Read Yucateco Números 3 Bible Online

Números 3 - Yucateco bible

Números 3

¹Lelo'oba' u ch'i'ibalo'ob Aarón yéetel Moisés le kiin ca j t'a'an Moisés tumen Yuumtzil tu witzil Sinaí:

²U paalal Aarón: Nadab, u nojchil, Abiú, Eleazar yéetel Itamar.

³Tu can túulil jun páaycunta'abo'ob yéetel j dzaab páajtalil u ti'al u meyajo'ob bey aj kiino'obe',

⁴ba'ale' Nadab yéetel Abiue' j quíimo'ob tu táan Yuumtzil tumen tu táanbeso'ob káak jela'an tu x tocoy lu'umil Sinaí, leti'obe', ma' yanchaj u paalali'. Eleazar yéetel Itamar túune' tu beetajo'ob u aj kiinilo'ob je'el bix nu'ucta'abic ti'ob tumen Aarón u taataobe'.

⁵Yuumtzile' tu t'anaj Moisés ca tu ya'alaj ti':

⁶T'aan u ch'i'ibalo'ob Leví u ti'al ca yanaco'ob yáanal u tusbeel Aarón, ca u meyajto'ob.

⁷Bíin meyajnaco'ob u ti'al Aarón yéetel tuláacal le caajo', tu táan u noj Paselil Much'tal, u ti'al u beetico'ob u meyajilo'ob quili'ich naj.

⁸Leti'ob xan bíin u cananto'ob tuláacal u nu'uculilo'ob le u noj Paselil Much'talo', yéetel bíin meyajnaco'ob u ti'al tuláacal le j israelitaob ti' tuláacal u meyajilo'ob le quili'ich najo'.

⁹Jun páaycunt le j levitaob ti' u chuca'an j israelitaobo', ca u meyajto'ob chéen Aarón yéetel u ch'i'ilancab,

¹⁰p'at xan tu kab Aarón yéetel u ch'i'ibalo'ob u meeyjul aj kiinil. Wa yaan máax cu beetic u meeyjul aj kiin, ma' aj kiine' leti'e' yaan u xotkinta'al j quíimil.

¹¹Yuumtzile' tu t'anaj Moisés tu x tocoy lu'umil Sinaí ca tu ya'alaj ti':

¹²Ichil le j israelitaobo' dzo'oc in yéeyic le j levitaob u ti'al u keexintic u yáax paal ti' u jujun p'éel naj. Leti'obe' in ti'alo'ob,

¹³tumen tuláacal yáax paale' in ti'al. Le ca tin láaj quíimsaj u yáax paal le j egipciobo', tin jun páaycuntaj in ti'alint u yáax paal le j israelitaobo' bey xan u yáax aal u yalak ba'alche'ob. Le t o'olale' in ti'alo'ob. Tene' Yuumtzilen.

¹⁴Yuumtzile' tu t'anaj Moisés tu x tocoy lu'umil Sinaí ca tu ya'alaj ti':

¹⁵Xoc jay túul le j levitaob tu tzoolol u yotocho'ob yéetel u cajtalil u yotochnáalo'ob, dzíibt xan u kaaba'ob le j xiibo'ob yaan maanal jun winal ti'obo'.

¹⁶Moisese' tu dzíibtaj jay túulo'ob je'el bix tu ya'alajilac Yuumtzile'.

¹⁷U paalal Levie', Jersón, Coat yéetel Merari.

¹⁸U ch'i'ibal Gersón tu tzoolol u cajtalil yotochnáalo'obe', Libni yéetel Simei.

¹⁹U ch'i'ibal Coat tu tzoolol u yotochnáalo'obe', Amram, Izhar, Hebrón yéetel Uziel.

²⁰U ch'i'ibal Merari, tu tzoolol u cajtalil u yotochnáalo'obe', Mahli yéetel Musi. Tuláacal le je'elo'oba' u ch'i'ibalo'ob Leví tu tzoolol u yotochnáalo'ob.

²¹U cajtalil yotochnáalo'ob Gersone' lelo'ob ca'acha' Libni yéetel Simei.

²²Tu pa'ate'il le j xiibo'ob dzíibta'ab u kaaba'ob le yaan maanal jun winal ti'obe', siete mil quinientos.

²³Tuláacal le u cajtalil otochnálo'oba' cu je'elelo'ob ca'ach tu chikin u paach le quili'ich najo'.

²⁴U nojchil u yotochnáalo'ob u ch'i'ibal Gersón, Eliasaf ca'achi, u paal Lael.

²⁵Tu noj Paselil Much'tale', leti'ob ca'ach canantic le quili'ich naj yaan ichil le noj Paselo', u pix beeta'an yéetel kéewelo'ob, le káasab yaan tu jool le noj Paselo',

²⁶u káasabilo'ob le x péetpaacho', le káasab yaan tu jool le x péetpaach súut bakpachtmail le quili'ich najo' yéetel u multuunil kultajo', bey xan tuláacal u suumilo'ob.

