Read Yucateco Números 29 Bible Online

Números 29 - Yucateco bible

Números 29

¹Ti' u yáax kiinil le siete winalo' bíin yanac te'ex jun p'éel quili'ich much'tal. Ti' le kiino' ma' bíin a beete'ex mix jun p'éel meyaji', yaan u ka'ayta'al le kiino' yéetel u jóopsa'al paax.

²U ti'al Yuumtzile' bey utz qui'iboc láaj tóocbil ba'alche', bíin a kube'ex jun túul chan wacax, jun túul j taman yéetel siete mejen ja'abente' j tamano'ob, láaj utz u wíinclilo'ob.

³Yéetele' bíin dza'abac u ti'ibil óolalil sacan ya'ach'ta'an yéetel aceite unaj seis wuudz ti' le chan wacaxo', can wuudz tu yo'olal le j taman

⁴ca'a wuudz tu yo'olal jujun túul chan j taman.

⁵Yaan u ku'ubul xan jun túul j yuuc quíimsbil u ti'al u ka'amal sa'atsaj si'ipil tu yo'olal keban.

⁶Tu yóokol lelo' u tóocbil ba'alche'il le jujun winale', u tóocbil ba'alche'il sáamsamal, u ti'ibil óolalil janalbe'en neeko'ob yéetel xan u kaab uva, je'el bix tu ya'alaj Kue'. Lela' jun p'éel tóocbil ti'ibil óolal qui'iboc ti' u tzicbe'enil Yuumtzil.

⁷U kiinil diez láili' ti' le winal sieteo', bíin yanac te'ex jun p'éel quili'ich much'tal. Ti' le kiino' yaan a su'ukine'ex ma' bíin a beete'ex xan mix jun p'éel meyaji'.

⁸Bey utz qui'iboc láaj tóocbil ba'alche' u ti'al Yuumtzil, bíin ku'ubuc jun túul chan wacax, jun túul j taman yéetel siete ja'abente'ob mejen j tamano'ob láaj utz u wíinclilo'ob,

⁹bíin dza'abac xan u ti'ibil óolalil sacan ya'ach'ta'an yéetel aceite unaj seis wuudzo'ob tu yo'olal jun túul chan wacax, can wuudz tu yo'olal jun túul j taman,

¹⁰ca'a wuudz tu yo'olal jun túul chan j taman.

¹¹Bíin ku'ubuc xan jun túul j yuuc quíimsbil tu yo'olal keban, pa'ate' yéetel quíimsbil ba'alche' tu yo'olal keban cu ku'ubul tu kiinil sa'atsaj si'ipil, pa'ate' yéetel le sáamsamal láaj tóocbil ba'alche' yéetel u ti'ibil óolal janalbe'en neeko'ob yéetel xan u kaab uva.

¹²Tu quince kiinil láili' ti' le winal sieteo' bíin yanac te'ex quili'ich much'tal. Ti' le kiino' ma' unaj a beetique'ex mix jun p'éel meyaji'. Buul siete kiino'ob bíin a kiinbese'ex chéen ti' u tzicbe'enil Yuumtzil.

¹³Tu yáax kiine' bíin ku'ubuc ti' Yuumtzil bey utz qui'iboc láaj tóocbil ba'alche', trece mejen wacax, ca'a túul j taman yéetel catorce ja'abente' mejen j tamano'ob láaj utz u wíinclilo'ob.

¹⁴Bíin dza'abac xan u ti'ibil óolalil sacan ya'ach'ta'an yéetel aceite unaj seis wuudz tu yo'olal jujun túul mejen wacax, can wuudz tu yo'olal jujun túul j tamano'ob,

¹⁵ca'a wuudz tu yo'olal jujun túul chan j taman.

¹⁶Bíin ku'ubuc xan jun túul j yuuc quíimsbil tu yo'olal keban, pa'ate' yéetel le sáamsamal láaj tóocbil ba'alche'o' pa'ate' yéetel u ti'ibil óolalil janalbe'en neeko'ob yéetel xan u kaab uva.

¹⁷Tu ca'a p'éel kiine' bíin ku'ubuc doce mejen wacax, ca'a túul j taman yéetel catorce mejen tamano'ob ja'abente'ob láaj utz u wíinclilo'ob.

¹⁸Bíin beeta'ac u ti'ibil óolalil janalbe'en neeko'ob, yéetel xan u kaab uva, je'el buca'aj u ya'abil mejen wacax, j tamano'ob yéetel mejen j tamano'ob, je'el bix a'ala'abic tumen Kue'.

¹⁹Bíin ku'ubuc xan jun túul j yuuc bey quíimsbil ba'alche' tu yo'olal keban, pa'ate' yéetel le sáamsamal láaj tóocbil ba'alche', yéetel u ti'ibil óolalil janalbe'en neeko'ob yéetel xan u kaab uva.

²⁰Tu yóox p'éel kiine' bíin ku'ubuc once mejen wacax, ca'a túul j taman yéetel catorce mejen j tamano'ob ja'abente'ob láaj utz u wíinclilo'ob.

²¹Bíin beeta'ac u ti'ibil óolalil janalbe'en neeko'ob yéetel xan u kaab uva je'el jay túul le mejen wacax, le j taman yéetel mejen j tamano'ob je'el bix a'ala'abic tumen Kue'.

