Read Yucateco Miqueas 5 Bible Online

Miqueas 5 - Yucateco bible

Miqueas 5

¹Ba'ale' bejela'e', Jerusalén, nu'ucbesabáa u ti'al a toquicabáa, tumen dzo'oc a bakpachta'al, bin u ca'aj chich jadzbil u méektáan Israel.

²Ba'ale' teche', Belén Efrata, u chichanil ichil u cajtalilo'ob u yotochnáalo'ob Judae', ti' teech bíin jóokoc jun túul u aj méektáan Israel ti' u taal ti' jun p'éel úuchben ch'i'ibale'.

³Bejela'e', Yuumtzile', cu p'atic le máaxo'ob u ti'alo', ba'ale' chéen tac quéen síijsajnac jun túul co'olel cu p'áatic u chan paal. Bíin u much'quintubáa túun yéet caajalo'ob le j israelitaob bisa'ano'ob táanxel lu'umilo'.

⁴Le ajawo' bíin líikic u ti'al u táan óolt u caajal yéetel u páatalil bey xan u nojbe'enil u Ku, leti'obe' bíin cajlaco'ob ich jéedzelil, tumen Yuumtzile' bíin nojbe'encunsa'ac tac tu xuul yóokolcaab.

⁵Leti' bíin taas jéedzel le quéen ococ j asiriob ichil caajalo'obe' yéetel ichil c jalach najo'ob, bíin c túuxt u ti'al j beetbil loob ti'ob, siete u nuuquilo'ob ba'atel yéetel ocho máaco'ob jach kabéeto'ob.

⁶Leti'ob bíin méektáantic Asiria u múuch' caajilo'ob Nimrod, yéetel u yej máascab, bíin u toco'ono'ob tu kab le j asiriob cu bin u ch'acto'ob u jolch'aaquil c lu'umo'ob u ti'al u beet u cajtalo'ob ichil c lu'umo'ob.

⁷Tu chúumuc túun ya'ab caajo'obe', u yalab u caajil Jacobe', bíin ila'ac je'el bix le ye'eb cu túuxta'al tumen Yuumtzilo', bíin ila'ac bey je'el bix le ja' cu káaxal tu yóokol xíiwe', ma' tu káaxal chéen tu yo'olal u káat wíiniqui'.

⁸Bey túuno' tu chúumuc le ya'ab múuch' caajo'obo', le ba'ax cu yalabtic ti' u caajil Jacobe' bíin ila'ac bey jun túul león ichil káaxil ba'alche'obe', bey jun túul león tu chúumuc jun múuch' j tamano'ob, le quéen máanaco'obe' tzi'itzico'ob cu xe'exe'et'ico'ob xan, ma' tu cha'ic u púudzul mix jun túul cuxa'ani'.

⁹Yuumtzil bey bíin a xu'uls tuláacal a aj p'eeco'ob.

¹⁰Yuumtzile' cu ya'alic: Ti' le kiino' bíin in quiims a tziimino'ob bíin xan in kascunt u bolanilo'ob a ba'atele'ex;

¹¹bíin in sut x lab pakilo'ob a noj caajalo'ob bíin in jen xan tuláacal a tuulume'ex;

¹²bíin in p'atech x ma' pulya'ajo'ob, bíin in p'atech x ma' j chuchuc na'ato'ob;

¹³bíin in laj ch'éejse a beetbil kuob bey xan a quili'ich tuunicho'ob, tu yo'olal ma' a suut a ca'a kult le kuob ta beetaj ta kabilo'.

¹⁴Bíin in joc a quili'ich che'ilo'ob bíin in láaj kascunt a caajalo'ob.

¹⁵Ichil in p'uja'anile', bíin in sut u jeel loob ti' le múuch' caajo'ob ma' tu yóoltajo'ob u yu'ubaj t'anteno'obo'.