Read Yucateco Habacuc 3 Bible Online

Habacuc 3 - Yucateco bible

Habacuc 3

¹Lela' u payalchi' aj bóobat Habacuc.

²Yuumtzil, le ba'ax quin wu'uyic ti' teech, yéetel tuláacal le ba'ax dzo'oc a beetico', cu chupiquen yéetel quili'ich tziiquil ti' teech. Beet tu yéetel c cuxtal le nucuch ba'alo'ob ta beetajo'ob úucho', u ti'al xan to'one', ca c kaj óoltech. E'es ti' to'on a ch'a'a óotzilil ichil a p'uja'anil.

³Kue' ti' cu taal tu lu'umil Temane'; ti' u pu'uquil parán u taal quili'ich Ku. U nojbe'enile' cu xíit'il ti' tuláacal ca'an, tuláacal yóokolcaab cu chu'upul tu yéetel u qui'iqui' t'aanil.

⁴Táan u taal bakpachta'an tumen jóopbal sáasjome'enil, u kabo'obe' cu jóokol u léembalo'ob sáasil cu ye'esic le páajtalil u balmubáa ti'o'.

⁵Tu táane' cu kuchul le sajbe'en báan quíimilo'obo', tu paache' cu taal x elel chocwil.

⁶Le quéen wa'alac leti'e' lu'ume' cu quíilbal; le múuch' caajo'ob cu péec u yóolo'ob quéen paacatnac; le úuchben witzo'obo' cu níiquilo'ob bey xan cu p'áatal mix ba'al le úuchben pu'uco'obo'; ba'ale' u beelo'ob Kue' bíin p'áataco'ob ti'al ja'abo'ob mina'an u xuul.

⁷Tene' in wilmaj u cajnáalilo'ob Cusán t'uubulo'ob ichil yaj óolal, u cajnáalilo'ob Madiane' mot'ocbalo'ob tu yéetel sajacaquil.

⁸¿Yuumtzil dzo'oc wa a kuuxtal ti' le áalcab ja'obo'? ¿Dzo'oc wa u léequel a p'uja'anil ti' le ka'anabo'obo'? ¿Le t o'olal ca nat'ic a tzíimino'ob yéetel ca na'acal tu bolanilo'ob a náajaltic ba'ateltico'ob?

⁹A nu'ucbesmaj a x p'úunche' bey xan a x julubo'ob. Tu yéetel áalcab ja'obe' ta je'aj becano'ob te j lu'um.

¹⁰Le pu'uco'obo' cu quiquilanquilo'ob le quéen u yilecho'ob; cu káaxal ka'amcach ja' taalbal te j ca'ano', taamtam ka'anabe' cu yu'uba'al u dzíiquil ca'aliquil cu líikil ca'anal u nucuch cuclilo'ob.

¹¹Le kiin yéetel le ujo', ma' tu jóokolo'ob tu'ux u ta'acbesmajuba'ob tu táan u léedzbal a x julubo'ob yéetel tu táan u sáas jope'enil u léenbal a lóomte'.

¹²Ichil a p'uja'anile' ca láaj xíimbaltic le lu'umo'; ichil a p'uja'anile' ca xanabcha'atic le múuch' caajo'obo'.

¹³Teche' dzo'oc a jóokol a wáant a caajal bey xan le ajaw teech ta yéeyajo'. Dzo'oc a jenic u yóok najil u yotoch le aj loolob máaco', dzo'oc a jéechcuntic tac u chuun pakilo'ob.

¹⁴Ta quíimsaj u náacomil yéetel le x julubo'ob yaan tu kabo', le ca tu puljubáa bey chac ikal u aj ba'atelo'ob, tu puljuba'ob yéetel ca'anal ichil u ti'al u ki'itbeso'ob le máaxo'ob mina'an u yóolo'obo', u ti'al ca x mucul ch'éejso'ob.

¹⁵Yéetel a tzíimino'ob ca wáalcabtic le ka'anabo', ca xíimbaltic tuláacal u cóochil le u yóomil le ja'obo'.

¹⁶Le ca'aj tin wu'uyaj tuláacal lela' sajacchajen. Jo'op' u quiquilaanquil u bóoxelo'ob in chi', lúubla'aj u muuk in wooco'ob, tuláacal in wíinclil j p'áat mina'an u muuk. Quex beyo' bíin in pa'at joomol in wóol le u kiinil bíin u beet Ku u yantalo'ob ichil okom óolal u aj ba'atelo'ob máaxo'ob yedzico'on.

¹⁷Bíin sen qui'imacchajac in wóol túun tu yo'olal Yuumtzil in aj tocsajil. Bíin in qui'iqui' t'ant quex ma' u lolanquil le x higo'obo' mix ca ch'éenec u dzic yich u paklilo'ob le uvaobo'; quex ca p'áatac ma' u yantal u joochil le coolo'obo'; quex ca xu'upuc u múuch'ul le j tamano'ob mix ca mina'anac wacaxo'ob te tu cúuchilo'obo'.

¹⁹Tumen Yuumtzile' cu dzáic in muuk; cu beetic u séeba'antal in wáalcab je'el bix le quéejo' bíin u bisen te tu ca'analil tu'ux mix ba'al bíin úuchuc ti' teno'.