Read Yucateco Números 35 Bible Online

Números 35 - Yucateco bible

Números 35

¹Yuumtzile' tu t'anaj Moisés tu táax lu'umil Moab, tu jáal u yáalcab ja'il Jordán, actáan ti' Jericó, ca tu ya'alaj ti':

²A'al ti' le j israelitaobo', ti' le lu'um cu bin j t'oxbil ti'obo', yaan u dzáico'ob ti' le j levitaobo', caajo'ob u ti'al u cajtalo'ob, dza'abac xan le káaxo'ob yaan tu bakpacho'ob le caajo' u ti'al u tzéentico'ob j tamano'ob.

³Le j levitaobo' bíin cajlaco'ob te j caajo'obo', yéetel te j lu'umo' bíin u dza'ob u wacaxo'ob yéetel u láak ba'alche'ob.

⁴Le u káxilo'ob u tzéenta'al j tamano'obo' unaj a dzáiqu'ex ti'obo' tuláacal le cu bakpachtic le caajo', cuatrocientos cincuenta metros tu paach u tuulumilo'ob le caajo'.

⁵Ti' tuláacal le lu'umo' bíin yanac can ti'itz ti' yéetel novecientos metros ti' jujun tzéelil, tumen bíin p'i'isic láajqueet u p'iisil j lakin yéetel j chikin, j xaman yéetel j noojol. Le caajo' bíin p'áatac chúumuc, ti' u káaxilo'ob u tzéenta'al j taman, tu bakpach.

⁶Le caajo'ob bíin dza'abac ti' le j levitaobo', seise' u ti'al ta'acbesajil, tu'ux bíin u ta'acbesubáa máax dzo'oc u quíimsic wa máaxe'. Pa'ate' yéetel le seis caajo'obo' yaan xan u dza'abal ti'ob u láak cuarenta yéetel ca'a p'éel caajo'ob;

⁷tuláacale', unaj u dza'abal ti' j levitaob cuarenta yéetel ocho caajo'ob yéetel u káaxilo'ob u tzéenta'al j taman.

⁸Ti' u lu'um le j israelitaob le quéen dza'abac le caajo'ob ti' le j levitaobo', bíin u dza'ob jun xóot' u lu'umo'ob, le jujun múuch' cajtalil otochnáalo'obo', je'el buca'aj lu'um yaan ti'e', ti' le yaan ya'ab lu'ume' bíin u dzáa ya'ab caajo'ob wa jun p'íite' bíin u dzaj jun p'íit caajo'ob.

⁹Yuumtzile' tu t'anaj Moisés ca tu ya'alaj ti':

¹⁰A'al ti' le j israelitaob le ba'alo'oba': Le quéen a ch'acte'ex u yáalcab ja'il Jordán u ti'al a wocole'ex Canane',

¹¹unaj a yéeyique'ex dze'edzec caajo'ob u ti'al ta'acbesajil, tu'ux bíin u ta'acbesubáa máax ma' j taali' ti' u quíimsic u yéet wíiniquile'.

¹²Te'elo' bíin u ta'acbesubáa ti' u láaktzil caxtic u ti'al u sutic u jeel le quíimsajo', ma' xan tu páajtal u quíimsa'al wa ma' bisa'ac u ti'al u xot kinta'al.

¹³Ti' le caajo'ob cu bin j dzaabilo', seise' u ti'al ta'acbesajil:

¹⁴óox p'éel tu lakin Jordán yéetel óox p'éel Canaani'.

¹⁵Le seis caajo'oba', u ti'al u ta'acbescubáa le israelitaobo' bey xan le táanxel lu'umil caja'ano'obo', wa quex chéen le u'ula'ob yaan ichile'exo'. Te'elo' je'el u páajtal u ta'acbescubáa le máax ma' j taali' ti' u quíimsic u yéet wíiniquili'.

¹⁶Wa máax cu loobiltic u láak yéetel jun p'éel ba'al beeta'an yéetel fierro, wa cu quíimil le loobilta'abo', le j quíimsaj wíinico' yaan u xot kinta'al j quíimil.

¹⁷Wa máax cu kolic u láak máac yéetel tuunich, cu p'áatal j quíimsaj wíinic wa le máax tu kolajo' cu quíimil, le j quíimsaj wíinico' yaan u xot kinta'al u ti'al quíimil.

