Read Yucateco Habacuc 2 Bible Online

Habacuc 2 - Yucateco bible

Habacuc 2

¹Bíin in p'il ma'alob in wich u ti'al in paacat je'el bix yanil le j canan caajo' tu cúuchilil u ch'úuc, u ti'al in wu'uyic ba'ax bíin u ya'al ti' teen Yuumtzil tu yo'olal in payalchi'.

²Yuumtzile' tu núucaj ti' teen: dzíibt ti' jun p'éel jaajay patbil kat le ba'ax quin in we'es ti' techa', u ti'al ca páatchajac u xo'ocol t'áalcab.

³Yaan dze'edzec kiin u bin u ti'al ca béeyac le ba'ax dzo'oc a wilic ti' le náaya'; ba'ale' ma' bíin p'áatac ma' u yúuchuli'. Teche' pa'atej quex ca a wila'a' táan u xáantal, tumen bíin kuchuc jach u kiinil u béeytal.

⁴Dzíibt, le j loolob wíinico'obo' ca'anal u yicho'ob, ba'ale' le aj ti'ibil bejo'obo' bíin cuxlaco'ob tumen ma' tu kexico'ob u Kuob.

⁵Le j xiibo'ob ca'anal u yicho'obo' u káato'ob j méektáan; táan xan u caxtico'ob x ma' je'elelil mantadz u káato'ob u láak, quex tumen cu beetic kaas cúulpach le méektáanilo'. Cu japico'ob u chi'ob je'el bix u je'epajal mucnale'; ma' tu yu'ubico'ob u na'ajtalo'ob beyo'ob le quíimilo' le t o'olal cu pulicuba'ob u ch'a'ob múuch' caajo'ob ca'a tac múuch' caajo'ob.

⁶Ba'ale' tuláacal le múuch' caajo'ob ch'a'ano'obo', bíin u p'a'asto'ob le máax j ch'a'obo', táan u kayic ti': ¡Yaj a wanil, teech ca ayikaltal yéetel ba'ax ma' a ti'ali'! ¿Tac tu'ux bíin kuchuc a nijcuntic le ayikalilo'ob a ch'a'amaj majanilo'?

⁷Le máaxo'ob a p'axmajo'obo', bíin kuchuco'ob ti' le kiin ma' táan pa'atico'obe', bíin u p'il u yicho'ob le máaxo'ob beetico'ob ca'ach a mukyaje', bíin u p'atecho'ob chacnulil.

⁸Le múuch' caajo'obo' bíin u nupuba'ob u beeto'ob ti' teech kaas bíin u yocoltecho'ob je'el bix úuchic a wocoltico'obe'. Bíin u beeto'ob a mukyajtic le loob ta beetaj ti'obe', le meyaj loob ta beetaj te j caajo'obo', ti' le caajo'ob yéetel ti' u cajnáalilo'ob.

⁹¡Yaj a wanil tumen ta chupaj a wotoch yéetel ba'axo'ob a wocoltmaj u ti'al a jechic u chi' quíimil!

¹⁰Beyo' dzo'oc a chupic a wotoch tu yéetel subtzilil, dzo'oc a caxtic a ch'éejsa'al tumen ta xu'ulsaj ya'abcach múuch' caajo'ob.

¹¹Tac u tuunichilo'ob le pako'ob yéetel u che'ilo'obe', bíin awat t'aanaco'ob u k'áatico'ob a jaadzil.

¹²¡Yaj a wanil, tumen ca beetic caajo'ob yéetel a quíimsaj wíinic bey xan yéetel a j ma' ti'ibil bejilo'ob!

¹³Yuumtzil u yuumil tuláacal páajtalile' bin u ca'aj u mix ba'alcunt a meyaj yéetel a xul óolo'ob, tuláacal ba'axo'ob a beetmaje' bíin ch'éejsa'ac tumen káak.

¹⁴Yóokolcaabe' bíin chu'upuc yéetel u nojbe'enil Yuumtzil je'el bix chu'upul le ka'anab tumen le ja'o'.

¹⁵¡Yaj a wanil tumen teche' ca cáalcuntic le máaxo'ob cajnáalo'ob naadz ti' techo', tumen ca dzáic u yuko'ob vino a xa'akbesmaj yéetel ba'alo'ob cu sat óol, u ti'al ca a cáalcunto'ob tu yo'olal a wilic u chacnulilo'ob!

¹⁶Subtzilil bíin yanac ti' teech u jeelint tziiquil, tumen Yuumtzile' bin u ca'a u dzáa ti' teech jun p'éel ukul a wuke' u ti'al a we'esic ma' sut kupta'anechi', bíin u sut subtzilil a tziiquil.

¹⁷Le meyaj loobo'ob ta beetaj ti' u pu'uquilo'ob Libanoe' bíin suunac kaasil ti' teech, bíin u ja'akes a wóol tumen bíin quíimsa'ac a waalak ba'alche'ob. Lelo' bíin úuchuc ti' teech tu yo'olal a quíimsaj wíinico'ob tu yo'olal xan le meyaj loobo'ob ta beetaj ti' le caajo'obo', ti' u caajilo'ob yéetel ti' u cajnáalilo'ob.

¹⁸¿Ba'ax u biilal jun p'éel póolbilche' quéen dzo'ococ u beeta'al? ¿ba'ax u biilal jun p'éel oochel wa chéen bo'oy u ca'aj? Le beetbil kuobo' ma' tu páajtal u t'aano'ob; ¿bix je'el u páajtal u yocsic u yóol ti'ob, le máax beetico'obo'?

¹⁹¡Yaj a wanil, tumen teche' ca wa'alic ti' jun p'éel ku beeta'an yéetel che' ca u p'il u yich, bey xan ca wa'alic ti' jun p'éel tuunich toot, ca wa'alac! ¿Je'el wa u páajtal u dzáico'ob wa ba'ax péectzilile'? ¡Ma' tu páajtal u dzáico'ob tumen mina'an cuxtal ti'ob quex tumen láaj bona'ano'ob yéetel oro bey xan yéetel plata!

²⁰Ba'ale' Yuumtzile' ti' yaan tu quili'ich kulnaje', ¡u mac u chi' tuláacal u yóokolcaab tu táan!