Read Yucateco Números 27 Bible Online

Números 27 - Yucateco bible

Números 27

¹Ti' u ch'i'ibalo'ob Manasese' yanchaj cinco x quiictzilo'ob, tu kaaba'intajo'ob, Maala, Noa, Hogla, Milca yéetel Tirsa, u x ch'upul paalal ca'ach Zelofhad, ti' u taalbalo'ob ca'ach ti' ch'i'ibal Hefer, Galaad, Maquir, Manasés yéetel José.

²Le cinco x quiictzilo'oba' j bino'ob tu jool u noj Paselil Much'tal u ti'al j t'aano'ob yéetel Moisés, yéetel aj kiin Eleazar, bey xan yéetel u nuuquilo'ob le caajo', ca'a tu ya'alajo'ob ti' leti'ob:

³C taatae' j quíim te x tocoy lu'umo', ba'ale' leti'e' ma' tu nupubáa yéetel le u múuch' máaco'ob j líik yóolo'ob ti' Yuumtzile'. J quíimo'ob tu yo'olal u keban, leti'e' ma' tu p'ataj j xibil paalali'.

⁴Ba'ale' ma' unaj u sa'atal u kaaba' ichil u yotochnáalo'ob chéen tumen ma' j anji u j xibil paali'. Dzáa to'on jun xéet' lu'um ichil u sucu'uno'ob c taata.

⁵Moisese' tu ya'alaj ti' Yuumtzil le ba'ax káata'ab tumen le x co'olelo'oba',

⁶Yuumtzile' tu núucaj:

⁷U x ch'upul paalal Zelofehad tu beel ba'ax cu káatico'ob. Dza'ex jun xéet' lu'um ichil le yaan ti' u sucu'uno'ob u taataobo', bey xan le ba'ax u ti'al u taataobe' máanac tu kabo'ob.

⁸A'al xan ti' le israelitaobo' wa máax cu quíimil ma' j yanchaj u j xiibil paale' le ba'al u ti'ale' bíin máanac tu kab u x ch'upul paal;

⁹ba'ale' wa mina'an mix jun túul u x ch'upul paale' bíin u p'at ti' u sucu'uno'ob;

¹⁰wa mina'an u sucu'uno'obe' bíin u p'at le ba'al u ti'ale', ti' u sucu'uno'ob u taata.

¹¹Wa u taata mina'an u sucu'uno'obe', cu p'atic ti' u láaktzil asab naadz ti'. Lela' jun p'éel a'almaj t'aan quin tzolic teech, u ti'al le j israelitaobo'.

¹²Yuumtzile' tu ya'alaj ti' Moisés: na'aquen tu pu'uquil Abarim, pact le lu'um dzo'oc in dzáic ti' le israelitaobo'.

¹³Cu dzo'ocol a pactic ma'alobe', ca quíimil u ti'al a much'icabáa yéetel a máanja'an ch'i'ibalo'ob, je'el bix a sucu'un Aarone',

¹⁴tumen ta ca'a túulale'exe' ma' ta beetaje'ex in tzol t'aano'ob tu x tocoy lu'umil Zin le ca j líik le caaj u tza'atzaj t'anteno'ob, te'exe' ma' ta tzicjene'ex tu táano'ob le ca tu káatajo'ob ja'e', (Lela' cu ya'alic tu yo'olal u sayabil Meriba, ti' Cades tu x tocoy lu'umil Zin.)

¹⁵Moisese' tu ya'alaj ti' Yuumtzil:

¹⁶Ku Yuumtzil, teech ca dzáic cuxtal ti' tuláacal máaco'obe', dzáa jun túul u nojchil ca yanac tu táan a caajal yéetel ca u bis tuláacal tu'ux u ti'al ma' u máan bey j taman mina'an u aj canane'.

¹⁸Yuumtzile' tu núucaj ti' Moisés: Josué u paal Nune', jun túul j xiib yaan ma'alob pixan ti'. Nadz ta wicnal ca a dzáa a kabo'ob tu yóokol u pool.

¹⁹Cu dzo'ocole' ca bisic tu táan aj kiin Eleazar yéetel tu táan tuláacal le caajo', u ti'al a dzáic ti' le meyajo', tu táan tuláacal le caajo';

²⁰dzáa yóokole' jun jaatz a páajtalil, u ti'al ca u'uya'ac u t'aan tumen tuláacal le j israelitaobo' u ti'al ca dzo'ocbesa'ac u t'aan.

²¹Ba'ale' Josué yaan u bin tu táan aj kiin Eleazar, Eleazare' yaan u t'aan tin wéetel tu kaaba' yéetel le Urimo'. Josué bíin u ya'al ti' le j israelitaobo', tuláacal ba'ax bíin u beeto'ob.

²²Moisese' tu beetaj je'el bix a'ala'abic ti' tumen le Yuumtzilo'. Tu ch'a'atáantaj Josuee' ca tu bisaj tu táan aj kiin Eleazar yéetel tu táan le caajo'.

²³Tu dzaj u kabo'ob tu yóokol u pool ca tu dzaj le meyaj ti'o', je'el bix tu ya'alaj Yuumtzil ti' Moisese'.