Read Yucateco Números 25 Bible Online

Números 25 - Yucateco bible

Números 25

¹Le j israelitaobo' j p'áato'ob je'elel Sitim, u j xiibilo'obe' jo'op' u kastalo'ob yéetel u co'olelilo'ob Moab,

²tumen leti'obe' jo'op' u páay óoltco'ob u ti'al u kubico'ob quíimsbil ba'alche'ob ti' u kuob. Le j israelitaobo' táacpajo'ob ti' u janalo'ob yéetel ti' u kultico'ob u kuob le j moabitaobo',

³beyo' tu cha'ajo'ob u jíilta'alo'ob ti' u kultajil Baal-peor. Yuumtzil túune' sen j p'u'uj ti' Israel,

⁴ca tu ya'alaj ti' Moisés: much'quint tuláacal u nuuquilo'ob le caajo', ca a quíimso'ob tin táan, tu sáasilil le kiino'. Beyo' cu jóomol u yóol in p'u'ujulil ti' Israel.

⁵Moisés túune' tu ya'alaj ti' u aj p'is óolo'ob israelitaobo': jujun túulexe' unaj u quíimsic u j xiibilo'ob u ch'i'ibalo'ob tu cha'ajo'ob u jíilta'alo'ob ti' u kultajil Baal-peor.

⁶Ba'ale' jun túul israelitae' tu bisaj tu yotoch jun túul co'olel madianil tu táan yich Moisés yéetel tu táan yich le israelitaobo', ca'aliquil much'ucbalo'ob, táan u yokolo'ob tu jool u noj Paselil Much'tal.

⁷Finees u paal Eleazar, u yáabil aj kiin Aarón, le ca tu yilaj lela' j luk ichil u múuch'cabil le j israelitaobo', ca tu machaj jun p'éel lóomte'

⁸ca bin tu paach le j israelita tac tu'ux cu wenel, te'elo' tu póot lomaj u nak le j israelitao' bey xan le co'olelo', beyo' xu'ul le báan quíimilo',

⁹quex tumen dzo'oquili' u quíimil veinte yéetel cuatro mil ti'obi'.

¹⁰Yuumtzil túune' tu t'anaj Moisés ca tu ya'alaj ti':

¹¹Fineese' dzo'oc u jáawsic in p'u'ujul ti' le j israelitaobo', tumen ti' leti'e' yanchaj le yaj óolal yanchaj ti' teen tu yo'olalo'obo'. Le beetic ma' tin cha'aj u t'onquintiquen le yaj óolalo' let o'olale' ma' tin xu'ulsajo'obi'.

¹²A'al ti'e', quin beetic yéetele' jun p'éel u nup t'aanil jéedzel,

¹³tu'ux quin kubic ti' yéetel u ch'i'ibalo'obe', u aj kiinil mina'an xu'ulul ti', tumen yanchaj ti' yaj óolal tin wo'olal beyo' tu kamaj u sa'atsaj si'ipil le j israelitaobo'.

¹⁴Le j israelita póot lomta'ab pa'ate' yéetel le x madianila' tu kaaba'intaj Zimri, u paal ca'ach Salu u nojchil u ch'i'ibalo'ob Simeón.

¹⁵Le co'olel madianilo' cu kaaba'intic ca'ache' Cozbi, u x paal Zeur, u nojchil jun p'éel múuch' u yotochnáal Madián.

¹⁶Yuumtzile' tu t'anaj Moisés ca tu ya'alaj ti':

¹⁷Xeene'ex a ba'atel te'ex le j madianilo'obo' pa'ex u muuko'ob,

¹⁸je'el bix leti'ob tu yóoltajo'ob u beet te'ex kaas, úuchic u beetico'ob a kultique'ex Baal-peor, yéetel le ba'ax úuch ti' Cozbi, u x ch'upul paal jun túul u nojchilil le madianilo'obo', quíimsa'ab yéetel jun p'éel lóomte' le ca tin túuchi'itaj báan quíimil úuchic u kultico'ob Baal-peoro'.