Read Yucateco Números 26 Bible Online

Números 26 - Yucateco bible

Números 26

¹Dzo'oc ca'ach u máan le báan quíimilo', ca tu ya'alaj Yuumtzil ti' Moisés yéetel ti' Eleazar, u paal aj kiin Aarón:

²Xoque'ex jay túul, tuláacal ichil yotochnáalilo'ob le j israelitaob dzo'oc u máan veinte u ja'abilo'ob, ma'alobo'ob u ti'al u bino'ob j ba'atelo'.

³Moisés yéetel Eleazare' tu tzolajo'ob le israelitaob tu táax lu'umil Moab, tu jáal u áalcab ja'il Jordán, actáan ti' Jerico',

⁴caaj dzíibta'ab u kaaba'ob tuláacal le dzo'oc u máan veinte u ja'abilo'obo', je'el bix tu ya'alaj Yuumtzil ti' Moisese'. Lela' leti' le j israelitaob jóoko'ob ca'ach Egiptoo':

⁵Le u cajtalil u yotochnáalo'ob u ch'i'ibalo'ob Rubén u yáax paal Israele', lelo'oba' Enoc, Falú,

⁶Hezrón yéetel Carmi;

⁷ti' u ch'i'ibal Rubene' xo'oc tu pa'ate'ile' cuarenta yéetel tres mil setecientos treinta máaco'ob.

⁸Ti' Falue' síij Eliab,

⁹ti' Eliabe' síijo'ob Nemuel, Datán yéetel Abiram, Datán yéetel Abirame' leti'ob ca'ach le j múuch' tzol t'aano'ob pa'ate' yéetel Coree', líiksaj t'aanajo'ob tu yo'olal Yuumtzil, tu yo'olal Moisés yéetel tu yo'olal Aarón,

¹⁰ba'ale' je'epaj le lu'umo' ca j lu'uko'ob leti'ob ca'a túulo'ob pa'ate' yéetel Coré, bey xan le j múuch' quíimo'obo', tumen doscientos cincuenta wíinico'ob j quíim ichil le káako'. Lela' j úuch u ti'al ka'asaj iik ti' u láako'obo'.

¹¹Ba'ale' u paalal Coree' ma' j quíimo'obi'.

¹²U cajtalil u yotochnáalo'ob Simeone', leti' lelo'oba' Nemuel, Jamín, Jaquín,

¹³Zera yéetel Saúl;

¹⁴ti' u ch'i'ibal Simeone' xo'oc tu pa'ate'ile' veinte yéetel dos mil doscientos j xiibo'ob.

¹⁵U yotochnáalo'ob u ch'i'ibal Gad, lelo'oba' zefón, Hagui, Suni,

¹⁶Ozni, Eri,

¹⁷Arod yéetel Areli;

¹⁸ti' u ch'i'ibal Gade' xo'oc tu pa'ate'ile' cuarenta mil quinientos j xiibo'ob.

¹⁹Ti' u paalal Judae', j quíimo'ob Er yéetel Onán tu lu'umil Canaán,

²⁰beyo' u yotochnáalo'ob u Ch'i'ibal Judae', lelo'oba' Sela, Fares yéetel Zara.

²¹U yotochnáalo'ob u ch'i'ibal Farese' lelo'oba' Hezrón yéetel Hamul;

²²ti' u ch'i'ibal Judae' xo'oc tu pa'ate'ile' setenta yéetel seis mil quinientos j xiibo'ob.

²³U yotochnáalo'ob u ch'i'ibal Isacare' lelo'oba' Tola, Fúa,

²⁴Jasub yéetel Simrón;

²⁵ti' u ch'i'ibal Isacare', xo'oc tu pa'ate'ile' sesenta yéetel cuatro mil trescientos j xiibo'ob.

²⁶U yotochnáalo'ob u ch'i'ibal Zabulone' lelo'oba' Sered, Elón yéetel Jahleel;

²⁷Ti' u ch'i'ibal Zabulone', xo'oc tu pa'ate'ile' sesenta mil quinientos j xiibo'ob.

²⁸U yotochnáalo'ob u ch'i'ibal Josee' lelo'oba' ti' u ch'i'ibalo'ob Manasés yéetel Efraín.

²⁹Ti' Manasese' u yotochnáalo'ob Maquir; ti' Maquire', u yotochnáalo'ob Galaad;

³⁰ti' Galaade', u yotochnáalo'ob Jezer, ti' Helec,

³¹ti' Asriel, Siquem,

³²ti' Semida, Hefer.

³³Zelofehad, u paal ca'ach Hefer, ma' j yanchaj u j xibil paalal chéen x ch'upul paalal tu kaaba'into'ob Maala, Noa, Hogla, Milca yéetel Tirsa.

³⁴Ti' u ch'i'ibal Manasese' xo'oc tu pa'ate'ile' cincuenta yéetel dos mil yéetel setecientos j xiibo'ob.

³⁵U yotochnáalo'ob u ch'i'ibal Efraine', u ti'al Sutelae', Bequer yéetel Tahán.

