Read Yucateco Miqueas 4 Bible Online

Miqueas 4 - Yucateco bible

Miqueas 4

¹Ti' u pachalil le kiino'obo' bíin p'áatac ma'alob jeedzelil le pu'uc tu'ux yaan u kulnaj Yuumtzilo'. Leti' bíin u beet u asab ca'anal witzil ti' u láak witzo'ob. Tuláacal múuch' caajo'ob bíin talac tu yicnal;

²ya'abcach caajo'ob bíin kuchuco'ob táan u ya'alico'ob: Co'otene'ex u ti'al ca na'acacone'ex tu witzil Yuumtzil, tu kulnaj u Ku Jacob, u ti'al ca u ca'anbes ti' to'on u beelo'ob u ti'al ca páatac xíimbal tu beelo'ob. Tumen tu witzil Sión bíin jóokoc u ca'anbesaj Yuumtzile', tu caajil Jerusalén bíin taalac u t'aan.

³Yuumtzil bíin p'is óolnac ichil múuch' caajo'ob leti' bíin u dzáa u xuul ti' u ba'atelo'ob ya'abcach caajo'ob, tac le u asab náachtaquilo'obo'. Leti'obe' bíin u yibo'ob u máascabil u ba'atelo'obe' uti'al u sutico'ob nu'uculil u meyajta'al lu'um bey xan bíin u suto'ob lóobche'ilo'ob u lóomte'ob. Mix jun p'éel caaj bíin u ca mach u nu'ucul u ba'atel u ti'al u bin u ba'atelt u láak caaj, mix xan bíin nu'ucta'ac bix cu bin úuchuc ba'ateli'.

⁴Tuláacalo'ob bíin cajlaco'ob x ma' sajaquil, tuláacalo'ob bíin páatac u je'elelo'ob tu bo'oy u pakal uva yéetel tu bo'oy u pakal higo. ¡Lelo'oba' u t'aano'ob Yuumtzil, u yuumil tuláacal páajtalil!

⁵U chuucáan caajo'obo' cu yu'ubaj t'antico'ob u kuob, ba'ale' to'one' mantadz bíin c u'uyaj t'aant Yuumtzil c Ku.

⁶Yuumtzile' cu ya'alic: Ti' le kiino' bíin in much'quint in j tamano'ob, le máaxo'ob tin jadzajo'ob ca'acho': le móochtaco'obo', le ca'anantaco'ob yéetel le ki'itpaja'ano'obo'. Tu yéetelo'obe' le je'enque'ex j p'aatalo'obo', bíin in beet jun p'éel mu'uka'an múuch' caajo'ob. Teen Yuumtzil, teen bíin in méektáant in caajal likbal tu witzil Sión, bejela'e' tac tu mina'an u xuul kiino'ob.

⁸Teech túune', Jerusalén u witzil najil yéetel u tuulumil Sione', teche' bíin ca'a suunaquech a beet u noj caajil le ajawila', jun p'éel noj caaj je'el bix ca'ache'.

⁹Bejela'a' túune' ¿ba'ax o'olal ca wawat bey jun túul co'olel yaan u ki'inamil síijsaje'? ¿Tu yo'olal wa mina'an ajaw ichil a cajtalil? ¿Wa tumen dzo'oc u láaj quíimilo'ob a aj tzol xiquino'ob?

¹⁰U caajil Sión ch'o'och'otabáa yéetel awatnen je'el bix jun túul co'olel cu ch'o'och'oticubáa tu yo'olal u ki'inamil u síijsaje', tumen a cajnáalilo'obe' bíin jóokoco'ob cajtal ti' jéechcab cúuchil, cu dzo'ocole' bíin kuchuco'ob tac Babilonia. Ba'ale' Yuumtzile' bíin u toc u caajal te'elo'; bíin u toc tu kab u aj p'eeco'ob.

¹¹Bejela'e' ya'abcach caajo'ob dzo'oc u much'icuba'ob u beeto'ob loob ti' teech, táan u ya'alico'ob: ¡Cone'ex c dzáic utz ti' c iche'ex le quéen ila'a u manba'alcunajil Jerusalén!

¹²Ba'ale' le múuch' caajo'obo', ma' u kaj óolo'ob u tuuculo'ob yéetel jok tuuculo'ob Kui'; ma' u yojelo'ob wa bin a ca'aje'ex much'quintbil je'el bix u much'quinta'al u kaxabilo'ob i'inaj ich coole'.

¹³¡U caajil Sión líiken u ti'al ca xanabcha'anaquech! Tumen Yuumtzile' cu ya'alic: Tene' bíin in dzáa ti' teech u muuk jun túul wacax yéetel baaco'ob fierro u ca'ajo'ob yéetel maayo'ob bronce u ca'ajo'ob, u ti'al ca a xe'exe'et' ya'abcach caajo'ob. Teche' bíin a lukes ti'ob le ayikalilo'ob yocoltajo'obo', u ti'al ca a jun páaycunto'ob ti' teen, u Yuumtzilil tuláacal u yóokolcaab.