Read Yucateco Miqueas 6 Bible Online

Miqueas 6 - Yucateco bible

Miqueas 6

¹Bejela'e' u'uye'ex ba'ax cu ya'alic Yuumtzil: ¡Líiken a wa'al ti' le pu'uco'ob ba'ax cu yúuchul ti' teech, u ti'al ca u'uya'ac tumen le jo'ol lu'umo'ob ba'ax ca wa'alico'!

²Pu'uque'ex ch'en xiquinte'ex, bey xan te'ex u chuno'ob u pakilo'ob lu'um; Yuumtzile' bin u ca'aj u tacpoolt u caajal, bin u ca'aj j ba'atel t'aan yéetel Israel.

³Bey u ya'alic Yuumtzila': In caajal núuct le ba'ax quin káat chi'itic techa', ¿ba'ax tin beetaj u ti'al ca kuuxilnaquech?

⁴Tene' tin jóokesajech Egipto le ca tocajech ti' palitzilil; teen tin túuxtajo'ob ti' teech, Moises Aarón yéetel María, u ti'al ca u nu'ucto'ob a beel

⁵In caajal, bejela'e' ka'ajac ti' teech ba'ax tu jokjo'oltaj Balac u ajawil Moab, bey xan ba'ax núuca'ab ti' tumen Balaam u paal Beor. Ka'ajac ti' teech bix úuchic a ch'actic Sitim yéetel Gilgal, ila'a jaaj xan u dzáanche'etaj Yuumtzil.

⁶¿Ba'ax yéetel nib óolalil bíin xi'iquen in kult Yuumtzil, u Kuil le ca'analo'obo'? ¿Bíin wa xi'iquen tu táan yéetel mejen ja'aben wacaxo'ob, u ti'al ca in kub ti' u ti'al j tóocbil?

⁷¿Bíin wa qui'imacchajac u yóol Yuumtzil wa ca in kub mil j tamano'ob ti' wa diez mil u yáalal aceite? ¿Cux wa ca in kub in yáax paal u ti'al in bo'otic u dzu'uy in wóol yéetel in keban?

⁸Wíinic Yuumtzile' dzo'oc u ya'alic ti' teech ba'ax utz ba'ax utzil xan u káat ca beete: beet ba'ax tu no'oja'an, yéetel ca yanac a chuca'an óolal yéetel ca wu'uyaj t'ant Ku yéetel cabal óolal.

⁹Yuumtzile' táan u t'anic le caajo', utzil ba'al u yu'uba'al yéetel tzicbe'enil: Caaj, u'uye'ex bey xan te'ex j tzol xiquine'ex.

¹⁰Tu yotoch j loolob máaque' yaan ocoltbil ayikalilo'obi', le ma' ti'ibil p'iso'obo' in p'ectmajo'ob.

¹¹¿Bix bíin in sa'ates u si'ipil máax cu meyaj tu yéetel u nu'ucul p'iiso'ob u péecsmaj, ma' ti'ibil u p'iiso'obi'?

¹²Tuláacalo'ob u aj ayikalilo'ob le caaja' aj yedz wíinico'ob; tuláacal u cajnáalilo'obe', aj tuuso'ob yéetel aj táabsajo'ob.

¹³Le t o'olal bin in ca'a in jadzech; bin in ca'aj in sutech x lab caajil tu yo'olal a kebano'ob.

¹⁴Bíin janalquech, ba'ale' ma' bíin na'ajaquechi', bíin xi'ic u bin a mukyajtic wi'ij; bíin a mol u yich a meeyaj ba'ale' mix jun p'íit bíin p'áatac techi', wa ca p'áatac ti' teech jun p'íite' bíin in beet u kascunta'al ich ba'atel.

¹⁵Bíin pakalnaquech, ba'ale' ma' bíin joochnaquechi'; bíin a juch' aceitunas ba'ale' ma' bíin a jaant u aceiteili'; bíin a yedz uvaob, ba'ale' ma' bíin a wuk u vinoili'.

¹⁶Tumen teche' xi'ic u bin a beetic ba'axo'ob cu ya'alic yéetel ba'axo'ob cu beetic Omri yéetel u yotochnáalo'ob Acab, bey xan táan quetic ba'axo'ob cu beetico'ob. Le t o'olale', teech yéetel a cajnáalilo'obe' bíin in beet ti' teech yéetel ti' cajnáalilo'ob ca ila'aque'ex táaj kaasil yéetel ca p'a'asta'aque'ex u subtzilil in caajale' bíin taalac ta wóokol.