ja'il utzquinajile', cu p'áatal ma' utz yanil tac ocnaj kiin.

²²Tuláacal ba'ax cu ma'achal tumen le máac ma' utz yanilo', cu p'áatal ma' utz yanili'; le máax machic jun túul maac ma' utz yanile', cu p'áatal ma' utz yanil tac yocbal kiin.