Read Yucateco Números 23 Bible Online

Números 23 - Yucateco bible

Números 23

¹Tu ya'alaj túun Balaam ti': Beet teen siete u multuunilo'ob kultaj, máakant teen siete mejen wacaxo'ob yéetel siete j tamano'ob.

²Balaque' tu beetaj ba'ax tu ya'alaj Balaam, tu ca'a túulalo'obe' tu quíimsajo'ob jun túul chan wacax yéetel jun túul j taman u ti'al jujun p'éel u multuunil kultaj.

³Cu dzo'ocole' Balaame' tu ya'alaj ti' Balac: P'áaten tu yicnal le quíimsbil ba'alche'o', ca'aliquil in bin in wila'a wa cu taal Yuumtzil u nuptáantajubáa tin wéetel. Cu dzo'ocole' quin tzicbaltic teech ba'ax bíin u ya'al teen.

⁴Tu'ux chíicpaj Yuumtzil ti'; Balaame' tu ya'alaj ti': Dzo'oc in máakantic siete u multuunilo'ob kultaj, tu'ux tin kubaj jun túul chan wacax yéetel jun túul j taman ti' jujun p'éel.

⁵Yuumtzil túune' tu dzaj tu chi' Balaam le ba'ax bíin u ya'ale', ca tu ya'alaj ti': suunen tu'ux yaan Balac ca a wa'al ti' le ba'ax dzo'oc in wa'alic techa'.

⁶Suunaj Balaam ca tu nuptáantaj Balac wa'alacbal, tu tzéel le quíimsbil ba'alche'o', yéetel tuláacal u nojchililo'ob le moabitaobo'.

⁷Balaame' tu tze'ectaj le bóobatila': Tu pu'uquilo'ob j lakin, ti' Arame', Balac u ajawil Moab tu beetaj in taal. Co'oten tu ya'alaj teen, loolob t'ant Israel, dzíibolt kaas ti' u caajil Jacob.

⁸Ba'ale' ¿Bix bíin in loolob t'ant máax ma' tu loolob t'anta'al tumen Ku? ¿Bix bíin in káat kaas wa Yuumtzil ma' tu beetic?

⁹Tu ca'analil le nucuch tuunicho'obo' cu páajtal in wilic, ti' le mejen ca'anal lu'umo'obo' quin pactic: Leti'e' jun p'éel caaj jun páay caja'anil jela'an ti' le u láak caajo'obo'

¹⁰Beyo'ob sa'am lu'ume'; ¿máax je'el u páajtal u xoquic jay túulo'obe'? ¿Máax je'el u yojéeltic jay túulo'obe'? ¡Quexi' wa ca quíimiquen je'el bix le máaco'ob toj u cuxtalo'obo', ca dzo'ococ in kiinilo'obe' je'el bix le ti'obe'!

¹¹Balac túune' tu tzáa káat chi'itaj ti' Balaam: ¿Ba'ax ca beetic? tene' tin taasajech u ti'al a loolob t'ant le in aj p'eeco'obo', ba'ale' teche' dzo'oc a qui' t'antico'ob.

¹²Balaame' tu núucaj: t paaclan j kax t'antaj, chéen bíin in wa'al le ba'ax bíin u dzáa Yuumtzil tin chi'e'.

¹³Balaque' tu sen a'alaj ti': Co'oten tin wéetel tu láak cúuchil, tu'ux bíin a wil chéen u bakpach le péet caajo', ba'ale' ma' bíin a wil tuláacal u múuch'cabilo'obo'. Te'elo' loolob t'anto'ob.

¹⁴Balaque' tu bisaj Balaam tu káaxil Zofín, tu ca'analil u witzil Pisga, tu'ux tu beetaj siete u multuunilo'ob kultaj ca tu quíimsaj ti' jujun p'éele', jun túul chan wacax yéetel jun túul j taman.

¹⁵Te'elo' Balaame' tu ya'alaj ti' Balac: p'áaten tu yicnal le quíimsbil ba'alche'ob ca'aliquil táan in bin in nuptáantinbáa yéetel Ku.

¹⁶Yuumtzile' jóok u nuptáant Balaame' ca tu dzaj tu chi'e' ba'ax unaj u ya'alic. Tu ya'alaj xan ti': Suunen tu'ux yaan Balac ca a wa'al ti', le ba'ax dzo'oc in wa'alic techo'.

¹⁷Balaame' j suunaje' ca tu yilaj Balac wa'alacbal tu tzéel u multuunil kultaj láakinta'an tumen u nuuquilo'ob le j moabitaobo'. Balaque' tu káat chi'itaj: ¿ba'ax tu ya'alaj teech Yuumtzil?

¹⁸Balaam túune' tu ya'alaj le bóobatila'. Balac, u paal Zipor, u'uy in t'aan Kue' ma' je'el bix j quíimilbe'en wíinique'

¹⁹ma' tu tuus, mix tu kexic u t'aan. Le quéen u ya'al jun p'éel ba'ale', cu béeycuntic le quéen u beet jun p'éel séeb chi'e' cu dzo'ocbesic

²⁰Tu ya'alaj teen ca in qui' t'aanaquen; wa Ku cu qui' t'aane' tene' ma' tu páajtal in wa'alic ma'il ti'.

²¹Mix máac ilmail tuusil, tu caajil Israel, mix kasa'anil tu caajil Jacob. Yuumtzil u Kue' ti' yaan yéetelo'obe', leti'ob xane' cu ka'aytico'ob bey ajawe'.

²²Ti'alinta'ano'ob tumen Ku máax jóokeso'ob Egiptoe', Israele' dzíic u kóoch bey j káaxil wacaxe'.

²³Ma' tu lúubul loolob t'aano'ob yóokol Jacob mix ba'al u biilal pulya'ajo'ob ti' Israel: Bejela'e' unaj u ya'alal ti' Israel: ¡Buca'aj jak óol ba'alo'ob dzo'oc u beetic Ku ta wéetel!

²⁴Le caaja' cu líikil bey jun túul león p'uja'ane', ma' tu je'elel tac u xupic ba'ax u dzoonmae', cu yukic xan u ki'ikel u quíimsajo'ob.

²⁵Balac túune' tu ya'alaj ti' Balaam: ¡bey ma' tu páajtal a loolob t'antic le caaja', bic túun a qui' t'ante!

²⁶Ti'olal lelo' tu ya'alaj Balaam: ¿Ma' wa tin wa'alaj teech, tene' chéen bíin in wa'al ba'ax bíin u nu'ucten Yuumtzil?

²⁷Balac túune' tu ya'alaj ti': Co'oten bin in ca'aj in bisech tu láak tu'ux. Je'elajquij te'elo' ma' tu kuuxtal Ku wa ca loolob t'antic Israel líikbal te'elo'.

²⁸Beyo' Balaque' tu bisaj Balaame' tu ca'analil u pu'uquil Peor, tu'ux cu páajtal u yila'al tuláacal le x tocoy lu'umo'.

²⁹Te'elo' Balaame' tu ya'alaj ti' Balac: líikes siete u multuunil kultajo'ob máaka'ant teen siete mejen wacaxo'ob yéetel siete j tamano'ob.

³⁰Balaque' tu beetaj ba'ax a'ala'ab ti' tumen Balaam, ti' jujun p'éel multuunil tu quíimsaj jun túul chan wacax yéetel jun túul j taman.