Read Yucateco Números 32 Bible Online

Números 32 - Yucateco bible

Números 32

¹U ch'i'ibalo'ob Rubén yéetel Gade' yaan ca'ach ya'ab wacax ti'ob. Le ca tu yilajo'ob ma'alob u lu'umil Jaser yéetel Galaad u ti'al u tzéenta'al wacaxe',

²j bino'ob u yilo'ob Moisés, yéetel aj kiin Eleazar yéetel u nojchilo'ob le caajo', ca tu ya'alajo'ob ti' leti'ob:

³Il a wile'ex le cúuchil tu'ux yaan Atarot, Dibón, Jazer, Nimra, Hesbón, Eleale, Sebam, Nebo yéetel Beone',

⁴Yuumtzile' dzo'oc u toquic u ti'al u caajil Israel, lelo' ma'alob lu'um u ti'al u tzéenta'al wacax, leti' le ba'ax jach yaan to'on a aj meyajo'ono'.

⁵wa ma'alob a tuclique' dzáato'on le lu'umo' yéetele' ma' beetic c ch'actic u áalcab ja'il Jordán.

⁶Ba'ale' Moisese' tu núucaj ti'ob ¿A káate'ex p'áatal te'ela' ca'aliquil a láake'exo'obe' táan u bino'ob j ba'atel?

⁷¿Ba'axten a káat a lúubse'ex u yóol le israelitaob u ti'al ma' u máano'ob ti' le lu'um dzo'oc u dza'abal ti'ob tumen Yuumtzilo'?

⁸Bey tu beetajilac a taataex le ca tin túuchito'ob Cades-barnea u ti'al u xakalt ilico'ob le lu'umo'.

⁹Kucho'ob tac tu t'o'ol ja'il Escol ca tu xakal ilo'ob le lu'umo', cu dzo'ocole' tu lúubso'ob u yocolo'ob le israelitaobo' u ti'al ma' u yocolo'ob te j lu'um dzo'oc ca'ach u dza'abal ti'ob tumen Yuumtzilo'.

¹⁰Le t o'olale' Yuumtzile' kuuxchaj le kiinaco' ca tu jalach t'antaj

¹¹le máaco'ob dzo'oc u jóokolo'ob Egipto maanal veinte u ja'abo'obe' ma' bíin u yilo'ob le lu'umo' tumen ma' j bino'ob yéetel chuca'an óolal, je'el bix tin séeb chi'itaj ti' Abraham, ti' Isaac yéetel ti' Jacob.

¹²Chéen Caleb u paal Jefone j cenezil yéetel Josué, u paal Nun, chúucpaj yóolo'ob ti' Yuumtzil.

¹³Le beetic Yuumtzile' kuuxchaj yéetel le israelitaobo' ca tu beetaj u xíimbaltico'ob cuarenta ja'abo'ob le x tocoy lu'umo' tac ca láaj j quíim le máaxo'ob ma' tu tzico'ob u t'aan Yuumtzil táan u beetico'ob kaakas ba'alo'ob.

¹⁴Bejela'e' te'ex u paalale'ex j keban wíinico'obe', a káat a beete'ex le ba'ax tu beetaj a taataex, u ti'al a beetique'ex u p'u'ujul tu ca'a teen Yuumtzil ti' Israel.

¹⁵Wa te'ex ma' a káate'ex bin tu paach Yuumtzile', leti' bíin u beet ca p'áataque'ex ya'ab kiino'ob te x tocoy lu'uma', ti' te'ex yaan u si'ipilil wa ca xu'ulsa'aque'ex.

¹⁶Tu nadzajuba'ob túun ti' Moisese' ca tu ya'alajo'ob: Ba'ax c káate' ca c káat coot tu'ux c bíin c kal c tamano'ob yéetel c wacax, bey xan caajo'ob u ti'al c otochnáalo'ob.

¹⁷Cu dzo'ocole' to'one' bíin xi'ico'on ba'atel tu táan le u láak israelitaob tac c bisico'ob tu lu'umilo'ob. Ba'ale' ca'aliquil c otochnáalo'obe' bíin p'áatco'ob ti' le caajo' toj yóolo'ob, mix máac ti' le caja'ano'ob te'ela' bíin u beeto'ob mix ba'al ti'ob.

¹⁸Ma' bíin suunaco'on t otoch wa ma' láaj ococ le j israelitaob cajtal tu lu'umo'obo',

¹⁹je'el bix bíin c ti'alint le lu'um yaan tu tzéel u lakin u yáalcab ja'il le Jordano', ma' bíin c kam u láak lu'umo'ob yaan tu jáal u láak tzéelil Jordano' mix tu láak tu'ux.

