Read Yucateco Números 9 Bible Online

Números 9 - Yucateco bible

Números 9

¹Jun ja'ab máanac u jóokbal le israelitaob Egiptoo', tu yáax winalil le ja'abo', Yuumtzile' tu t'anaj Moisés tu x tocoy lu'umil Sinaí, ca'a tu ya'alaj ti':

²Le j israelitaobo' u najmal u kiinbensico'ob u kiin kujil le Táadz Máanbalo' le kiin a'ala'an u kiinbesico'obo',

³u káat u ya'ale', tu kiinil catorce le winala', tu yocnaj kiinil, je'el bix le tzolbe'en t'aan in dzaamaj u ti'al le kiinbesajilo'.

⁴Moisés túune' tu ya'alaj ti' le j israelitaobo', ca u kiinbeso'ob le Táadz Máanbal

⁵leti'obe' tu beetajo'ob beyo', tu kiinil catorce ti' le winalo', tu yocnaj kiinile', tu x tocoy lu'umil Sinaí, je'el bix tu tzolbe'en t'antaj Yuumtzil ti' Moisese'.

⁶Ba'ale' yaan ca'ach wa jay túul máaco'ob ma' utz yanilo'obi' tu yo'olal tu machajo'ob jun túul quimen, let o'olale' ma' tu kiinbeso'ob Táadz Máanbal ti' le kiino'; bino'ob u yilo'ob Moisés yéetel Aarón ti' le kiino',

⁷ca tu ya'alajo'ob ti' Moisés: to'one' dzo'oc machic jun túul quimen, let o'olale' ma' utz yanilo'oni' ¿Ma' bíin cha'abac c táanbesic ti' Yuumtzil ti'ibil óolal ti' le kiin j a'ala'ano', tu pa'ate'il yéetel le israelitaobo'?

⁸Moisese' tu núucaj ti'ob: Pa'ate'ex in kamic u tzolbe'en t'aan Yuumtzil a ti'ale'ex.

⁹Yuumtzil tu t'anaj Moisese' ca tu ya'alaj ti': A'al ti' le israelitaob lela':

¹⁰tuláacale'ex pa'ate' yéetel a ch'i'ibale'ex unaj a kiinbesique'ex le Táadz Máanbal ti' in nojbe'enilo'. Le máaxo'ob ma' utz yanilo'ob tu yo'olal tu macho'ob quimen, wa le náach yanilo'ob tu yo'olal bino'ob táanxel lu'umile',

¹¹bíin u kiinbeso'ob tu kiinil catorce tu ca'a p'éel winalil, tu yocnaj kiinil. Unaj u jaantico'ob j taman yéetel káakaj xíiwo'ob bey xan waaj x ma' levadurail,

¹²ma' unaj u p'atico'ob mix ba'al u ti'al u láak kiin mix u cachico'ob mix jun p'éel u baaquel. Bíin u kiinbeso'ob le Táadz Máanbal je'el bix le tzolbe'en t'aan quin wa'alico'.

¹³Le máax ma' tu kiinbesic le Táadz Máanbal quex utz yanil yéetel mix náach yanile', unaj u xot kinta'al ichil u caajal. Tumen ma' tu táanbesaj u ti'ibil óolal ti' Yuumtzil le kiin jóokesa'ano', yaan u kamic u jaadzil u keban.

¹⁴Le j táanxel lu'umilo'ob cajnáalo'ob ichile'exo' unaj u kiinbesco'ob le Táadz Máanbal tin nojbe'enil je'el bix le tzolbe'en t'aan dzo'oc in wa'alico'. Le tzolbe'en t'aano'oba' u ti'al táanxel lu'umil yéetel le sijnalo'ob te j lu'uma'.

¹⁵Le kiin wa'acunta'abic le quili'ich najo', u káat ya'ale', u najil nup t'aan, j ba'al tumen le múuyalo'. Le quéen kuchuc ocnaj kiine' cu chíicpajal jun p'éel ba'al bey káake' tac u sáastal.

¹⁶Bey u yúuchul mantadz: yéetel kiine' jun p'éel múuyal balic, yéetel áakabe' jun p'éel ba'al bey káake'.

¹⁷Le quéen líikik le múuyal tu yóokol le quili'ich najo' le j israelitaobo' cu jóokol u binbalo'ob, le tu'ux cu wa'atal le múuyalo', ti' cu je'elelo'obi'.

¹⁸Le ba'ax cu ya'alic Yuumtzil ca u beeto'obe' le cu beetico'ob, le israelitaobo' cu xíimbalo'ob wa cu p'áatalo'ob je'elel tuláacal le kiino'ob ti' yaan le múuyal tu yóokol le quili'ich najo'.

¹⁹Wa le múuyal cu p'áatal ya'ab kiin tu yóokol le quili'ich najo', le israelitaobo' cu p'áatalo'ob te'elo' u ti'al u meyajto'ob Yuumtzil.

²⁰Wa le múuyal cu p'áatal chéen dze'edzec kiino'ob tu yóokol le quili'ich najo', le quéen u ya'al Yuumtzil ca xíimbalnaco'obe' cu líikbal u bino'ob wa cu ya'alic ca je'eleco'obe' cu je'elelo'ob.

²¹Yaan kiine' le múuyalo' cu je'elel chéen yéetel áakab, cu líikil piknac kiin; leti'ob túune' cu xíimbalo'ob yéetel kiin je'el bix buul áakabe', je'el bix u bin le múuyalo' bey u bin u xíimbalo'ob.

²²Wa le múuyal cu p'áatal tu yóokol le quili'ich naj ca'a p'éel kiin, wa jun p'éel winal wa jun ja'abe', le israelitaobo' cu je'elelo'ob, cu jáawal u bino'ob.

²³Le quéen t'aanac Yuumtzile' cu je'elelo'ob, le quéen ca'a t'aanaque' cu líikil u bino'ob. Ba'ale' ca'aliquile' cu meyajtico'ob Yuumtzil je'el bix tu tzolbe'en t'antaj ti' Moisese'.