¹⁸Wa máax cu kolic u láak yéetel che' tu yo'olal lelo' cu quíimile', yaan u ya'alale' jun túul j quíimsaj wíinic, le quíimsajnajo' yaan u xot kinta'al u ti'al j quíimil.

¹⁹U láaktzil le máax quíimsa'abo', leti' bíin u quíims le j quíimsaj wíinic le quéen u nactáante'.

²⁰Wa máax cu léench'intic u láak máac tumen u p'ectmaje' wa quex cu pulic wa ba'ax tu yóokol yéetel kaakas tuucule',

²¹wa xan tu yo'olal kuuxil cu loxique', wa cu quíimil le máac tu loxaj tu yo'olal le loob tu beetajo', yaan u xot kinta'al u ti'al quíimil tumen j quíimsaj wíinic. U láaktzil naadz ti' le máax j quíimo' leti' bíin u quíims le j quíimsaj wíinic, le quéen u nactáante'.

²²Wa máax cu léench'intic u láak máac ma' j taali' ti'e', mix tu yo'olal kuuxile', wa quex ma' tu yo'olal u loobil cu pulic wa ba'ax tu yóokole',

²³wa le tu pulaj jun p'éel tuunich tu yóokol wa máax cu quíimil ti'olale', ba'ale' mina'an kuuxil ichilo'ob mix taali' ti' u beetic kaas ti'e',

²⁴le caaj túuno' bíin u beeticubáa aj p'is óol ichil le j quíimsaj wíinico', yéetel le láaktzil u káat u sut u jeelo', je'el bix le a'almaj t'aan beeta'ano' cu sa'atsic le j quíimsaj wíinico' tu kab u láaktzil le quimeno'.

²⁵Le caajo' unaj u canantic u ti'al ma' u quíimsa'al tumen u láaktzil le quimeno', unaj u beetic u bin tu caajil ta'acbesajbáil. Le j quíimsaj wíinico' bíin p'áatac te'elo', yaan u pa'atic u quíimil le nojoch aj kiin jach jun páaycunta'ano'.

²⁶Ba'ale' wa cu jóokol tu lu'umil u caajil ta'acbesajil,

²⁷u láaktzil le dzo'oc u quíimilo' ma' tu si'ipiltal wa cu quíimsic le quéen u nactáant táanxel lu'umile'.

²⁸Le j quíimsaj wíinico' unaj u p'áatal tu caajil ta'acbesaj tac quéen quíimic le nojoch aj kiino'. Cu dzo'ocole' cu páajtal u suut tu lu'umil.

²⁹Lela' yaan a ti'alintique'ex bey jun p'éel a'almaj t'aan bíin máanac ti' taata tac ti' u paalal, je'el tu'ux bíin cajlaque'exe'.

³⁰Chéen tu yo'olal u tac pool dze'edzec máaxo'ob il tu jaajile' je'el u páajtal u jajcunta'al u xot kinta'al j quíimil jun túul j quíimsaj wíinique'. Wa chéen jun túul j ile' ma' tu páajtal u xot kinta'al j quíimil mix máac.

³¹Ma' tu páajtal u ka'amal taakin bey u bo'olil u cuxtal jun túul j quíimsaj wíinic, xot kinta'an j quíimil; le máaco' unaj u quíimil.

³²Ma' tu páajtal u ka'amal taakin u ti'al u jóokol jun túul j quíimsaj wíinic, u kalmubáa ca'ach tu caajil ta'acbesajil u ti'al suut tu caajal wa ma' quíimic le nojoch aj kiino'.

³³Ma' a manba'alcuntique'ex yéetel u quíimsa'al wíinico'ob le lu'um tu'ux bíin cajlaque'exo', tumen le j quíimsaj wíiniquilo' cu manba'alcuntic jun p'éel caaj, yéetel mina'an u láak bo'ol je'el u páajtal u beeta'al tu yo'olal u quíimsa'al wíinique', chéen u xot kinta'al j quíimil le máax j beeto'.

³⁴Ma' a malba'alcuntique'ex le lu'um tu'ux bíin cajlaque'ex yéetel tu'ux bíin cajlaquen, tumen teen Yuumtzil, cajacbalen ichil le j israelitaobo'.