Read Yucateco Nahúm 2 Bible Online

Nahúm 2 - Yucateco bible

Nahúm 2

¹Nínive, le aj xu'ulsajo' cu taal ta wóokol. ¡Dzáa u aj cananil a tuulum! ¡Ch'úuct le bejo'! ¡Kaxnakt a máascab! ¡Much'quint a aj ba'atelo'ob!

²Tumen Yuumtzile' bin u ca'aj u ca'a beet u suut u nonoj caajil Jacob bey xan bíin u beet u suut u nonoj caajil Israel, je'el bix ca'ach ma'ili' láaj ocolta'aque' le ca j p'a'at bey u che'il uva mina'an u kabo'obe'

³Chac u chimal u aj ba'atelo'ob chac xan u búuquil ba'atel u j báatabo'ob. ¡U nu'ucano'ob u ti'al u bino'ob j ba'atel! U bolano'obe' beyo'ob káake'; u tziimino'obe', táan u yaanyamo'ob.

⁴Le bolano'obo' chich u yáalcabo'ob te j bejo'obo', cu bino'ob ti' u jujun tzéelilo'ob le kíiwico'obo', beyo'ob tajche'ob t'aba'antaco'ob cu ch'aacato'ob bey léenbalo'ob cháaque'.

⁵Ajawe' cu t'anic u nuuquil u aj ba'atelo'ob, leti'obe' cu jéentanticuba'ob le quéen áalcabnaco'ob tu tojil le tuulumo', ti' u pakil u balicuba'ob beeta'an u ti'al ba'atelo'ob.

⁶Cu je'epajal u maaco'ob le áalcab ja'o', le jalach najo' cu níiquil j lu'um.

⁷Le x ajawo' cu bisa'al x palitzilil táanxel lu'umil; láakinta'an tumen u x koso'ob, cu yáacamo'ob beyo'ob sacpacalo'obe' cu yokolo'ob táan u loxico'ob u tzeemo'ob.

⁸Je'el bix u chooj ja' ti' u teejel pakil jun chultune', bey u púudzul u cajnáalilo'ob Nínive. Cu yaawta'al ti'ob: ¡Wa'alene'ex! ¡Suunaque'ex! ba'ale' mix máac cu suut.

⁹¡Ocolte'ex platai'! ¡Ocolte'ex oroi'! ¡U ayikalilo'ob Ninivee' mina'an xu'ulul ti'ob!

¹⁰Ninivee', xiixcunta'an, x tocoycunta'an dzo'oc xan u pa'abal. le pucsi'ikalo'obo', cu quíimilo'ob tu yéetel sajaquil, Le píixo'obo' cu quiquilanquilo'ob, tuláacal máac cu mina'antal u muuk, cu sacpile'ental u táan yicho'ob.

¹¹¿Ba'ax p'aatal tu yáactun le leóno'obo', yéetel tu ku' u mejenilo'ob le leóno'? Te'e ca'acho' le león yéetel u mejenilo'obo', cu yu'ubicuba'ob ma'alob yanilo'obi'; mina'an ca'ach mix máac ja'akesic u yóolo'ob.

¹²Le léono' cu quiimsic ca'ach ba'ax u jaante, cu t'oxic ti' le x ch'upul león yéetel ti' u mejenilo'obo', cu chupic ca'ach u yáactun yéetel ba'axo'ob u yocoltmaj.

¹³Yuumtzil u yuumil tuláacal páajtalile' cu ya'alic: Je'elena' táan in taal in jadzech: bin in ca'aj in tóoc u bolanilo'ob a ba'atel bin in ca'aj suto'ob buudzil; bin in ca'aj in quiims a mejnilo'ob; bin in ca'aj in xu'uls le oocol cu yúuchul yóokolcaabo', ma' bíin ca'a u'uyac u t'aan aj bisaj t'aano'obi'.