Read Yucateco Números 22 Bible Online

Números 22 - Yucateco bible

Números 22

¹Le j israelitaobo' xíimbalnajo'ob tu ca'a tene' ca j je'elo'ob tu táax lu'umil Moab, tu lakin u áalcab ja'il Jordán actáan ti' Jericó.

²Balac, u paal Zipor, tu jach ilaj ba'ax tu beetajo'ob le j israelitaob ti' le j amorreobo'.

³Bey xan u cajnáalilo'ob Moabe' tu sen ch'a'ajo'ob sajaquil le ca tu yilajo'ob ya'ab le j israelitaobo'.

⁴U cajnáalilo'ob Moab túune' tu ya'alajo'ob ti' u nojchililo'ob Madián: tuláacal le máaco'obo' bíin u xu'ulso'ob c lu'um bey u xu'ulsa'al u su'uquil jun p'éel káax tumen wacaxe'. ti' le kiino'obo' Balaque' cu ajawtal ca'ach Moab,

⁵ca'a tu túuxtaj t'anbil Balaam, u paal Beor, ti' yaan ca'ach Petor, tu jáal u áalcab ja'il Éufrates, tu lu'umil Amav. Balaque' tu ya'alaj ti' u bisaj t'aanobe' ca u ya'alo'ob ti' Balaam: Ti' Egipto taal jun p'éel caaj dzo'oc u ya'abtalo'ob ti' tuláacal le lu'uma', bejela'e' caja'ano'ob actáan ti' teen.

⁶Séebac a taal u ti'al ca a loolob t'ant tin wo'olal le caajo', tumen p'íit máanja'an u muuk ti' to'on. Beyo' je'elajquij u páajtal c pa'ic u muuko'obe' je'el xan in c áalcabansico'ob xan ti' le lu'uma', tene' in wojel a qui' t'aano'obe' yéetel a loolob t'aano'obe' cu béeytalo'ob.

⁷U nuuctaquilo'ob Moab yéetel Madiane' j bino'ob yéetel taakin tu kabo'ob u ti'al u bo'otico'ob le loolob t'aano'obo', ca j cojo'ob tu'ux yaan Balaame' tu ya'alajo'ob ti', u túuxtaj t'aan Balac.

⁸Balaam túune' tu ya'alaj ti'ob: P'áatene'ex ti' le áakaaba', beyo' tene' bíin in núuc te'ex ba'ax bíin u tzol t'ant teen Yuumtzil, u nuuquilo'ob Moabe' j p'áato'ob tu yicnal.

⁹Ba'ale' Kue' chíicpaj ti' Balaam, ca tu káat chi'itaj ti', ¿Máax le máaco'ob yano'ob ta wicnalo'?

¹⁰Balaame' tu núucaj: Balac u paal Zipor u ajawil Moabe', tu túuxtajo'ob ca u ya'alo'ob teen

¹¹yaan bin jun p'éel caaj jóok Egipto dzo'oc u cajtalo'ob ti' tuláacal u lu'umil. Balaque' u káat ca séeb xi'iquen in loolob t'anto'ob, u ti'al u yilic wa je'el u páajtal u pa'ic u muuko'obe' yéetel u yáalcabansico'ob tu lu'umil.

¹²Yuumtzil túune' tu ya'alaj ti' Balaam: Ma' a bin yéetelo'ob mix a loolob t'antic le caajo', tumen le caajo' dzo'oc in qui'i t'antic teen.

¹³Tu láak kiine' Balaame' líike' ca tu ya'alaj ti' le u nucuch máaco'ob tu túuxtaj ca'ach Balaco': Xeene'ex ta lu'ume'ex, Yuumtzile' ma' tu cha'ic in bin ta wéetele'ex.

¹⁴U nuuquilo'ob Moabe' suunajo'ob tu'ux yaan Balac, ca tu ya'alajo'ob ti': Balaame' ma' tu yóoltaj taal t éeteli'.

¹⁵Ba'ale' Balaque' tu sen óoltaj ca taalac ca tu túuchi'itaj u láak u nuuquilo'ob, asab ya'abo'ob yéetel asab tzicbe'eno'ob ti' le ya'axo'obo',

¹⁶Leti'obe' j bino'ob u yilo'ob Balaame' ca tu ya'alajo'ob ti': Balac, u paal Zipore' cu túuchi'itic a'albil teech: Ma' a wa'alic ma' ta taal.

¹⁷Tene' bíin in nojoch tziquech bey xan je'el in beetic tuláacal ba'ax a káate'; co'oten, quin káat óoltic teech ca taalaquech a loolob t'ant le caajo'.

¹⁸Ba'ale' Balaame' tu núucaj ti'ob: Quex u dzáa teen Balac tuláacal le oro yéetel le plata cu chupic u jalach najo' tene' ma' tu páajtal in beetic mix ba'al mix nojoch mix chichan, wa ma' ba'ax cu ya'alic Yuumtzil in Ku.

¹⁹Ba'ale' P'áatene'ex ti' le áakaaba', ca in wu'uy ba'ax bíin u ya'al teen Yuumtzil ti' le áakaaba'.