²²Bíin ku'ubuc jun túul j yuuc u ti'al quíimsbil tu yo'olal keban, pa'ate' yéetel le sáamsamal láaj tóocbil ba'alche', pa'ate' u ti'ibil óolalil janalbe'en neeko'ob yéetel xan u kaab uva.

²³Tu can p'éel kiine' bíin ku'ubuc diez mejen wacax, ca'a túul j taman yéetel catorce mejen j tamano'ob ja'abente'ob láaj utz u wíinclilo'ob.

²⁴Bíin beeta'ac u ti'ibil óolalil janalbe'en neeko'ob yéetel xan u kaab uva je'el bix buca'aj u ya'abil le mejen wacaxo'obo', j taman yéetel chan j tamano', je'el bix a'ala'abic tumen Ku.

²⁵Bíin ku'ubuc xan jun túul j yuuc quíimsbil tu yo'olal keban, pa'ate' yéetel le láaj tóocbil ba'alche' cu ku'ubul sáamsamal yéetel u ti'ibil óolalil janalbe'en neeko'ob yéetel xan u kaab uva.

²⁶Tu jo' p'éel kiine' bíin ku'ubuc nueve mejen wacax, ca'a túul j taman yéetel catorce mejen j tamano'ob ja'abente'ob láaj utz u wíinclilo'ob.

²⁷Bíin beeta'ac u ti'ibil óolalil janalbe'en neeko'ob yéetel xan u kaab uva je'el jay túul le mejen wacaxo'obo', j taman yéetel mejen j tamano'ob, je'el bix a'ala'abic tumen Kue'.

²⁸Bíin ku'ubuc jun túul j yuuc quíimsbil tu yo'olal keban, pa'ate' yéetel láaj tóocbil ba'alche' sáamsamal yéetel u ti'ibil óolalil janalbe'en neeko'ob yéetel xan u kaab uva.

²⁹U seis kiine' bíin ku'ubuc ocho mejen wacax, ca'a túul j tamano'ob yéetel catorce ja'aben j tamano'ob láaj utz wíinclilo'ob

³⁰Bíin beeta'ac u ti'ibil óolalil janalbe'en neeko'ob yéetel xan u kaab uva je'el jay túul le mejen wacaxo'obo', j taman yéetel mejen j tamano'ob, je'el bix a'ala'abic tumen Kue'.

³¹Bíin ku'ubuc xan jun túul j yuuc quíimsbil tu yo'olal keban, pa'ate' yéetel le láaj tóocbil ba'alche' cu ku'ubul sáamsamal yéetel u ti'ibil óolalil janalbe'en neeko'ob yéetel xan u kaab uva.

³²Tu siete kiin yaan u ku'ubul siete mejen wacaxo'ob, ca'a túul j taman yéetel catorce mejen ja'abente' j tamano'ob, láaj utz u wíinclilo'ob.

³³Bíin beeta'ac u ti'ibil óolalil janalbe'en neeko'ob yéetel xan u kaab uva, je'el buca'aj u ya'abil wacaxo'ob, j tamano'ob yéetel mejen j tamano'ob je'el bix a'ala'abic tumen Kue'.

³⁴Yaan xan u ku'ubul jun túul j yuuc quíimsbil ba'alche' tu yo'olal keban pa'ate' yéetel láaj tóocbil ba'alche' sáamsamal pa'ate' yéetel u ti'ibil óolalil janalbe'en neeko'ob yéetel xan u kaab uva.

³⁵Tu ocho kiine' bíin kiinbesa'ac jun p'éel quili'ich múuch'cabil, ma' bíin beeta'ac mix jun p'éel meyaji'.

³⁶Bíin ku'ubuc bey láaj tóocbil utz qui'iboc ti' Yuumtzil jun túul chan wacax, jun túul j taman yéetel siete ja'abente' mejen j tamano'ob láaj utz u wíinclilo'ob.

³⁷Yéetel yaan u beeta'al u ti'ibil óolalil janalbe'en neeko'ob, yéetel xan u kaab uva tu yo'olal le wacaxo', le j tamano' yéetel le mejen j tamano'ob je'el bix a'ala'abic tumen Kue'.

³⁸Yaan xan u ku'ubul jun túul j yuuc u ti'al quíimsbil ba'alche' tu yo'olal keban, pa'ate' yéetel le láaj tóocbil ba'alche' sáamsamal yéetel u ti'ibil óolalil janalbe'en neeko'ob, yéetel xan u kaab uva.

³⁹Lela' leti' le quíimsbil ba'alche' bíin ku'ubuc ti' Yuumtzil ti' le kiino'ob jóokesa'ano'ob u ti'alo'obo', yaan xan a kubique'ex u ti'ibil óolal u dzo'ocbesa'al a séeb chi'ex wa quex bey chéen tu juunal óolal, wa quex bey láaj tóocbil ba'alche' wa u ti'ibil óolalil janalbe'en neeko'ob, wa bey quíimsbil ba'alche' u ti'al ca'a bisajbáil.

⁴⁰Moisese' tu ya'alaj ti' lej israelitaobo' je'el bix a'ala'abic tumen Yuumtzile'.