²⁷U cajtalil u yotochnáalo'ob ca'ach Coate' leti'elo'oba' Amram, Ishar, Hebrón yéetel Uziel,

²⁸tu pa'ateil u j xiibilo'ob dzíibta'ab u kaaba'ob le yaan maanal jun winal ti'obo', ocho mil trescientos. Le u cajtalil le otochnáalo'oba' leti'ob canantic ca'ach le quili'ich najo',

²⁹cu je'elelo'ob ca'ach tu noojol le quili'ich najo'.

³⁰U nojoch u cajtalil le otochnáalo'oba' Elizafán u paal Uziel.

³¹U cajtalil le otochnáalo'oba' leti'ob canantic ca'ach u ba'asche'il nup t'aan, le táasche', le x t'uchub sáas, le u multuunilo'ob kultaj, le quili'ich ba'alo'ob kabéeto'ob u ti'al yúuchul kultajo', le káasabo' yéetel tuláacal u nu'uculo'ob.

³²U jach nojchil le j levitaob ca'acho', Eleazar, u paal aj kiin Aarón leti' ca'ach ilic máaxo'ob canantic le quili'ich najo'.

³³U cajtalil u yotochnáalo'ob Merari ca'ache', Mahli yéetel Musi.

³⁴Tu pa'ate'il le j xiibo'ob dzíibta'ab u kaaba'ob le yaan maanal jun winal ti'obe', seis mil doscientos.

³⁵U nojoch ca'ache' Zuriel u paal Abihail, jelecbalo'ob ca'ach tu xaman le quili'ich najo'.

³⁶U cajtalil u yotochnáalo'ob Merari leti'ob canantic ca'ach u bujbil che'ilo'ob le quili'ich najo', u x katáabilo'ob, u yocomilo'ob, u nu'ucul u yedztalo'ob yéetel tuláacal u nu'uculo'ob,

³⁷bey xan le ocomo'ob bakpachtic le le x péetpaacho', u nu'ucul u yedztalo'ob u mejen che'ilo'ob yéetel u suumilo'ob.

³⁸Tu tzéel j lakin, actáan ti' le quili'ich naj tu táan le u noj Paselil Much'talo', ti' ca'ach yaan u paselo'ob Moisés, Aarón yéetel u paalal, máaxo'ob canantic le quili'ich naj tu kaaba' u chuucáan le j israelitaobo'. Wa yaan máax ca'ach cu beetic u meyaj aj kiin wa ma' aj kiine', cu xot kinta'al quíimil.

³⁹Le ca j xo'oc jay túulo'ob le j levitaob tumen Moisés yéetel Aarón tu tzoolol u yotochnáalilo'ob je'el bix tu ya'alajilac Yuumtzile', le j xiibo'ob yaan maanal jun winal ti'obo' veinte mil tu pa'ateilo'ob.

⁴⁰Yuumtzile' tu ya'alaj ti' Moisés: Xoc jay túul u yáax paalal le j israelitaob yaan maanal jun winal ti'ob, ca dzíibta'ac u kaaba'ob.

⁴¹Cu dzo'ocole', u keexil u yáax paal le j israelitaobo', jun páaycunt teen le j levitaobo'. Tene', Yuumtzilen. Bey xano', u keexil u yáax aal u wacaxo'ob le j israelitaobo' jun páaycunt u wacax le j levitaobo'.

⁴²Moisese' tu xocaj jay túul u yáax paal le j israelitaob je'el bix tu ya'alajilac Yuumtzilo',

⁴³tu pa'ate'il le j xiibo'ob j dzíibta'ab u kaaba'ob yaan maanal jun winal ti'obo', chúucpaj veintidós mil sesenta yéetel óox túul.

⁴⁴Yuumtzil túune' tu t'anaj Moisese' ca tu ya'alaj ti':

⁴⁵Ch'a'a le j levitaob u keexint u j yáax paalal le j israelitaobo', bey xan u wacax le j levitaob u ti'al u keexint yéetel u wacax le j israelitaobo' tumen le j levitaobo' in ti'alo'ob. Tene' Yuumtzilen.

⁴⁶Ba'ale' u yáax paalal le j israelitaob, asab ya'abilo'ob ti' le j levitaobo', le t o'olale' u ti'al u bo'olal doscientos setenta yéetel óox túul u maanalile',

⁴⁷káat u bo'olal cinco sac taakino'ob tu yo'olal u jujun túul máac je'el bix le p'iisil chéen u ti'al le quili'ich najo', lelo' jun p'éel sac taakin yaan once gramos ti',

⁴⁸cu dzo'ocole', kub ti' Aarón yéetel ti' u paalal u tojol u bo'olilo'ob.

⁴⁹Moisese' tu molaj u taakinil u bo'olal j yáax paalal le j israelitaobo' u tip' maanalil,

⁵⁰tu molaj mil trescientos yéetel cinco sac taakino'ob je'el bix le p'is chéen u ti'al le quili'ich najo'.

⁵¹Cu dzo'ocole' tu kubaj le taakin ti' Aarón yéetel ti' u paalal je'el bix a'ala'abic ti' tumen Yuumtzile'.