Read Yucateco Números 31 Bible Online

Números 31 - Yucateco bible

Números 31

¹Yuumtzile' tu t'anaj Moisés ca tu ya'alaj ti':

²Sut u jeel jaadz ti' le madianil tu kaaba' le israelitaobo', cu dzo'ocole' ca quíimil.

³Moisés túune' tu ya'alaj ti' le caajo': dze'edzec ti' te'exe' u ch'a'a' u nu'ucul ba'atel u ti'al a ba'ateltique'ex le j Madianilo', u ti'al a sutique'ex ti'ob u jeel jaadz, tu kaaba' Yuumtzil.

⁴Ti' jujun p'éel a múuch' cajtalil a wotochnáale'exe' yaan a túuxtique'ex mil máaco'ob ma'alobo'ob u ti'al ba'atel.

⁵Bey túuno', ti' u múuch' cajtalil otochnáalo'ob jujun múuch' aj ba'atelo'oba' yéeya'ab mil j xiibo'ob, u ti'al u chuquic tu pa'ate'ile' doce mil máaco'ob ma'alobo'ob u ti'al j ba'atel.

⁶Moisese' tu túuchi'itajo'ob ba'atel yéetel Finees, u paal aj kiin Eleazar, leti' máax táan u bisic quili'ich ba'alo'ob yéetel le jóopsbil paaxo'ob u ti'al j pa'axal quéen chúunuc le ba'atelo'.

⁷Beyo' tu ba'ateltajo'ob le j madianilo' ca tu láaj quíimso'ob je'el bix tu ya'alaj Yuumtzil ti' Moiseso'.

⁸Quíimsa'ab Evi, Requem, Zur, Hur yéetel Reba, u káat ya'ale' cinco u ajaw le j madianilo'ob, yéetel Balaam, u paal Beor.

⁹Le j israelitaobo' tu bisajo'ob kala'anil u co'olelilo'ob madián, u mejen paalal, ca'a tu lukesajo'ob tuláacal u yalak ba'alche'ob u wacaxo'ob yéetel le ba'alo'ob co'oj u tojolo'.

¹⁰U láak ba'ale', tu tóocajo'ob tuláacal u noj caajo'ob yéetel u x péet caajo'ob.

¹¹Tuláacal le ba'ax lukesa'ab ti'obo', le u cajnáalilo'ob yéetel u ba'alche'obo',

¹²tu bisajo'ob ti' Moisés yéetel ti' aj kiin Eleazar, yéetel ti' u caajil Israel, jelecbal tu táax lu'umil Moab tu jáal Jordán, actáan ti' Jericó.

¹³Moisés, yéetel aj kiin Eleazar yéetel tuláacal u nuuquilo'ob le caajo', jóoko'ob tu paach caaj u ti'al u kamico'ob.

¹⁴Ba'ale' Moisese' kuuxchaj yéetel le u nuuquilo'ob le aj ba'atelo'ob máaxo'ob méektáantic mili', yéetel ti' cien cu taalo'ob ti' le ba'atelo',

¹⁵ca'a tu ya'alaj ti'ob: ¿ba'axten ta p'ate'ex cuxa'an le co'olelo'obo'?

¹⁶Le ca'aj t'a'an Balaam ca loobilt u caajal Kue', leti' le co'olelo'ob j bis le j israelitaob u j ma' u'uyaj t'anto'ob Yuumtzil, yéetel ca u kulto'ob Baal peor, let o'olale' Yuumtzile' tu jadzaj u caajal yéetel báan quíimil.

¹⁷Séeba'an, quíimse'ex tuláacal le mejen j xibil paalalo'ob yéetel tuláacal le co'olelo'ob ma' x sujuyo'obo'.

¹⁸Le x sujuy x ch'úupalo'obo' p'ate'ex u cuxtalo'ob u ti'al ca p'áatac te'ex.

¹⁹Tuláacal le dzo'oc u quíimsic wa máax, wa dzo'oc u machic jun túul quimene', p'áatac tu paach caaj siete kiino'ob. Te'ex, bey le kalbil máaco'obo', yaan u láaj p'áatal utz yanile'ex tu óox p'éel kiin tac tu siete kiin.

²⁰Yaan xan u p'áatal utz yanil tuláacal u nooko'ob je'el bix tuláacal le kéewel ba'alo'obo', u tzo'otzel j yuuc wa le ba'ax beeta'an yéetel che'o'.

²¹Aj kiin Eleazare' tu ya'alaj ti' tuláacal le aj ba'atelo'ob dzo'oc ca'ach u ba'atelo'obo': lela' jun p'éel a'almaj t'aan tu dzaj Yuumtzil ti' Moisés:

²²Le ba'alo'ob beeta'an yéetel oro, plata, bronce, fierro, estaño wa plomoe'

²³u káat ya'ale', tuláacal ba'ax ma' elelbe'ene' unaj láaj utztal ich káak yéetel cu p'o'obol yéetel u ja'il utzil sayab. Le ba'alo'ob elelbe'eno'obe' unaj u p'o'obol chéen yéetel ja'.

²⁴Tu siete kiine' yaan u p'o'ico'ob u nook, beyo' cu p'áatalo'ob utz yanilo'ob, cu dzo'ocole' je'el u páajtal u yocolo'ob te j caajo'.

