Read Yucateco Miqueas 7 Bible Online

Miqueas 7 - Yucateco bible

Miqueas 7

¹¡Yaj in wanil! Beyen máax cu meendzul cu dzo'ocol u yúuchul jooche', ma' tin nuptáantic u meendzulilo'ob uvaob mix higo'ob quin dzíiboltic ca'ach u jaant u yicho'ob.

²Way yóokolcaabe', bejela'e' ma' p'aatal wíinico'ob toj u cuxtalo'ob mix u kubmaj u yóolo'ob ti' Kui'; tuláacalo'ob táan u pa'atico'ob u kuchul u súutuquil u meyajta'al loobo'ob; tu jujun túulilo'ob cu dzáico'ob léecho'ob tu baatzilo'ob.

³Leti'obe' u aj ca'anbesajilo'ob u beeta'al ba'ax kaas; U nuuquilo'ob le jalach najo', cu tzáico'ob bo'olal, le aj u'uyaj tac poolo'obo', cu kamico'ob bo'olal cu cha'ico'ob u ma'analo'ob, le máaxo'ob yaan páajtalil tu kabo'obo', cu beetico'ob le ba'ax cu taal tu poolo'obe', cu beetico'ob u kéechel u cuxtal caaj.

⁴U asab utzilo'obe' beyo'ob jun p'éel ki'ixe'; le asab tu beel cu beetico' bey jun cúul x coj quéeje'. ba'ale' táan u taal u kiinil u bo'olaj p'aax, táan u taal u kiinil u ka'am awat le j canan caajo'. Bíin láaj sa'atac túun u yóol le caajo'.

⁵Ma' a wocsaj óoltic ba'ax cu ya'alic a láak mix a táan óoltic mix jun túul a wéet bisajbáa; canant tac ba'ax ca wa'alic ti' a watan.

⁶Tumen tac le paalal cu sutico'ob u paacho'ob ti' u taataob, le x ch'upul paalalo', ma' tu yóoltico'ob u tzico'ob u maamaob, le x ilibtzilo'obo' ma' xan tu tziquico'ob u maamaob u yíichamo'ob, u aj p'eeco'ob tu jujun túulile' u láaktzilo'ob.

⁷Ba'ale' tene' Yuumtzil bíin in alab óolte; bíin pa'atalnaquen ti' Ku in aj tocsajil, tumen leti'e' bíin u ch'eb u xiquin u ti'al u yu'ubiquen.

⁸Múuch' caaj ma' in wéet bisajbáil, ma' u qui'imactal a wóol tu yo'olal in yaj óolal, quex tumen j lúubene', bíin ca'a líikiquen; quex ca u súut pachteen éekjoche'enil, Yuumtzile' leti' in sáasil.

⁹Dzo'oc in kebanchajal ti' Yuumtzil, let o'olal bin in mukyajt u p'uja'anil; ca'aliquile' bíin u táan óolt ba'ax cu yúuchul ti' teen, leti' bíin u beet tin wo'olal ba'ax tu no'oja'an. Yuumtzile' bíin u bisen tu'ux yaan sáasil, bíin u beet in wilic u dzáanche'etajil.

¹⁰Bíin xan ila'ac tumen in x aj p'eec, lelo' bíin u beet u chu'upul yéetel sublaquil. Leti'e' cu ya'alic ca'ach ti' teen: ¿Tu'ux yaan Yuumtzil a Ku? Ba'ale' bejela'e' bíin in qui' pact u yich xanabcha'ata'an bey u luukil bejo'obe'.

¹¹Jerusalén, táan u taal u kiinil quéen utzquinta'ac a tuulumo'ob yéetel quéen cóochquinta'ac a lu'umilo'ob.

¹²Táan u taal u kiinil le quéen taalac caxantbilech tumen tuláacal u cajnáalilo'ob tuláacal cúuchil: likbal Asiria tac Egipto, likbal tu yáalcab ja'il Nilo' tac Éfrautes, ti' jun p'éel ka'anab tac tu láak ka'anab ti' jun p'éel witz tac tu láak witz.

¹³Le lu'umo' bíin suunac x tocoyil tu yo'olal u si'ipil u cajnáalilo'ob, tu yo'olal tu beetajo'ob ba'axo'ob kaastac.

¹⁴¡Yuumtzil canant a caajal, táan óolt u j tamanilo'ob ba'al a ti'al, le yano'ob tu juunalo'ob te j káax súut pachta'ano'ob tumen cáacab lu'umo'ob! Biso'ob janal je'el bix a bisico'ob úuch ca'ach tu'ux yaan xíiwilo'ob Basán yéetel Galaad.

¹⁵Beet u yilico'ob máactzilo'ob, je'el bix le kiino'ob ca ta jóokesajo'ob Egiptoe'.

¹⁶¡Ila'ac xan tumen u láak múuch' caajo'ob, u ti'al ca u sen ch'a'ob subtal quex tumen seen nojoch u páajtalilo'ob! ¡P'áataco'ob beyo'ob toot yéetel cóoctaco'obe'!

¹⁷¡U léedzo'ob j lu'um je'el bix le caano'ob je'el bix xan u láak ba'alche'ob cu jíilticuba'obe'! ¡Jóokoco'ob tu ku'ob táan u quiquilaanquilo'ob, chuuptaco'ob yéetel sajaquilo'obe' káat óolnaco'ob ti' teech Yuumtzil c Ku!

¹⁸Mina'an u láak Ku je'el bix teche', tumen teche' ca sa'atsic kasa'anil yéetel ca tu'ubsic u dzu'uy óolal u yalab a caajal. Teche' ca we'esic ti' to'on a yaabilaj yéetel ma' tu xáantal a p'uja'anil.

¹⁹Ch'a'a óotzilil ti' to'on tu ca'a téen muc xan c kasa'anilo'ob. Pul c kebano'ob tu asab taamil ka'anab.

²⁰¡Yuumtzil ma' a lukesic a chuca'an óolal yéetel le a yaabilaj ta úuch séeb chi'itaj ti' c máanja'an ch'i'ibalo'ob, Abraham yéetel Jacob!