Read Yucateco Números 24 Bible Online

Números 24 - Yucateco bible

Números 24

¹Ba'ale' le ca tu yilaj Balaam utz tu táan Yuumtzil u qui' t'antic Israele', ma' j bin tu ca'a téen u kam u láak bóobatilo'ob ti' je'el bix suuc u beetic ca'ache', ba'ale' tu sutaj u paacat te x tocoy lu'umo'.

²Ca tu yilaj Balaam jelecbalo'ob u ch'i'ibalilo'ob Israele', u pixan Kue' j ooc ti';

³Balaam túune' tu tze'ectaj le bóobatila': U péectzil Balaam, u paal Beor, wíinic taam u paacat,

⁴asab utz u paacat wa buuyul u yóol cu kamic péectzil, yaan xan náayo'ob cu dza'abal ti' tumen Ku.

⁵¡Jacob sen jadzutz a chuybil najo'ob! ¡Israel sen qui'ichquelem, a x péet caajo'ob!

⁶Beyo'ob u chowac t'o'olol xa'ano'obe', bey jadzutz pakalilo'ob tu jáal áalcab ja'e', bey u paakal áloes Yuumtzile', ¡bey ku'uk che'ob yaan tu jáal ja'e'!

⁷Israele' bíin yanac ya'abcach ja' ti' u ti'al u yuk yéetel u ti'al u jóoyabtic u paakalo'ob. U ajawe' cu pa'ic u muuk Agar; sen nojoch u páajtalil u ajawil.

⁸Cu ti'alinta'alo'ob tumen Ku, máax jóokeso'ob Egipto, Israele' dzíic u kóoch bey j káaxil wacaxe'. Bíin u p'at jayacbal lu'um le caajo'ob aj p'eeco'obo'; bíin u cach u baaquelo'ob bíin u beet loob ti'ob yéetel julubo'ob.

⁹Bey jun túul león le quéen chilac je'elele': mix máac cu táabal u yajsej. ¡Qui' t'anta'ac le máax cu qui' t'antiquecho'. Loolob t'aanac le máax loolob t'antiquecho'!

¹⁰Le ca tu yu'ubaj Balac le t'aano'oba', sen p'uja'an yéetel Balaam, ca tu p'uchaj u kab táan u ya'alic; tene' tin t'aanajech u ti'al a loolob t'ant in aj p'eeco'ob, ba'ale' teche' dzo'oc óox téen a qui' t'antico'ob.

¹¹¡Asab utz u taal teech ca suunaquech ta wotoch! tene' tin séeb chi'ita in beetic teech nucuch tzicbe'en utzo'ob, ba'ale' Yuumtzile' tu wet'aj teen.

¹²Balaame' tu núucaj: tin wa'alaj ti' a aj túuchi' t'aano'obe',

¹³quex ca a dzáaten tuláacal le oro yéetel le plata cu chupic a jala'ach naje', tene' ma' tu páajtal in j ma' u'uyaj t'antic Yuumtzil, mix in beetic kaas mix in beetic utz, tu juunal in wóol, chéen bíin in wa'al le ba'ax bíin u ya'al teno'.

¹⁴Ma'alob túun quin suut tin lu'umil; ba'ale' táanile' yaan in wa'alic teech ba'ax bíin u beet le caaj ti' a caajal, ti' le kiino'ob cu taalo'.

¹⁵Balaam túune' tu tze'ectaj le bóobatila': U péectzil Balaam, u paal Beor, wíinic taam u paacat,

¹⁶Wa buuy u yóole' u paacate' asab utz, cu kaj óoltic bin le ba'ax u kaj óoltmaj Yuumtzilo' cu kamic péectzil yéetel náayil ti' Ku ti' máax yaan tuláacal páajtalil.

¹⁷Quin wa'alic le ba'ax bíin úuchuco', quin wilic le ba'ax yaan jach náachilo': Jun p'éel eek cu jóokol ti' Jacob, jun túul ajaw cu líikil ti' Israel. Yaan u pech'ic u pool Moab, yaan u pech'ic tuláacal u ch'i'ibalo'ob Set.

¹⁸Bíin u jáanpayt Edom, bíin u ti'alt Seir, u aj p'eec óolo'. Israele' bíin u beet nucuch jak óolalo'ob.

¹⁹Jun túul mu'ukan máac bíin jóokoc ti' Jacob yéetel bíin u mix ba'alcunt le máaxo'ob cu p'áatalo'ob te' j noj caajo'.

²⁰Cu dzo'ocole' Balaame' tu yilaj Amalec, ca'a tu tze'ectaj le bóobatila': Amaleque' jun p'éel nojoch caaj, Ba'ale' bíin láaj mix ba'alcunta'ac.

²¹Tu yilaj xan le j quenitaob, ca tu tze'ectaj le bóobatila': U ch'i'ibalo'ob Caín: quex mu'uka'an tu'ux cu ta'acbescubae', quex u dzáa u ku' ich nucuch tuunicho'obe', le ku'o' yaan u xu'ulsa'al tumen káak le quéen ma'achaco'ob kalbil tumen Asiriae'.

²³Cu dzo'ocole' tu tze'ectaj le bóobatila': ¡Wáay! ¿máax bíin cuxlac le quéen u beet Ku le ba'alo'oba'?

²⁴Cu taal u cheemo'ob tu jáal u ja'il Chipre, u ti'al u mix ba'alcunta'al Asiria, yéetel Heber, tumen Hebere' yaan u xu'ulsa'al.

²⁵Cu dzo'ocol lela' Balaame' tu ch'a'aj u beel, ca suunaj tu yotoch. Balac xane' tu ch'a'aj u beel.