²⁰Moisese' tu núucaj ti'ob: wa ca dzo'ocbesique'ex a t'ane'ex yéetel ca bine'ex yéetel u nu'ucul ba'atel je'el bix u tzolbe'en t'aan Yuumtzile',

²¹wa tuláacale'ex ca ch'actique'ex u yáalcab ja'il Jordán u ti'al j ba'atel je'el bix u tzolbe'en t'aan Yuumtzil, yéetel ca p'áatale'ex tac le quéen dzo'ococ u láaj tze'elel le aj p'eeco'ob tumen Yuumtzilo',

²²le quéen dzo'ococ u to'ocol le lu'umo', cu páajtal a suute'ex túun, tumen ca p'áatale'ex mina'an a si'ipilex' ti' le t'aan ta beetaje'ex yéetel Yuumtzilo' bey xan yéetel Israel, le lu'uma' bíin a ti'alinte'ex yéetel u éejemcunaj Yuumtzil.

²³Ba'ale' wa ma' ta dzo'ocbesique'ex beyo', ojéelte'ex ca kebantale'ex tu táan Yuumtzil, jun p'éel kiine' bíin kuchuc u jaadzil le kebano'.

²⁴Beete'ex le noj caajo'ob u ti'al a wotochnáale'ex, cote'ex tu'ux bíin a kale'ex a j tamane'ex, chéen ba'ale' dzo'ocbese'ex a kax t'ane'ex.

²⁵U múuch' cajtalitalilo'ob u yotochnáalo'ob Gad yéetel Rubene' tu núucajo'ob: le a aj palitzilo'oba' bíin u beeto'ob le ba'ax dzo'oc a wa'alica'.

²⁶C atano'ob yéetel c mejen paalal, yéetel c wacax je'el bix tuláacal c ba'alche'obe' cu p'áatalo'ob way, tu caajilo'ob Galaade',

²⁷to'on a aj meyajo'obe' c ch'a'ic c nu'ucul u ti'al c bíin ba'atel beyo' c beetic u tzol t'aan Yuumtzil, jeel bix teech ta túuchi'itajo'.

²⁸Moisés túune' tu tzol t'antaj ti' aj kiin Eleazar, ti' Josué yéetel ti' u nuuquilo'ob le u yotochnáalilo'ob, u ch'i'ibalilo'ob Israel:

²⁹Wa tuláacal u j xiibilo'ob u ch'i'ibalo'ob Gad yéetel Rubén cu ch'actico'ob ta wéetele'ex u ja'il Jordán u machmajo'ob u nu'ucul ba'atel je'el bix tu tzol t'antaj Yuumtzil, tac le quéen a ti'alinte'ex le lu'umo', te'ex túune' ca dzáic u ti'alinto'ob u lu'umil Galaad.

³⁰Ba'ale' wa ma' tu máano'ob u ti'al j ba'atele', bíin a dza'ex tu lu'umo'ob ichil tu lu'umil Canaán.

³¹U ch'i'ibalo'ob Gad yéetel Rubene' tu núucajo'ob: bíin c beet le ba'ax dzo'oc u ya'alic Yuumtzil ti' le a palitzilo'oba'.

³²Bíin xi'ico'on yéetel u nu'ucul ba'atel tu lu'umil Canaán u ti'al c dzo'ocbesic u t'aan Yuumtzil, ba'ale' bíin p'áatac to'on u lu'umil u lakin Jordán bey ba'al c ti'ale'.

³³Beyo' u ch'i'ibalo'ob Gad yéetel Rubén, bey xan u táancoch ch'i'ibalo'ob Manasese', Moisese' tu dzaj ti'ob u lu'umilo'ob Sehón, u ajaw amorreob, yéetel Og, u ajawil Basán, pa'ate' yéetel u noj caajilo'ob yéetel le káaxo'ob tu bakpacho'.

³⁴U ch'i'ibalilo'ob Gade' tu yutzquintajo'ob u noj caajilo'ob Dibón, Atarot, Aroer,

³⁵Atarot-sofán, Jazer, Jogbeha,

³⁶Bet-nimra yéetel Bet-arán, ca tu dzajo'ob u tuulumilo'ob bey xan tu cooto'ob u cúuchil u j tamano'ob.

³⁷U múuch' cajtalil yotochnáalo'ob Rubene' tu yutzquintajo'ob Hesbón, Eleale, Quiriataim,

³⁸Nebo, Baalmeón yéetel Sibma, tu kexo'ob u kaaba' dze'edzec le ca j dzo'oc u yutzquintico'obo' ca tu dzajo'ob jach u kaaba'.

³⁹U ch'i'ibalilo'ob Maquir, u paal Manasese', tu jáanpayto'ob u lu'umil Galaad ca tu ch'a'ajo'ob u ti'alinto'ob, tu yo'olal tu yáalcabansajo'ob le j amorreob caja'ano'ob ca'acho'.

⁴⁰Moisés túune' tu dzaj ti' u ch'i'ibal Maquir u lu'umil Galaad, ca j cajlajo'obi'.

⁴¹Jair, u ch'i'ibalo'ob Manasese', tu tocaj dze'edzec x péet caajo'ob ti' le j amorreobo', ca tu dzáa u kaaba'int Havot-jair.

⁴²Jun múuch' j Nobailo'ob tu tocaj Kenat yéetel u caajilo'obe' ca tu dzaj u kaaba', Noba.