²⁰Ti' le áakabo' chíicpaj Yuumtzil ti' Balaame' ca tu ya'alaj ti': Wa le máaco'ob dzo'oc u taalo'ob u yilecho'obo', líiken, xeen yéetelo'ob, ba'ale' yaan a beetic chéen ba'ax quin in wa'al ti' teech.

²¹Balaame' j líik tu láak kiine' ca tu dzaj u jaalma u x burrae' ca j bin yéetel u nojchilo'ob le j moabitaobo'.

²²Balaame' na'ac yóokol le x burrao' t'u'ulpachta'an tumen ca'a túul u palitzilo'ob. Ba'ale' Yuumtzile' sen kuuxchaj yéetel tumen j bini, ca j jóok u ángel Yuumtzil j wa'atal tu táan u beel u ti'al ma' u máan.

²³Le x burrao' ca tu yilaj u ángel Yuumtzil chúumuc le bej, u machmaj u máascabe', j ooc ichil le káaxo'; ba'ale' Balaame' tu jadzaj u ti'al u sutic te j bejo'.

²⁴Cu dzo'ocole' u ángel Yuumtzile' wa'alaj ti' jun p'éel nu'ut' bej cu káatal ichil u pakalilo'ob uva yaan u pakil tu ca'a tzéelalo'ob.

²⁵Le ca'aj ila'ab u ángel Yuumtzil tumen le x burrao', tu nacajubáa ti' jun p'éel le pako' ca tu yach'aj u muuk yooc Balaam, Balaam túune' tu ca'a jadzaj.

²⁶Ba'ale' u ángel Yuumtzile' j bin táanil ti'ob ca j wa'alaj tu'ux sen nu'ut', tu'ux ma' tu páajtal u tzelicubáa ti' mix jun tzéelil.

²⁷Le x burrao' j chilaj lu'um le ca tu yilaj u ángel Yuumtzilo'. Balaam túune' p'u'uji' ca tu jadzaj yéetel jun p'éel che'.

²⁸Ti' le súutuco' Yuumtzile' tu beetaj u t'aan le x burrao' ca tu ya'alaj ti' Balaam: ¿Ba'ax dzo'oc in beetic teech? yéetel lela' dzo'oc óox téen a jadziquen.

²⁹Ca tu núucaj Balaam ba'axten ca báaxal beyo', wa ca yanac téen jun p'éel máascabe' bejela' sáam in quíimsequeche'.

³⁰Ba'ale' le x burrao' tu ya'alaj ti': Teen a walak x burra ca nat'iquen sáamsamal, a wojel ma' in beetmaj teech mix jun téen beyo'. Jach jaaj tu núucaj Balaam.

³¹Yuumtzil túune' tu beetaj ca ila'ac u ángel tumen Balaam, ti' yaan chúumuc le bej yéetel jun p'éel máascab tu kab. Balaame' chinlaj tac cóojic u táan pool j lu'um,

³²U ángel Yuumtzil tu ya'alaj ti': ¿ba'axten ta jadzaj a walak' x burra óox téen? Teen j taalen káatal ta beel, tumen a beele' ma' utz tin táani'.

³³Le x burrao' tu yilajen, ca tu jechajen óox téen. Wa ma' úuchic u jechiquene', bejela' dzo'oc in quíimsqueche', quex leti'e' dzo'oc ca'ach in p'atic cuxa'ane'.

³⁴Balaame' tu núucaj ti' u ángel Yuumtzil: Dzo'oc in kebanchajal, tumen ma' in wojel wa teech ca kalic in beeli'. Wa ca tucultic ma' unaj ca xi'iquene', ca suunaquen.

³⁵Ba'ale' u ángel Yuumtzil tu núucaj: je'el u páajtal a bin yéetel le máaco'obo', chéen ba'ale' yaan a wa'alic ba'ax bíin in wa'al teech.

³⁶Ca tu yu'ubaj Balac táan u taal Balaame', jóok u kam ti' jun p'éel u noj caajil Moab yaan tu jáal u áalcab ja'il Arnón, tu'ux cu xu'ulul u lu'umilo'ob.

³⁷Ca tu ya'alaj: Tin sen túuxtaj t'anbilech; ¿ba'ax téen ma' ta wóoltaj taali'? ¿ca tuclic ma' bíin in dzáa teech sen tzicbe'en siibalo'obi'?

³⁸Balaame' tu núucaj: Je'elena' dzo'oc in taal in wilech. Ba'ale' mina'an páajtalil u ti'al in t'aan chéen tin wo'olal; tene' chéen bíin in wa'al le ba'ax bíin u ya'al ti' teen Kue'.

³⁹Cu dzo'ocole' Balaam yéetel Balaque' j bino'ob tac Quiriat-huzot,

⁴⁰te'elo' Balaque' tu túuxtaj quíimsbil x wacaxo'ob yéetel j tamano'ob u ti'al bisbil ti' Balaam yéetel le nuuquilo'ob láakintico'.

⁴¹Tu láak kiine', Balaque' j bin u caxant Balaame' ca tu beetaj u na'acal Batmot-baal, tu'ux páatchaj u yilic u bakpach u najilo'ob le j israelitaobo'.