Read Yucateco Habacuc 1 Bible Online

Habacuc 1 - Yucateco bible

Habacuc 1

¹Lela' leti' le péectzil tu ye'esaj Ku ti' Habacuc.

²Yuumtzil, ¿Ba'ax kiin bíin a ch'en xiquint in sen awat káat óolala'? ¿Ba'ax kiin bíin jáawac in payalchi' tu yo'olal le meyaj loob u ti'al ca talaquech a wáanto'on?

³¿Ba'ax o'olal ca beetic in wilic sen ya'ab yaj óolal yéetel kasa'anil? Súutpachta'anen tumen meyaj loob bey xan tu yéetel ch'éejsaj; tuláacal tu'ux yaan x wo'oquin bey xan ba'atelo'ob.

⁴Ma' táan u dzo'ocbesa'al a wa'almaj t'aan, yéetel cu xanabcha'ata'al ba'ax cu najmata'al, loolob máaque' cu ch'a'apachtic le utzul máaco' bey xan máax kechic ba'ax ti'ibil.

⁵Ilawile'ex le múuch' caajo'ob bakpachtmaile'exo'; pacte'ex chu'upuque'ex yéetel jak óolal. Ta'itac in beetic nucuch ba'alo'ob ba'ale' ma' bíin a wocsaj óolte'ex wa ca tzicbalta'ac ti' te'ex.

⁶Bin in ca'aj in líikes u ti'al j ba'atelt le j caldeobo', leti'obe' j loolob máaco'ob mantadz u káato'ob u yáalcabto'ob tuláacal yóokolcaab tzéelmantzéel, u ti'al ca u ch'a'ob le lu'umo'ob ba'al a ti'ale'exo'.

⁷Jakbe'eno'ob yéetel sajbe'entzilo'ob, ma' tu éejemtico'ob u láak a'almaj t'aan, chéen le u ti'alo'obo'.

⁸U tzíimino'obe', asab chich u yáalcabo'ob ti' yáalcab j coj, asab dzíictaco'ob ti' u peekilo'ob x tocoy lu'um. U j nat' tzíimino'obe' ya'abo'ob u bin yáalcabo'ob, náach yanilo'ob quéen u puluba'ob j ba'atel je'el bix u pulicubáa jun túul cóot tu yóokol u yo'och.

⁹Cu ch'éejsico'ob tuláacal ba'ax tu'ux cu máano'ob; tu'ux cu máano'obe' cu chupico'ob yéetel sajbe'entzilil le máaxo'ob cu bisa'alo'ob j kalbilo' asab ya'abo'ob je'el bix u sa'am lu'umil ka'anab.

¹⁰Cu p'a'astico'ob u ajawilo'ob yéetel máaco'ob jach kabéeto'ob. Cu che'ejltico'ob le tuulumo'obo', tumen cu dzáico'ob u níixilo'obe' tu tzéelo'ob, cu ch'a'ic u ti'alto'ob.

¹¹Cu ch'aacato'ob je'el bix u ch'aacat jun p'éel chac ikale'; leti'obe' chéen u muuko'ob cu kuintico'ob.

¹²Yuumtzil, ¿Ma' wa cuxa'anech u ti'al mina'an a xuuli', in Ku quili'ichech, mina'an quíimil xan ti' techi'? Yuumtzil in aj ta'acbesaj, teche' ta dzáa muuk le j caldeob u ti'al ca u beeto'ob a p'is óol.

¹³Teche' jach láaj utz a wanil u ti'al ca a cha'a u beeta'al ba'ax kaas, bey xan u ti'al ca a wil u beeta'al loobil; ¿bix túun a cha'antic maacal a chi' le j quíimsaj wíinico'ob, ca maquic a chi' ca'aliquil le aj loobo' cu ch'éejsic máaxo'ob asab utzo'ob ti' leti'?

¹⁴¿Ba'axten ca beetic ti' le j xiibo'ob je'el bix a beetic ti' u cayilo'ob le ka'anabo', bey ba'alche'ob mina'an máax méektáantico'ob?

¹⁵Le j caldeobo', cu ch'a'ico'ob u láak múuch' caajo'ob je'el bix u chu'ucul cay tumen j caybalo'obe'; cu chuquic tu yéetel u lutzub wa tu yéetel u káanilo'ob caybal, le quéen u yil buca'aj nica'anile' cu sen qui'imachajal u yóol.

¹⁶Le t o'olalo', le j chuc cayo' cu yaabiltic u lutzubo'ob yéetel u káanilo'ob u caybal, cu kubic quiimsbil ba'alche'ob, cu tóoquic xan poom ti' u tzicbe'enil, tumen tu yo'olalo'obe' yaan ya'ab ba'al u jaante.

¹⁷Bey, ¿wa bíin xi'ic u chuquico'ono'ob le j caldeobo'? ¿Xi'ic u bin wa u quíimsico'ob wíinico'ob x ma' ch'a'a óotzilil?