²⁵Yuumtzile' tu ya'alaj ti' Moisés:

²⁶Yéetel u yáantaj aj kiin Eleazar yéetel le u nojchilo'ob u cajnáalilo'ob le caajo', xoc jay túul máaco'ob, jay túul ba'alche'ob j to'oc ti' le j madianilo'obo'.

²⁷Láajquet jóokes ca'a jaatzil ti', ca a t'ox jun jaatz ti' le j bino'ob ba'atelo' u láak jaatze' u ti'al le caajo'.

²⁸Jóokes in ti'ale' jun jaatz ti' le ta dzaj ti' le aj ba'atelo'obo', jun túul ich quinientos máaco'ob, jun túul ich quinientos wacaxo'ob, jun túul ich quinientos burro'ob yéetel jun túul ich quinientos j tamano'ob

²⁹ca a dzáa ti' aj kiin Eleazar bey bo'olal in ti'ale'.

³⁰Le u láak táancocho' leti' le ta dzaj ti' le israelitaobo', jóokes xan ichil cien máaco'obe' jun túul, ichil cien burro'obe' jun túul, ichil cien j tamano'obe' jun túul, bey ti' tuláacal le ba'alche'obo', yaan a ch'a'ic jujun túul ichil cincuenta u ti'al a dzáic ti' le j levitaob táan u meyajo'ob tin quili'ich naj.

³¹Moisés yéetel Eleazare' tu beetajo'ob je'el bix tu ya'alaj Yuumtzil ti' Moiseso'.

³²Tuláacal le ba'ax to'oc ti' le aj p'eeco'obo', jun páay le tu molaj le aj ba'atelo'obo', lelo' tu dzaj seiscientos setenta yéetel cinco mil j tamano'ob,

³³setenta yéetel dos mil wacaxo'ob,

³⁴setenta yéetel jun mil burro'

³⁵yéetel treinta yéetel dos mil x sujuy x ch'úupalo'ob.

³⁶le t o'olale' le táancoch t'o'ox ti' le aj ba'atelo'obo' lela', trescientos treinta yéetel cinco mil quinientos j tamano'ob,

³⁷ti' le buca'ajo' j dza'ab seiscientos setenta yéetel cinco bey bo'olal ti' Yuumtzile';

³⁸ti' le treinta yéetel seis mil wacaxo'ob dza'ab sesenta yéetel dos bey bo'olal ti' Yuumtzil;

³⁹ti' le treinta mil quinientos burro'ob dzaab sesenta yéetel jun túul bey bo'olal ti' Yuumtzil;

⁴⁰ti' le dieciséis mil x ch'úupalal dzaab treinta yéetel dos bey bo'olal ti' Yuumtzil.

⁴¹Moisese' tu kubaj u ti'al Yuumtzil le bo'olalo'obo' ti' aj kiin Eleazar, je'el bix tu ya'alaj Yuumtzile'.

⁴²U láak táancoch, bíin t'o'oxoc ichil le israelitaobo', le jun páaycunta'ab tumen Moisés u ti'al aj ba'atelo'obo',

⁴³jach láili' buca'ajo', u káat ya'ale' trescientos treinta yéetel siete mil quinientos j tamano'ob,

⁴⁴treinta yéetel seis mil wacaxo'ob,

⁴⁵treinta mil quinientos burro'ob

⁴⁶yéetel dieciseís mil x ch'úupalal.

⁴⁷Ti' le táancocho', Moisese' tu jóokesaj jun túul ti' cincuenta, máaco'ob bey xan ti' ba'alche'ob, ca tu dzaj ti' j levitaob cu meyajo'ob tu quili'ich naj Yuumtzil, jach je'el bix tu ya'alajilac Yuumtzile'.

⁴⁸Le u nojchil aj ba'atelo'ob tu méektáanto'ob mil yéetel ti' cien aj ba'atelo'ob, j bino'ob u yilo'ob Moisés

⁴⁹ca tu ya'alajo'ob ti': to'on a aj meyajo'one' dzo'oc xoquic le aj ba'atelo'ob j bino'ob t éetelo' ca t ilaj mix jun túul cu binetiqui'.

⁵⁰Je'el c taasic le ba'alo'ob beeta'an yéetel oro tu caxtaj jujun túulilo': U x bakal muuk kabo'ob, u x bakal kabo'ob, u x dzipito'ob yéetel u láak jadzudz ba'alo'ob, u ti'al c kubic ti' Yuumtzil bey u tojol c cuxtale'.

⁵¹Moisés yéetel Eleazare' tu kamajo'ob ti' leti'ob tuláacal qui'ichquelem ba'alo'ob beeta'an yéetel oroo'.

⁵²Le oro bey bo'olal tu kubaj u nojchilo'ob le yaan tu táan mil ba'atelo'obe', u p'iise' maanal ciento ochenta yéetel cuatro kilos,

⁵³tumen jujun túul j ba'atele' tu taasaj ca'ach le ba'ax tu lukesaj ti' le aj p'eeco'.

⁵⁴Beyo' Moisés yéetel Eleazare' tu kamajo'ob ti' le u nojchil aj ba'atel le oro tu taasajo'obo', ca tu bisajo'ob tu Noj Paselil Much'tal u ti'al ca ka'ajac ti' Yuumtzil le j israelitaobo'.