Read Yucateco Nahúm 3 Bible Online

Nahúm 3 - Yucateco bible

Nahúm 3

¹¡Yaj a wanil u caajil quíimsaj wíinic, chuupech tu yéetel tuus bey xan tu yéetel meyaj loob; mina'an xuul ti' a woocolo'ob!

²¡U juum x jadzab, u juum x peten che'ob! ¡U juum u yáalcab tzíimino'ob yéetel u bin u síit' bolano'ob!

³¡Toj yanil yóokol u tzíimin le aj ba'atelilo'! ¡U léedzbal u máascabil ba'atel yéetel jóopbal lóomte'! ¡Ya'abcach máaco'ob quimpaja'ano'ob nica'an xan quimeno'ob! ¡Mina'an u xooquil le quimeno'obo'! ¡Cu t'óochpajal le caaj tu yéetelo'obo'!

⁴Tuláacal lelo', tu yo'olal u kasa'anilo'ob le x cáacbach cu qui'ichpamcunsicubáa u ti'al u lúubul utzil, ma'alob u yojel u beet u x wáayil, tumen tu yéetel u x cáacbachil bey xan u pulya'ajo'obe' cu táabsic caajo'ob bey xan múuch' caajo'ob.

⁵Yuumtzil u yuumil tuláacal páajtalile', cu ya'alic: P'uja'anen ta wéetel: bin in ca'aj in síil a nook tac ta wich, u ti'al ca ila'ac a chacnulil tumen múuch' caajo'ob yéetel u ti'al ca ila'ac a subtalil tumen ajawilo'ob.

⁶Bíin in láal ta' ta wóokol; bíin in chupech tu yéetel subtzilil bíin xan in beet a cha'anta'al.

⁷Tuláacal máaxo'ob bíin iliqueche' bíin áalcabnaco'ob ti' teech táan u ya'alico'ob: ¡Ninivee', dzo'oc u ch'éejsa'al! ¿Máax bíin ch'a'ic óotzilil ti'? ¿Máax bíin yanac u ti'al qui'imacuntic u yóol?

⁸¿Ca tucultic asab ma'alobech ti' Tebas, le caaj yaan tu jáal u áalcab ja'il Nilo, súutpachta'an tumen ya'abcach ja', le áalcab ja'o' bey káatabe' le ja'o' bey tuulume'?

⁹Etiopía yéetel Egiptoe', leti'ob ca'ach u tuulum mina'an u xuul; le j Futilo'ob yéetel le j libiobo', leti'ob ca'ach u yéet t'aanno'ob.

¹⁰Ba'ale' Tebase', j ma'ach bisbil táanxel lu'umil; u mejen palalilo'obe', j p'u'uchlajo'ob ti' u xu'uk bejo'ob; j beeta'ab u buulil u dzuulilo'ob, u jo'ol póopo'obe' j ka'axo'ob yéetel jokenjooko'ob.

¹¹Tac teche' bin a ca'aj cáalcuntbil; saatal a wóole' bíin xi'iquech a caxant tu'ux a ta'acbesicabáa ti' a aj p'eec.

¹²Tuláacal a tuulumo'obe' beyo'ob u che'il higoe' piim yanil u muumun icho'ob, cu lúubla'alo'ob tu chi' le máax bíin jaantic le quéen tíita'aco'obe'.

¹³U múuch'ulo'ob a aj ba'atelo'obe' bey u múuch'ul co'olelo'obe'; u jo'ol bejilo'ob múuch' le caajo'obo' je'ekab yanilo'ob u ti'al u yocol le aj p'eeco', le káako' dzo'oc u jabic a x kalabilo'ob.

¹⁴Yanac ti' teech ya'ab ja' u ti'al ma' u lúubul a muuk kala'anil a paach; ya'abcunt a aj ba'atelo'ob canantiquecho'. Jupabáa ichil le luuko', pe'echakt le kato', ch'a'a u nu'ucul tu'ux cu pa'atal le pak lu'umo'.

¹⁵Te'elo' ti' bíin u láaj tóoquech le káako', le máascabo' bíin u láaj jabech je'el bix u xu'ulsa'al sáako'obe'. ¡Ya'abcuntabáa je'el bix u ya'abil sáako'obe'! ¡Ya'abcuntabáa je'el bix ya'abil le u máasilo'ob káaxe'!

¹⁶A j man coonolo'obe' tu sen ya'abchajo'ob ti' u eekilo'ob ca'an. (Le sáako' le quéen u chuc u yo'oche' cu xiknal.)

¹⁷A aj canano'obe' beyo'ob sáako'obe'; le máaxo'ob much'quintic a aj ba'atelo'obe' beyo'ob u múuch'ul yikelo'obe': le quéen u beet que'ele' cu taktalo'ob ti' pako'ob; le quéen jóokoc le kiino', cu bino'ob; mix máac ojéeltic tu'ux cu bino'ob.

¹⁸¡U ajawil Asiria, buca'aj qui'il u wenelo'ob a aj canan j tamano'ob! A náacomo'obe' cu je'elelo'ob, a aj ba'atelo'obe' ki'itpaja'ano'ob te j káaxo', mina'an máax much'quintico'ob.

¹⁹¡Mina'an dzaac u ti'al a yajil; a pokchaja'anile' mina'an utztal ti'! Tuláacal máaxo'ob u'uyic u ya'ala'al dzo'oc u yúuchul ti' tech loobe' cu papax kabo'ob tu yéetel qui'imac óolal, tumen, ¿máax jech u mukyajtic a kasa'anil?