Read Yucateco Números 6 Bible Online

Números 6 - Yucateco bible

Números 6

¹Yuumtzile' tu t'anaj Moisés ca tu ya'alaj ti':

²A'al ti' le israelitaob beya': wa jun túul j xiib wa co'olel cu jun páaycunticubáa u ti'al Yuumtzil bey nazareoe',

³ma' tu páajtal u yukic u pajil kab uva, mix u yukic ba'al cu cáalcunaj, mix su'udz ukul beeta'an yéetel u kab uva; mix u jaantic u yich mix u kulinil.

⁴Ca'aliquil u máan u kiinil u séeb chi'e' ma' tu páajtal u jaantic mix ba'al cu taal ti' pakal uva.

⁵Ma' xan tu páajtal u kosic u tzo'otzel u pool, ba'ale' yaan u cha'ic u nuuctal tac tu kiinil u dzo'ocol u séeb chi', tumen kabéet u jun páaycunticubáa u ti'al Yuumtzil.

⁶Ti' le kiino'obo' je'elo' ma' xan tu páajtal u náadzal ti' jun túul quimen,

⁷mix le quéen quíimic u taata wa u maama, wa u sucu'un wa u quiic, tu yo'olal ma' u p'áatal kaas yanil, tumen leti'e' jun páaycunta'an u ti'al Yuumtzil.

⁸Tuláacal u kiinilo'ob u séeb chi'e' yaan u jun páaycunscubáa u ti'al Yuumtzil.

⁹Wa yaan máax cu téec quíimil tu tzéele' tu yo'olal le u tzo'otzel u pool u jun páaycuntmaj u ti'al Yuumtzil cu p'áatal ma' utz yanile', cu dzo'ocol u máan siete kiino'obe' yaan u dziquic, le ti' le kiin jóokesa'an u ti'al u p'áatal utz yanil.

¹⁰Tu ocho kiine' cu bisic ca'a túul mucuy wa ca'a túul mejen sacpacal ti' le aj kiino' tu jool u noj Paselil Much'tal.

¹¹Le aj kiino' cu táanbesic jun túule' u ti'al quíimsbil tu yo'olal keban, le u láak jun túulo' láaj tóocbil, cu beetic xan u kultajil u ka'amal sa'atsaj si'ipil tu yo'olal le keban úuchic u machic le quimeno', ti' le kiino' cu ca'a jun páaycuntic u tzo'otzel u pool u ti'al Yuumtzil,

¹²beyo' cu cáajsic tu ca'a téen u kiinilo'ob jun páaycunajil ti' Yuumtzil. Le kiino'ob dzo'oc u máano'obo' ma' tu xo'ocol tumen u tzo'otzel u pool tu jun páaycuntaj ca'acho' p'áat ma' utz yanili'. Yaan xan u bisic ti' Yuumtzil jun túul chan j taman ja'aben, u ti'al quíimsbil tu yo'olal si'ipil.

¹³Le quéen chúucpajac u kiinilo'ob le jun páaycunajo', le nazareo' unaj u bíin tu jool u noj Paselil Much'tal,

¹⁴u ti'al u táanbesic ti' Yuumtzil jun túul chan j taman yaan jun ja'ab ti' láaj utz u wíinclil u ti'al láaj tóocbil, jun túul x taman ja'aben láaj utz u wíinclil u ti'al quíimsbil tu yo'olal ca'a bisajbáil,

¹⁵yaan xan u kubic jun xaac waajo'ob beeta'an yéetel ma'alob juuch' x ma' levadura xa'akbesa'an yéetel aceite, oop'il waajo'ob x ma' levadura yala'an aceite ti' p'a'ate' yéetel u ti'ibil óolalo'ob jejeláas janalbe'en neeko'ob, yéetel u kab uva.

¹⁶Le aj kiino' cu táanbesic tu táan Yuumtzil le ba'alche' cu quíimsa'al tu yo'olal keban p'ate' yéetel le ba'ax cun láaj tóocbilo',

¹⁷yéetel cu táanbesic jun túul j taman u ti'al quíimsbil tu yo'olal ca'a bisajbáil p'a'ate' yéetel u xaaquil le waaj x ma' levadura, cu beetic túun u ti'ibil óolal jejeláas janalbe'en neeko'ob yéetel u kab uva.

¹⁸Le nazareo' cu dziquic u tzo'otzel u pool tu jool u noj Paselil Much'tal cu dzo'ocole' cu ch'a'ic u tzo'otzel u pool tu jun páaycuntaj ca'acho' cu pulic ichil le káak cu tóoch'bal tu yáanal le quíimsbil ba'alche' u ti'al ca'a bisajbáilo'.

¹⁹Le aj kiino' cu ch'a'ic u bakel u t'o'olol u paach le j taman dzo'oc tajalo', yaan xan u ch'a'ic le waaj x ma' levadura yaan ichil le xaaco' yéetel jun p'éel oop'il wa cu dzáic tu kab le nazareo', le quéen dzo'ococ u dziquic u tzo'otzel u poolo'.

²⁰Le aj kiin túuno' cu beetic u kultajil le táanbesajo' tu táan Yuumtzil, u tzeem le ba'alche' iquil u beeta'al u kultajil le táanbesajo', yéetel u muuk yooc cu dza'abal u ti'al bo'olal u ti'al Yuumtzil, sen quili'icho'ob, le t o'olale' jóokesa'ano'ob u ti'al aj kiin. Cu dzo'ocole' le nazareo' je'el u páajtal u yukic u kab uvao'.

²¹Le nup t'aana' leti' u ti'al le máax cu séeb chi' u ti'al u jun páay cunticubáa u ti'al Yuumtzil bey nazareoe', bey xan le ti'ibil óolalo'oba' unaj u táanbesic p'ate' yéetel u láak ba'axo'ob cu páajtal u kubique'. Kabéet u dzo'ocbesic u séeb chi', je'el bix tzol t'anta'abico'.

²²Yuumtzile' tu t'anaj Moisese' ca tu ya'alaj ti':

²³A'al ti' Aarón yéetel u paalal le quéen u qui' t'anto'ob le israelitaobo' ca u ya'alo'ob beya':

²⁴Yuumtzil u qui' t'antech yéetel u canantech;

²⁵Yuumtzil ca u pactech yéetel qui' óolal bey xan u ye'es teech u yutzil;

²⁶Yuumtzil ca u pactech yéetel yaacunaj ca u dzáatech xan le jéedzelo'.

²⁷Beyo' leti'obe' bíin u ch'a'a chi'ito'ob in kaaba' tu yóokol le israelitaobo', teen túune' quin qui' t'antico'ob.