³⁶U ch'i'ibal Sutelae', leti'ob ca'ache' u ch'i'ibal Erán.

³⁷Ti' u ch'i'ibal Efraine' xo'oc tu pa'ate'ile' treinta yéetel dos mil quinientos j xiibo'ob. Lelo'oba' u ch'i'ibalo'ob José ti' u tzoolol u yotochnáalo'ob.

³⁸U yotochnáalo'ob u ch'i'ibal Benjamine' lelo'oba' u ti'al Belae', Asbel, Ahiram,

³⁹Sefufam yéetel Hufam.

⁴⁰U yotochnáalo'ob u ch'i'ibal Belae' Ard yéetel Naamán, u paalal Bela.

⁴¹Ti' u ch'i'ibal Benjamine' xo'oc tu pa'ate'ile' cuarenta yéetel cinco mil seiscientos j xiibo'ob.

⁴²U ch'i'ibal Dane' leti'ob ca'ache' u yotochnáalo'ob Súham.

⁴³U ch'i'ibal Súham xo'oc tu pa'ate'ile' sesenta yéetel cuatro mil cuatrocientos j xiibo'ob.

⁴⁴U yotochnáalo'ob u ch'i'ibal Aser, lelo'oba' Imna, Isúi yéetel Bería.

⁴⁵Le sijnalo'ob ti' Beriao' lelo'oba' Heber yéetel Malquiel.

⁴⁶Asere' j yanchaj jun túul u x ch'upul paal tu kaabata' Sera.

⁴⁷U ch'i'ibal Asere' xo'oc tu pa'ate'ile' cincuenta yéetel tres mil cuatrocientos máaco'ob.

⁴⁸U yotochnáalo'ob u ch'i'ibal Neftalí, u ti'al Jahzeel, Guni,

⁴⁹Jezer yéetel Silem.

⁵⁰U ch'i'ibal Neftalie' xo'oc tu pa'ate'ile' cuarenta yéetel cinco mil cuatrocientos j xiibo'ob.

⁵¹Le j israelitaob xo'oco'obo' tu dzáa seiscientos yéetel jun mil setecientos treinta j xiibo'ob.

⁵²Yuumtzile' tu t'anaj Moisés ca tu ya'alaj ti':

⁵³Ichil le máaco'obo' bíin t'o'oxoc le lu'uma', je'el jay túulo'ob le j xo'oco'obo'.

⁵⁴Le ya'ab u yotochnáalilo'obo' bíin dza'abac ti'ob ya'ab lu'um, le jun p'íite' bíin u kam jun p'íit lu'um.

⁵⁵U t'ooxil le lu'umo' bulbil bíin beeta'ac. U ch'i'ibalil jujun túule' bíin u kam le ba'ax cu ti'alintic u taatae'.

⁵⁶Le t'ooxo' bulbil bíin beeta'ac je'el bix ichil nucuch múuch'ile' bey xan ichil u mejnil.

⁵⁷U yotochnáalo'ob u ch'i'ibal j levitaobe', xo'oc lelo'oba' u ti'al Gersón, Coat yéetel Merari,

⁵⁸U yotochnáalo'ob libnitaob, hebronilo'ob, mahlilo'ob, musitaob yéetel coreitaob, lelo'oba' u ch'i'ibal Levitaob. Coat ca'ach u taata Amram.

⁵⁹Amrame' dzo'oc u beel yéetel jun túul u x ch'upul paal Leví cu kaaba'intic Jocabed, Síij ti' yaan ca'ach Leví Egiptoe'. Amram yéetel Jocabed leti'ob u taata ca'ach Aarón, Moisés yéetel María.

⁶⁰U paalal Aarone', lelo'oba' Nadab, yéetel Abiú, Eleazar Itamar,

⁶¹Nadab yéetel Abiú j quíimo'ob le ca tu ku'ubo'ob jela'an káak tu táan Yuumtzile'.

⁶²Tuláacal u ch'i'ibal Leví, máanaja'an jun winal ti'e', kuch veintitrés mil. Leti'obe' ma' xo'oco'ob ca'ach ichil u láak le j israelitaobo', tumen ma'ili' dza'abac ba'al u ti'alinto'obe'.

⁶³Buca'aj tu chucaj u xooquil tu beetaj Moisés yéetel aj kiin Eleazar tu táax lu'umil Moab, tu jáal u yáalcab ja'il Jordán, actáan ti' Jerico'.

⁶⁴Ichil tuláacalo'obe' mina'an mix jun túul ti' le j xo'oco'obo'; ti'ano'ob ca'ach le ca j tu beetaj le xooc Moisés yéetel Aarón tu x tocoy lu'umil Sinaie',

⁶⁵tumen Yuumtzile' tu ka'aytaj yaan u quíimilo'ob te x tocoy lu'umo'. Chéen Caleb, u paal Jefone', yéetel Josué, u paal Nun cuxlajo'ob, mix jun túul u láak j p'áati.