Read Yucateco Números 20 Bible Online

Números 20 - Yucateco bible

Números 20

¹Tu yáax winalil le ja'abo' le israelitaobo' j kucho'ob tu x tocoy lu'umil Zin, ca j p'áato'ob dze'edzec kiin Cades, te'elo' j quíim x María ca j mu'uqui.

²Le caajo' tu yo'olal mina'an ja' ti'obe', láaj much'lajo'ob sacach t'aan tu yo'olal Moisés yéetel tu yo'olal Aarón,

³ca tu ya'alajo'ob ti' Moisés; ¡buca'aj utzil wa ca quíimco'on ca'ach yéetel le u láak israelitaob j quíimo'ob tu táan Yuumtzilo'!

⁴¿Ba'ax u biilal ta taase'ex u caajal Yuumtzil te x tocoy lu'uma'? ¿A káate'ex wa ca quíimico'on pa'ate' yéetel c wacax?

⁵Ba'ax u biilal ta jóoksilaco'one'ex tu lu'umil Egipto ca ta taaso'one'ex te j kaakas cúuchila', te'ela' ma' tu páajtal u pa'akal mix ba'al; mina'an higueraob, mix u cúuchil pa'akal uvaob, mix granadaob; ¡mix ja' yaan u ti'al ukbil!

⁶Moisés Yéetel Aarone' tu náachcunsuba'ob ti' le caajo' ca j bino'ob tu jool u noj Paselil Much'tal, te'elo' noclajo'ob tac cóojic u táanpoolo'ob j lu'um. Ca j chíicpaj túun ti'ob u nojbe'enil Yuumtzil,

⁷Yuumtzile' tu ya'alaj ti' Moisés:

⁸Ch'a'a le xóolte'o', yéetel u yáantaj a sucu'un Aarone', much'quint le caajo', cu dzo'ocole', tu táan tuláacalo'obe' a'al ti' le suytuno' ca u dzáa ja' ti'ob, bíin a wil bix cun tuul ja' ti' le suytuuno' u ti'al u yuko'ob, leti'ob yéetel u wacaxo'ob.

⁹Je'el bix a'ala'abic ti' Moisese' tu ch'a'aj le xóolte' yaan tu táan Yuumtzilo';

¹⁰Moisés yéetel Aarone' tu much'quintajo'ob le máaco'ob tu táan le suytuno', ca'a tu ya'alaj Moisés: U'uye'ex j ma' u'uyaj t'ane'ex; ¿yaan wa xan in jóokesic ja' ti' le suytuna' u ti'al ca in dzáa a wuke'ex?

¹¹Ca'aliquil táan u ya'alic lela', Moisese' tu líiksaj u kab ca tu jadzaj ca'a téen yéetel le xóolte' le suytuno', ca j tuulnaj sen ya'ab ja'. Bey túuno' le máaco'ob yéetel le wacaxo'obo' tu yukajo'ob ja'.

¹²Ba'ale' Yuumtzile' tu ya'alaj ti' Moisés yéetel ti' Aarón: Bey tumen ma' ta wocsaj a wóole'ex ti' ba'ax tin wa'alaj, mix ta nojbe'ecuntene'ex tu táan le j israelitaobo', ma' bíin ocoque'ex yéetel le máaco'ob te j lu'um dzo'oc in dzáic te'exo'.

¹³Lelo' leti' u sayabil Meriba tu'ux tu sacach t'antajo'ob le israelitaob le Yuumtzilo', leti'e' tu ye'esaj ti'ob u quili'ichil.

¹⁴Líikbal Cadese', Moisese' tu túuchi'itaj dze'edzec aj bisaj t'aano'ob ti' u ajawil Edom, u ti'al u ya'alico'ob ti': A láako'ob le j israelitaobo' cu túuchi'itico'ob a'albil teech: Teche' a wojel le talam ba'alo'ob c mukyajtico'.

¹⁵C máanja'an ch'i'ibalo'obe' j bino'ob cajtal Egipto ya'ab kiino'ob, ba'ale' le egiptciobo' tu sen loobilto'ono'ob je'el bix tu beetilaco'ob yéetel c máanja'an ch'i'ibalo'obe';

¹⁶to'one' t káataj áantaj ti' Yuumtzil, leti'e' tu yu'ubaj c awat okol, ca tu túuxtaj jun túul ángel jóokesico'on Egipto, bejela'e' ti' yano'on tu caajil Cades tu'ux cu na'acal a lu'umil.

¹⁷Káat óoltic teech ca a cha'a' c máan ta lu'umil, ma' bíin máanaco'on ichil a coolo'obi' mix ichil a pakal uvaob, mix bíin c uk u ja'il a ch'e'eno'obi' bíin xíimbalnaco'on ti' le noj bejo', ma' bíin tzéeleco'on tac c jóokol ta lu'umo'obi'.

¹⁸Ba'ale' u ajawil Edome' tu núucaj: ¡Ma' a máane'ex tin lu'umil, wa ma'e' quin jóokol yéetel in aj ba'atelo'ob in nactáante'ex!

¹⁹Le j israelitaobo' tu tzolajo'ob ti', bíin xi'ico'on ti' le noj bejo', wa to'on, wa quex c wacax cu yukico'ob u ja'il a che'ene', je'el c bo'otic teche'. Chéen ba'ax c káate' ca cha'a' c máan xíimbalil ta lu'umil.

²⁰U ajawil Edome' tu núucaj: ¡Ma' bíin manquexi'! ca jóok u nactáant le j israelitaobo' yéetel mu'ukan aj ba'atelo'ob yaan ca'ach u ma'alob nu'ucul ba'atel ti'ob,

²¹táan u pechicubáa u ti'al ma' u cha'ic u máano'ob tu lu'umil. Le j israelitaob túuno' tu caxto'ob yaanal bej.

²²Tuláacal u caajil Israel jóok Cades ca j bino'ob tu pu'uquil Hor.

²³Te'elo', tu'ux cu na'acal u lu'umil Edome', Yuumtzile' tu ya'alaj ti' Moisés yéetel ti' Aarón:

²⁴Aarone' bin u ca'aj quíimil, ma' bíin ococ te j lu'um dzo'oc in dzáic ti' le j israelitaobo', tumen tu yicnal u sayabil Meribae' te'exe' ta x ma' u'uyaj t'ante'ex le ba'ax tin wa'alajo'.

²⁵Teche' j Moisés, bis Aarón yéetel Eleazar u paal tu ca'analil u pu'uquil Hor;

²⁶te'elo' bíin a lukes ti' Aarón u nookil aj kiinil u ti'al ca a búucbes Eleazar. Aarone' bíin quíimic te'elo'.

²⁷Moisese' tu beetaj le ba'ax tu ya'alaj Yuumtzil. Táan u yila'al tumen tuláacal le j israelitaobo' ca j na'aco'ob tu pu'uquil Hor,

²⁸te'elo' Moisese' tu lukesaj ti' Aarón u nookil u aj kiinile' ca tu búucbesaj Eleazar. Láili' te tu ca'analil le pu'uco', j quíim Aarón; Moisés yéetel Eleazar j éemo'ob te j pu'uco'.

²⁹Le ca tu yojéeltajo'ob le israelitaob dzo'oc u quíimil Aarone' okolnajo'ob treinta kiino'ob.